މާލޭގެ މަގުތަކުގައި އުޅޭ ބުޅާތަކަށް ހާއްސަކޮށްގެން ހަދާ ފެސިލިޓީއަށް ބޭނުންވާ ބިން މާލޭ ސިޓީ ކައުންސިލާ ހަވާލުކޮށްފި އެވެ.

މާލޭ ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނީ އެނިމަލް ވެލްފެއާ މިނިސްޓްރީން އެ ބިން މާލޭގެ މޭޔަރު އާދަމް އާޒިމްއާ މިހާރު ހަވާލުކޮށްފައިވާ ކަމަށެވެ.

އާންމުކޮށްފައިވާ ފޮޓޯތަކުން ފެންނަ ގޮތުގައި ބިން ހަމަޖައްސާފައި ވަނީ ހުޅުމާލޭ ދެވަނަ ފިޔަވަހީގައި އޮންނަ ހިޔާ ޓަވަރުތަކާ ދިމާލުން އޮންނަ ބިމަކުންނެވެ.

މޭޔަރުކަމުގެ ހުވާ ކުރެއްވުމުގެ ކުރިން އާޒިމް ވަނީ ބުޅަލުގެ މައްސަލަ ހައްލުކުރުމަށް ވެޓް ކްލިނިކެއްގެ އިތުރުން ޒަރޫރީ ހިދުމަތްތަކާ އެކު އެކަށީގެންވާ ސަރަހައްދެއް ތަރައްގީކުރައްވާނެ ކަމަށް ވިދާޅުވެފައެވެ.

އަދި މިހާރުން މިހާރަށް މައްސަލައަށް ފިޔަވަޅު އެޅުމަށް އިންތިހާބުވާތާ ފުރަތަމަ ދެތިން މަސް ދުވަސް ތެރޭގައި ވަގުތީގޮތުން ވަކި ސަރަހައްދެއް ހާއްސަ ކުރުމަށް ފަހު، ބުޅާތައް ނިއުޓާ ކުރަން ފެށިދާނެ ކަމަށް ވެސް އޭނާ ވިދާޅުވެފައިވެ އެވެ.

މާލޭގެ މަގުތަކުގައި ބުޅާ ގިނަވެ އޭގެ ނަޖިހުން އާންމުންނަށް އުނދަގޫވާ ކަމުގެ ޝަކުވާ ބޮޑުވެފައިވާއިރު ރައީސް ޑރ. މުހައްމަދު މުއިއްޒު މާލޭގެ މޭޔަރު ކަމުގައި ހުންނެވިއިރު ވެސް ވަނީ ވިލިމާލޭގައި ބުޅާ ފެސިލިޓީއެއް ހަދައިދޭނެ ބަޔަކު ހޯދަން އިއުލާނުކޮށްފައެވެ.

ތިން ފަހަރެއްގެ މަތިން އިއުލާނުކޮށްގެން ވެސް އޭރު އެ މަސައްކަތަށް ޝައުގުވެރިކަން ބަޔަކު ފާޅުނުކުރިޔަސް، ފަހުން އެކަމަށް ބަޔަކު ޝައުގުވެރިކަން ފާޅުކޮށްފައިވާ ކަމަށް ކައުންސިލުން ބުންޏެވެ.

އެކަމަކު އެ މަސައްކަތަށް ފަހުން ވީ ގޮތެއް ނޭނގެ އެވެ. މާލޭގެ މަގުތަކުގައި އުޅޭ ބުޅާތައް ނުވިހާ ގޮތަށް ހަދައި ބުޅާތައް ވަކި ތަނަކަށް ބަދަލުކުރުމަށް 1.9 މިލިއަން ރުފިޔާގެ ބަޖެޓެއް ވެސް ކައުންސިލުން ކަނޑައެޅިއެވެ.