ކޮރަޕްޝަންއާ ވައްކަމާ ދެކޮޅު ކަމަށް ވިދާޅުވެ މާލެ ސިޓީގެ މައްޗަންގޯޅި ދެކުނު ދާއިރާގެ ކައުންސިލަރ އައިޝަތު ނާޒިމާ ސަރުކާރު ހިންގާ ޕާޓީ އިން ވަކިވެވަޑައިގެން ރައީސް އަބްދުﷲ ޔާމީން އަލަށް އުފައްދަވާ ޕާޓީ ޕީޕަލްސް ނެޝަނަލް ފްރޮންޓް ޕީއެންއެފާ ގުޅިވަޑައިގެންފިއެވެ.

ނާޒިމާ ޕީއެންއެފަށް ސޮއިކުރައްވާފައިވަނީ އާދިއްތަ ސުވަހުގެ ރޭގެ ވަގުތެއްގައެވެ. ނާޒިމާގެ ފޯމާ ހަވާލުވެވަޑައިގެންނެވީ އެ ޕާޓީގެ އިސް މުއައްސިސް ރައީސް ޔާމީންގެ ދަރިކަލުން ޒޭން ޔާމީނެވެ.

ޕީއެންއެފަށް ސޮއިކުރުމަށްފަހު ނާޒިމާ ދެއްވި އިންޓަރވިއުގައި ވިދާޅުވީ، ޕީއެންއެފް ޚިޔާރުކުރެއްވީ އެއީ ގައުމީ އަދި ވަތަނީ ފިކުރަކަށް ވެފައި އެއީ ވައްކަމާ ކޮރަޕްޝަން ފަދަ ނޭއްގާނީ ކަންކަމާ ދެކޮޅަށް އަޑު އުފުލާނެ ޕާޓީއަކަށް ވުމުންކަމަށެވެ.

ނާޒިމާ ވިދާޅުވީ ސަރުކާރު ތެރެއިން ވައްކަމާ ކޮރަޕްޝަންއަށް މަގު ފަހިވާ ކަންކަން ކުރަމުން ގެންދާ މަންޒަރު ފެންނަކަމަށާ އެގޮތް ކަމު ނުދާތީ ސަރުކާރު ހިންގާ ޕާޓީއިން ވަކިވެވަޑައިގެންނެވީ ކަމަށެވެ.

ނާޒިމާ މިފަދައިން ވިދާޅުވެފައިވާއިރު މި ސަރުކާރު އެކުލަވާލާ މާގިނަ ދުވަސްތަކެއް ނުވެ ރައްޔިތުންވަނީ މި ސަރުކާރުން ކޮރަޕްޝަންގެ އަމަލުތައް ހިންގާ ކަމަށް ބުނަން ފަށާފައެވެ.