ރައީސް ޑރ މުހައްމަދު މުއިއްޒު ރަށަށް ފައިބައިވަޑައިގެންނެވި ވަގުތު ބަޚްލޫލު ލަވަ ޖަހާ އެމަނިކުފާނު ލަދު ގަންނަވާލައިފިއެވެ.

މިކަން ހިނގާފައިވަނީ މިހާރު ރައީސް މުއިއްޒު ހއގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ހއ މުރައިދޫއަށް ވަޑައިގެންނެވުމުންނެވެ.

އެގޮތުން އެ ރަށުގެ ރައްޔިތުން ވަނީ ރައީސް މުއިއްޒު ބަނދަރު ސަރަހައްދުގައި ހުންނަވަނިކޮށް "ތީ ބަޚްލޫލެކޭ" ލަވަ އަޑު ހަރުކޮށް ޖަހާފައެވެ. ހއ. މުރައިދޫ އިން، ރައީސް މުއިއްޒަށް ފާލަން މަތިން މަރުހަބާ ކިޔުމަށް ޖެހީ "ތިއީ ބަހުލޫލެކޭ" ލަވައެވެ. ‏އެތައް މިލިއަން ރުފިޔާ ޚަރަދުކުރައްވައިގެން ރަށްތަކަށް ދަތުރުކޮށް ދޮގު ވާހަކައާއި ދޮގު ވައުދުތައް ވާ ކަމަށް ބުނެ ރައީސް މުއިއްޒު ރަށްރަށަށް ނޭރުމަށް ވެސް ރައްޔިތުން ދަނީ ގޮވާލަމުންނެވެ.

ރައީސް މުއިއްޒު ރިޔާސީ އިންތިޚާބުގެ ތެރޭގައި ރަށްތަކުގެ ރައްޔިތުންނަށްވީ ވައުދުތައް ނުފުއްދަވާ މިހާރު ރަށްރަށަށް ދަތުރުކުރައްވަމުން ގެންދަވާއިރު ގިނަ ބަޔަކު ރަށް ރަށުން ނުކުމެ ދަނީ ރައީސް މުއިއްޒުއާ މެދު ނުރުހުން ފާޅުކުރަމުންނެވެ.