ސިޔާސަވެ ސިޔާސީ ބޭބޭ ފުޅުންނަށް ކިޔޭ ނުކިޔޭ ނޭނގޭ ހިސާބަށް ބުއްދި ގޯސްވަނީ ހަމަ ހުރެފައެއް ނޫނެވެ. ބުއްދީގެ މައްޗަށް ދޫ ގަދަވެގަންނަނީ ސިޔާސީ ސިހުރުގައި ދޫ ބަންދު ކުރެވޭތީ އެވެ.

ދިއްދޫ ދާއިރާގެ ޕީއެންސީ މެންބަރު އަބްދުއްލަތީފު މުހައްމަދު (ލަތީބެ)އަށް ވެސް ވަޒީރުންނަށް އިންޒާރު ދެއްވާ މިއަދު ދެއްކުނީ މިފަދަ ވާހަކަ އެވެ.

ލަތީފް ވިދާޅުވީ ރައީސްއާ މާ ގާތް ގުޅުމެއް އޮންނަ ބައެއް ވަޒީރުންނަށް އަބަދު އެ މަގާމުގައި ދެމިތިބެވޭނެ ކަމަށް އެ ވަޒީރުން ދެކެވަޑައިގަންނަވާ ކަމަށެވެ. އަދި ވިދާޅުވީ މި ސަރުކާރުގެ ބައެއް މިނިސްޓަރުން ރައީސް ޑރ. މުހައްމަދު މުއިއްޒަށާއި ރައްޔިތުންނަށް ހިދުމަތް ދިނުމުގައި އިހުލާސްތެރި ނޫން ކަމަށެވެ.

ދެން ލަތީފް ވިދާޅުވީ ބައެއް ވަޒީރުން އުޅުއްވަނީ ފިލައިގެން ކަމަށާއި އެގޮތަށް ކަންތައްތައް ވެގެން ނުވާނެ ކަމަށެވެ. މެންބަރުންގެ ގާތުގައި ރައްޔިތުން އެ ޝަކުވާތައް ކުރަމުން އަންނަކަމަށްވެސް ލަތީބެ ފާހަގަކުރެއްވި އެވެ.

ދެން ވަޒީރުންނަށް ހަނދާން ކޮށްދެއްވީ ކުރިން އޭނާ މަޖިލީހުގައި ކަންކުރެއްވި ގޮތުގެ ވާހަކަ އެވެ. ވަޒީރުން ޖަވާބު ދާރީ ކުރުވި ގޮތުގެ ވާހަކަ އެވެ. އެގޮތުން މީގެ ކުރިން 18 ވަނަ މަޖިލީހުގައި ބައެއް ވަޒީރުންގެ އިތުބާރު ނެތް ކަމުގެ ވޯޓު ނަގާފައިވާކަން އޭނާ ހަނދާންކޮށްދެއްވި އެވެ.

ތެދެކެވެ. ވަޒީރުންގެ އިތުބާރު ނެތް ކަމަށް 18 ވަނަ މަޖިލީހުގައި ފާސްކުރި އެވެ. އަދި ވަޒީރުން ނޫނަސް ބައެއް އެހެން ސިޔާސީ ބޭފުޅުންގެ އިތުބާރު ނެތް މައްސަލަތައް ވެސް ރައްޔިތުންގެ މަޖިލީހުގައި ވަނީ ހިންގާފަ އެވެ.

ނަމަވެސް ލަތީބެ އެވެ. މިއަދު ހާލަތު ބަދަލު ވެއްޖެއެވެ. ހާލަތު ބަދަލުވީ ހުދު ލަތީބެ ވެސް ވޯޓު ދެއްވި ގޮތުން ނެވެ. މިއަދު މަޖިލީހުގައި ރައީސް މުއިއްޒު ހިތްފުޅާ ނުވާ ގޮތަކަށް ނިތް އަރުވާލެވުނަސް ވެރިކަން ކުރާ ޕާޓީގެ "ފިޔަވަޅު އަޅާ" ކޮމިޓީން ލަތީބެގެ ގޮނޑި ގެއްލުވާލާނެ އެވެ.

ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް ބަލާއިރު، ދިވެހި ދައުލަތް  އެކަށައަޅައި ތަރުތީބުކޮށްފައި ވަނީ ތިންބާރު ވަކިކުރެވިފައިވާ ނިޒާމެއްގެ މައްޗަށެވެ. އެއީ އެއްބާރުން އަނެއް ބާރުގެ މައްޗަށް ފާރަވެރިވެ ޖަބާބުދާރީކުރުވުމަށެވެ. ގާނޫނީ ތަރަހައިގެ ތެރޭގައި ދައުލަތް ހިފެހެއްޓުމަށް ބާރުއެޅުމުގެ ގޮތުންނެވެ.

