4000 ފުލެޓު ލިބޭ މީހުންގެ ލިސްޓު އަންނަ ރޯދަމަހުގެ ކުރިން އިއުލާނު ކުރައްވާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ.

ނަމަވެސް މި ސަރުކާރު އައިސް މާގިނަ ދުވަސްތަކެއް ނުވެ، ކުރީ ސަރުކާރުން ދީފައި ހުރި ފްލެޓުތަކކަކީ ހައްގުވެރިންނަށް ދީފައި ހުރި އެއްޗެއް ނޫން ކަމަށް ބުނެ ލިސްޓު އަލުން ދިރާސާ ކުރުމަށާ އެކަމުގައި ކޮރަޕްޝަންއަށް މަގު ފަހިވާ ކަންކަން ހުރި ކަމަށް ބުނެ އޭސީސީއަށް މައްސަލަ ބެލުމަށް ހުށަހެޅި އެވެ.

ރައީސް ހުވަދުއަތޮޅަށް ކުރެއްވި ދަތުރުފުޅުގެ ތެރެއިން ނޫސްވެރިންނަށް ދެއްވި އިންޓަރވިއުއެއްގައި މިއަދު ވިދާޅުވީ، އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މި 4000 ހައުސިންގ ޔުނިޓު ދޫކުރުމުގެ މަސައްކަތް ކުރައްވަމުންގެންދަވާކަމަށެވެ. އެގޮތުން މިވީ އަހަރެއްހާ ދުވަހުގެ ތެރޭގައި ކުރެވުނު މަސައްކަތް ރިވިއުކުރުމުގެ މަސައްކަތް ކުރަމުންގެންދަވާކަމަށާއި އުއްމީދަކީ ވީހާވެސް އަވަހަކަށް މި 4000 ހައުސިންގ ޔުނިޓު އޭގެ ވެރިފަރާތްތަކަށް ދޫކުރެވުންކަމަށް ރައީސް ވިދާޅުވި އެވެ.

ރައީސް މިފަދައިން ވިދާޅުވިއިރު ކުރީގެ ހައުސިން މިނިސްޓަރު ހައިދަރު ވަނީ ފްލެޓް ލިސްޓް އާންމުކުރާނެ ކަމަށް ބުނެ ގިނަ ތާރީހުތަކެއް ދީފަ އެވެ. ނަމަވެސް ލިސްޓް އާންމު ކުރެވިފައެއް ނުވެއެވެ. މިކަމާ ގިނަ ބައެއްގެ ފާޑުކިޔުން ސަރުކާރަށް އަމާޒުވި އެވެ.

މާލޭގައި މިފަހުން ހިނގި ބޮޑު އަލިފާނުގެ ހާދިސާ އަށްފަހު ހައުސިން މިނިސްޓްރީގެ ދަށުން ކުރިއަށްގެންދިޔަ މަސައްކަތްތައް މިހާރު ވަނީ ކޮންސްޓްރަކްޝަން މިނިސްޓްރީގެ ދަށަށް ބަދަލުކޮށް، އެ ދެ މިނިސްޓްރީ އެއްކޮށްލާފަ އެވެ. އެގޮތުން، ހައުސިންއާ ގުޅުންހުރި ކަންތައް މިހާރު ކުރިއަށް ގެންދަނީ މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗާގެ ދަށުން، މިނިސްޓަރު ޑރ. އަބްދުﷲ މުއްތަލިބުގެ ބެލުމުގެ ދަށުންނެވެ.

ގެދޮރުވެރިޔާ ސްކީމުން ފްލެޓު ލިބޭ ކަމަށް ނެރުނު ލިސްޓު އަލުން ބެލުމަށް ފަހު އާންމުކުރުން ލަސްވަނީ އުސޫލާ ހިލާފަށް އެތައް ބަޔަކު ލިސްޓުގައި ހިމަނާފައިވާތީ ކަމަށް ރައީސް ވަނީ މީގެ ކުރިން ވިދާޅުވެފަ އެވެ. އެކަމާ ގުޅޭ ތަހުގީގެއް ފުލުހުންނާއި އޭސީސީން ވެސް ކުރިއަށް އެބަގެންދެ އެވެ.

މިދިޔަ ސަރުކާރުން ހިންގި "ގެދޮރުވެރިޔާ" ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު އެގްރީމެންޓް ވެސް ވަނީ ހަދާފަ އެވެ.

ފްލެޓް ދޫކުރުމުގެ މައްސަލައާ ގުޅޭގޮތުން އަދިވެސް ވާނުވާ ނޭނގޭ ކަމަށް ފްލެޓް ލިސްޓުގައި ހިމެނޭ ބައެއް ފަރާތްތަކުން ފާހަގަކޮށްފައިވާއިރު، ސަރުކާރުން ދައްކާ ވާހަކަތަކުގެ ރާގު އެކި ފަހަރު ބަދަލުވަމުންދާތީ އެކަމުގެ ކަންބޮޑުވުން އެތައް ފަހަރެއްގެ މަތިން ފާޅުކޮށް، ސިލްސިލާކޮށް މުޒާހަރާވެސް ދަނީ ކުރަމުންނެވެ.