ހުޅުމާލެ ހޮސްޕިޓަލް ޓާޝަރީ ފެންވަރުގައި ހުޅުވިކަމަށް ބުނެ ސަރުކާރުން ހެދީ ދޮގު ހަދައިފިއެވެ.
ސަރުކާރުން ހުޅުމާލެ ހޮސްޕިޓަލް ޓާޝަރީ ފެންވަރުގައި ތަރައްގީކޮށް ރަސްމީކޮށް ހުޅުވައިފައިވަނީ މިދިޔަ އަހަރުގެ ނޮވެމްބަރު މަހުގައެވެ.
ސަރުކާރުން މިފަދައިން ބުނެ ހޮސްޕިޓަލް ހުޅުކަމުގައި ވީ ނަމަވެސް ހުޅުމާލެ ހޮސްޕިޓަލުގައި ޔޫރޮލޮޖީ ޑިޕާޓްމެންޓެއް ނީންނަކަމުގެ މައުލޫމާތުވަނީ 13އޮންލައިނަށް ލިބިފައެވެ.
އެގޮތުން އެ ހޮސްޕިޓަލުގައި އެންމެ ފަހުން ބައްލަވަން ފެށީ ޕަލްމޯނޮލޮޖިސްޓަކާއި ކިޑްނީގެ ހާއްސަ ޑޮކްޓަރެއްކަންވެސްވަނީ ޔަގީން ކުރެވިފައެވެ. އަދި އެ ހޮސްޕިޓަލުގައި ދުވަހަކުވެސް ކުޑަ ކަމުދާ ބަލިތަކަށް ހާއްސަ ޑޮކްޓަރެއް ނުބައްލަވާކަމަށްވަނީ މައުލޫމާތު ލިބިފައެވެ.
ޓާޝަރީ ހޮސްޕިޓަލްތަކަކީ ހޮސްޕިޓަލް ފަރުވާގެ އެންމެ މަތީ ފެންވަރުގެ ހޮސްޕިޓަލްތަކަށްވާއިރު، ޚާއްޞަ އަދި ކޮމްޕްލެކްސް މެޑިކަލް ޚިދުމަތްތައް މި ހޮސްޕިޓަލްތަކުން ފޯރުކޮށްދެއެވެ.
ޔޫރޮލޮޖީ އަކީ ކުޑަކަމުދާ ނިޒާމާއި ފިރިހެނުންގެ ނަސްލު އުފެއްދުމުގެ ނިޒާމަށް އަމާޒުކޮށްގެން އުފައްދާ ސާޖިކަލް ސްޕެޝަލިޓީއެކެވެ. އެގޮތުން، އެއީ ޓާޝަރީ ހޮސްޕިޓަލްތަކުގައި އާންމު އަދި ކޮންމެހެން ހިމެނިފައިވާންޖެހޭ ޑިޕާޓްމަންޓެކެވެ.
