ރައީސް އަބްދުﷲ ޔާމީން ތަރައްގީކޮށްދެއްވި ސީޕްލޭން ޓާމިނަލްގައި އައު ރެކޯޑެއް ގާއިމުކޮށްފިއެވެ.

ވެލާނާ އިންޓަނޭޝަލް އެއާޕޯޓު (ވީއައިއޭ)ގެ ސީޕްލޭން އެއާ ޓްރެފިކް މޫވްމެންޓްގެ އާ ރިކޯޑެއް ގާއިމުކޮށްފައިވާކަން ހާމަކޮށްފައިވަނީ މޯލްޑިވްސް އެއާޕޯޓްސް ކޮމްޕެނީއިން އެކްސްގައި ކުރި ޕޯސްޓެއްގައެވެ.

ހޮނިހިރު ދުވަހު އެމްއޭސީއެލްއިން ކޮށްފައިވާ އެ ޕޯސްޓުގައި ހާމަކޮށްފަައިވާ ގޮތުގައި ސީޕްލޭންގެ 649 އެއާ ޓްރެފިކް މޫވްމަންޓް ރިކޯޑު ކުރެވިފައި ވަނީ މިދިޔަ އަންގާރަ ދުވަހު ކަމަށެވެ. ސީޕްލޭން ޓާމިނަލްގެ އޮޕަރޭޝަން ފެށުމާއެކު މިއީ އެއްދުވަހެއްގެ ތެރޭ އެންމެ ގިނަ ސީޕްލޭން މޫވްމަންޓު ހެދި ފަހަރު ކަމަށްވެސް ހާމަކޮށްފައިވެއެވެ.

ރާއްޖޭގައި ސީޕްލޭން އޮޕަރޭޝަން ކުރިއަށް ގެންދަނީ ތިން ކުންފުންޏަކުންނެވެ. އެއީ ދުނިޔޭގެ އެންމެ ބޮޑު ސީޕްލޭން އޮަޕަރޭޓަރު ޓްރާންސް މޯލްޑިވިއަން އެއާވޭސް (ޓީއެމްއޭ) އާއި މޯލްޑިވިއަން އާއި މަންޓާ އެއާއިންނެވެ. އައު ރެކޯޑާ އެކު އެމްއޭސީއެލްއިން ވަނީ އެ ތިން ކުންފުންޏަށްވެސް މަރުހަބާއާ ޝުކުރު އަދާކޮށްފައެވެ.

ރާއްޖޭގެ އައު ސީޕްލޭން ޓާމިނަލްއަކީ ރައީސް އަބްދުﷲ ޔާމީންގެ ވެރިކަމުގައި އެއާޕޯޓް ތަރައްޤީ ކުރަން ފެށި އެއް ބިލިއަން ޑޮލަރު (15 ބިލިއަން ރުފިޔާ)ގެ ތެރޭގައި ހިމެނައިގެން ކުރިއަށް ގެންދިޔަ ޕްރޮޖެކްޓެކެވެ. އެތަން ނިންމާ ބޭނުންކުރަން ފަށާފައިވަނީ 2022 ވަނަ އަހަރުއެވެ.