މިގޮތުން ގާނޫނުއަސާސީގެ 6 ވަނަ މާއްދާއިން ވެރިކަން ހިންގުމުގެ ބާރު ރައީސުލްޖުމްހޫރިއްޔާއާ ހަވާލުކޮށްފައިވާއިރު، ރައީސުލްޖުމްހޫރިއްޔާއާއި އޭނާގެ ސަރުކާރު ޖަވާބުދާރީކުރުވުމުގެ ޒިންމާ ގާނޫނު އަސާސީގެ 70 ވަނަ މާދާގެ (ށ) ގެ (3) ވަނަ ނަންބަރުން ހަވާލުކޮށްފައިވަނީ ރައްޔިތުންގެ މަޖިލީހާ އެވެ.

ނަމަވެސް މި ދެންނެވި މަޖިލީހުގެ ބައެެއް މެމްބަރުންނަށް ފައިސާއިން ހަދިޔާ ދީގެން ރައީސް މުއިއްޒު އެ މަސައްކަތް ކުރައްވަނީ ދައުލަތު އެއް ބާރު ރައްޔިތުންގެ މަޖިލީސް އެމަނިކުފާނުގެ "މުށު" ތެރޭ ބޭއްވުމަށެވެ.

މި ހާލަތު އުފަން ކުރަން ގާނޫނޫ އަސާސީއަށް ލަތީބެގެ ޕާޓީއިން ފާސްކުރި ބަދަލުތަކާއިއެކު މިހާރު މަޖިލީހުގައި ލަތީބެގެ ގޮނޑި ގެއްލުން އޮތީ ޕާޓީގެ ވެރިޔާގެ އަތުގައި އެވެ. ރައީސް މުއިއްޒުގެ ވަޒީރުންނަށް ކުޑައިމީސް ކުރާ މަޖިލިސް މެންބަރުން ހޯދާ ގެނެސް ފިޔަވަޅު އަޅާ ކޮމިޓީއަށް ރައީސް މުއިއްޒު ދެއްވާ އިރުޝާދާއެކު ލަތީބެ އަށް ވެސް ޖެހިވަޑައިގަންނަވާނީ ގޮނޑި ދޫކޮށް ގެއަށް ދާށެވެ.

ރައްޔިތުންގެ މަޖިލީހުގައި "ރައީސްގެ މެންބަރުން" ތިއްބެވުން އަލުން އަނބުރާ އިއާދަކޮށް ގާނޫނު ހެދުމާއި ވެރިކަން ހިންގުމާއި، ޝަރީއަތް ކުރުމަކީ މުސްތަގިއްލުކޮށް ހިނގާންޖެހޭ ކަންކަމުގެ ގޮތުގައި ކަނޑައެޅިފައިވާ ޖުމްހޫރީ ވެރިކަމުގެ ނިޒާމް "ޚަރާބު" ކޮށްލުމަށް ރައީސް މުއިއްޒު ރާއްވަވާ ހުރިހާ ގޯހަކަށް ވޯޓު ދެއްވުމަށްފަހު، މިއަދު ކަރަށް ބާރު ލައްވާ ރައީސް މުއިއްޒުގެ ވަޒީރުން ފޯނު ނުނަންގަވާ ފިއްލަވައިގެން އުޅޭ ނަމަ 18 ވަނަ މަޖިލީހުގައި ކަންކުރިގޮތަށް ކަންކުރައްވާނެ ކަމަށް ވިދާޅުވި ނަމަވެސް މުއިއްޒުގެ ވަޒީރުންނަށް މިއަދު ކެހެރި ވަކެކޭ ވެސް ހީނުވާނެ އެވެ.

ލާތީފްބެ އަށް މިއަދު ތި ހާލަތު ޖެހުނީ ރައީސް މުއިއްޒުގެ އެދިވަޑައިގަތުމަށް ގާނޫނުއަސާސީ 4 ގަޑިއިރުން ބަދަލުކޮށް، ރައްޔިތުންގެ ބާރުވެރިކަން ނިގުޅައިނަގެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރު ވެސް ނިގުޅައިގަންނަ، އަދި ގާނޫނުއަސާސީގެ އަސާސީ އޮނިގަނޑާ ވެސް ހިލާފު ބަދަލަކަށް ލަތީބެ ވޯޓު ދެއްވުމުން ނެވެ.

މިއަދުގެ ސިޔާސީ ހަގީގަތަކީ މަޖިލިސް މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭނެ ކަމެވެ. އެހެން ކަމުން ރައީސް ޑރ. މުއިއްޒުގެ ވަޒީރުންނަށް ތިހާ ފާޅުގައި ނުރުހި ބަސް ބުނަން ވެއްޖެ ނަމަ ލަތީފްބެ ތިހަ ހުންނެވި ޕާޓީން ވަކިކޮށް ލިބެން އޮތް ބޮނޑި މާބޮޑު ވެދާނެ އެވެ.

މިއަދު ތިޔަ ހުންނެވީ އަމިއްލަ ކަރަށް ފައިން އަރުއްވާ އަމިއްލަ ނިގޫ ފިތޭ ފަދަ ބޮނޑިއެއް ލިބިގެންނެވެ.