ކުރިއަށް މިއޮތީ 20 ވަނަަ ރައްޔިތުންގެ މަޖިލިސް އިންތިހާބެވެ. އިންތިހާބަށް އަދި ވަރަށް ދުވަސް އެބަޮއޮތެވެ. ނަމަވެސް ސަރުކާރު ބަދަލު ވި އިރުން ފެށިގެން ހުރިހާ ސިޔާސީ ޕާޓީތަކަކުން ފެށީ މަޖިލިސް އިންތިހާބުގެ ކެމްޕެއިނެވެ.

ބައެއް ޕާޓީތަކުގެ އެތެރޭގެ އިންތިހާބުގައި މަޞްރަހު ހޫނުވެގެން ގޮސް އެތައް ބަޔަކަށް އަނިޔާވެފައިވާ އިރު، ދެން ތިބި މީހުން އުޅެނީ އަވަދި ނެތި ކެމްޕެއިންގައެވެ. ބައެއް ކެންޑިޑޭޓުންނަށް ޓިކެޓް ކަށަވަރުވެފައިވާ އިރު، ދެން ތިބި މީހުން އަންނަނީ ޓިކެޓު ކަށަވަރުކުރުމަށް ކުރެވޭނެ ހުރިހާ ކަމެއް ކުރަމުންނެވެ.

ނަމަވެސް ފާހަގަކޮށްލާނަމެވެ. ކޮންމެ ފަހަރަކުވެސް މަޖިލިސް އިންތިހާބަށް ތައްޔާރުވާން ފެށުމާއެކު މީ އުފައްދާ ސުވާލެކެވެ. ރަގަޅުވާނީ ރައްޔިތުންގެ މަޖިލީހުގައި ސަރުކާރުގެ މެޖޯރިޓީއެއް އޮތުން ހެއްޔެވެ. ނުވަތަ ސަރުކާރާއި އިދިކޮޅު މެޖޯރިޓީއެއް އޮތުން ހެއްޔެވެ.

ސަރުކާރުން އެދެނީ، ރައްޔިތުންގެ މަޖިލީހުގައި ސަރުކާރުގެ ބަސްވިކޭ މެންބަރުންތަކެއް ތިބުމަށެވެ. ސަބަބެއްގެ ގޮތުގައި ފާހަގަކުރައްވަނީ ސަރުކާރުން ރައްޔިތުންނަށް ކޮށްދެއްވާ މަސައްކަތް ކުރުމުގައި އެއްވެސް ހުރަހަކާއި ކުރިމަތިލާން ނުޖެހުންކަމެވެ. އަދި ޒާތީ ހަސަދައެއް އޮތުމުން މަސަައްކަތް ކުރުމުގައި ދަތިތަކެއް ހުރުންކަމުގައި ވެސް ފާހަގަކުރައްވައެވެ.

އަނެއްކޮޅުން މިއޮތީ އިދިކޮޅު މެޖޯރިޓީ އެއް އޮތުމާއި ގުޅޭ ގޮތުން ދެކެވޭ ވާހަކަތަކެވެ. އެގޮތުން މިމޭރުމުން ވާހަކަދައްކާ މީހުން ބުނަމުންދަނީ ރައްޔިތުންގެ މަޖިލީހުގައި އަބަދުވެސް އޮންނަން ޖެހޭނީ، ސަރުކާރާއި އިދިކޮޅު ޕާޓީ ތަކުގެ މެޖޯރިޓީއެއް ކަމަށެވެ. ސަރުކާރު ޖަވާބުދާރީ ކުރުވުމާއި ސަރުކާރު ޒިންމާދާރު ކުރުމުގައި ފަސޭހައިން އިސް ރޯލެއް އަދާކުރަނީ ސަރުކާރުގެ އިދިކޮޅު ބޭފުޅުން ކަމުގައި ވެސް ފާހަގަކުރެއެވެ.

އެކި މީހުންގެ ވާހަކަތައް މިފަދައިން ހުރި އިރު، އަޅުގަނޑުމެންނަށް ސަރުކާރުގެ މެޖޯރިޓީއެއް އޮތް މަޖިލީހެއްގެ ހާލަތު ނިމިދިޔަ ސަރުކާރުން ވަރަށް ސާފުކޮށް ފެނިގެން ގޮސްފައިވެއެވެ.

އަޅުގަޑުގެ ހިޔާލު ހިއްސާކޮށްލާނަމެވެ. ރާއްޖޭގެ ނިކަމެތިން އުޅޭ ކަމަށް ބުނާ ރައްޔިތުންގެ މަޖިލީހުގައި، ކޮންމެ ޕާޓީއެއްެގެ މެންބަރަކު ހޮވިގެން އަޔަސް މިހާރު އެންމެ މުހިންމީ އަޚުލާގެވެ. އަޚުލާގު ނެތުމުގެ ސަބަބުން ބޭރު ދުނިޔޭގައިވެސް ރާއްޖޭގެ ރައްޔިތުންގެ މަޖިލިސް ވަނީ ބޮޑު ޖޯކަކަށް ވެފައެވެ.

ކުރިއަށް އޮތް ރަައްޔިތުންގެ މަޖިލީހުގައި އޮންނަން ވާނީ ސަރުކާރަށް އެއްބާރުލުން ދީ މަސައްކަތް ކުރާނެ ސަރުކާރުގެ މެޖޯރިޓީއެއްތޯ، ނުވަތަ ސަރުކާރު ޖަވާބުދާރީ ކުރުވާނެ ވަރުގެ އިދިކޮޅު މެޖޯރިޓީއެއްތޯ މިއީ އުފައްދަން ޖެހޭ ސުވާލެކެވެ. އަދި މިކަމާއި މެދު ވިސްނާ ފިކުރު ކޮށްލުން މުހިއްމެވެ.

ގޮތް ނިންމާނީ ރައްޔިތުންނެވެ.