ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލްގެ ކުރިމަތިން ދުއްވާފައި ދިޔަ ކާރެއް އަރިއަޅައިލައިފި އެވެ.
ޖުލައި 26އަށް ހުޅުވަން ތައްޔާރުވަމުން އަންނަ ވީއައިއޭގެ ޒަމާނީ އާ ޓާމިނަލް ކުރިމަތީ އަލަށް ހަދާފައިވާ މަގު ހުންނަނީ ކުރިން ބޭނުން ކުރަމުން ދިޔަ މަގަށް ވުރެ އުސްކޮށެވެ.
ފުލުހުން މިއަދު ބުނީ އާ ޓާމިނަލް ކުރިމަތީ ހަދާފައިވާ އާ މަގުން ރޭ 11:45 އެހާއިރު ދުއްވާފައި ދިޔަ ކާރެއް ކުރިން ބޭނުން ކުރަމުން ދިޔަ މަގަށް ފުރޮޅާލާފައިވާ ކަމަށެވެ.
މި ހާދިސާ ހިނގިއިރު ކާރުގައި ހަތަރު މީހަކު ތިބި ކަމަށާއި، އެއްވެސް މީހަކަށް އަނިޔާއެއް ނުލިބޭ ކަމަށް، ފުލުހުން ބުންޏެވެ. ކާރު ދުއްވަން އިން މީހާގެ ލައިސަންސް އޮތް ކަމަށް ވެސް ފުލުހުން ވަނީ ބުނެފައެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ. އެ ކާރު މިހާރު ވަނީ އެ ސަރަހައްދުން ނަގައިފަ އެވެ.
