ބޭރު ގައުމުތަކުގައި އިސްލާމް ދިވެހި ކިޔައިވައިދިނުން ހުއްޓިފައިވާކަމަށް ވިދާޅުވެ ތައުލީމާ ބެހޭ ވަޒީރު ޑރ. އިސްމާއިލް ޝަފީއު ހެއްދެވީ އިތުރުފުޅެއްކަން ހާމަވެއްޖެއެވެ.

ރައީސް ޑރ. މުހައްމަދު މުއިއްޒާއެކު ތ. އަތޮޅަށް ކުރެއްވި ދަތުރުފުޅުގައި، އެ އަތޮޅު ވަންދޫއަށް ވަޑައިގެން މިނިސްޓަރު ޑރ. ޝަފީއު އެ ރަށު ރައްޔިތުންނާ ވާހަކަދައްކަވަމުން ލަންކާއާއި، މެލޭޝިއާގައި ކިޔަވާ ދަރިވަރުންނަށް އިސްލާމާއި ދިވެހި މާއްދާ އަލުން ކިޔަވައިދޭން ފަށާނެ ކަމަށް ވަނީ ވިދާޅުވެފައެވެ.

ލަންކާ އަދި މެލޭޝިއާގައި ދިވެހި އިސްލާމް ކިޔަވައިދިނުން ހުއްޓިފައިވާކަން ހާމަކުރައްވާ ފަދަ މޭރުމަކުން ޑރ. ޝަފީއު ވާހަކަ ދެއްކެވިއިރު ލަންކާ އަދި މެލޭޝިއާގައިވެސް އެ މާއްދާތައް ދަނީ ވޭތުވެދިޔަ 10 އަހަރުގައިވެސް ކިޔަވައި ދެމުންކަން ޗެނަލް13 އަށް ވަނީ ކަށަވަރުވެފައެވެ.

މިކަމާ ގުޅިގެން ލަންކާގައި ކިޔަވަމުން ދާ ދަރިވަރުންތަކެއްގެ މަންމަ އަކު ނަން ހާމަނުކުރުމަށް އެދި ޗެނަލް13އަށް މައުލޫމާތު ދީފައިވަނީ، ސޯސަން ވިލާގައި ހަފްތާގެ ތިން ދުވަހު އެ މާއްދާތައް ކިޔަވައި ދިނުމަށް ކްލާސްތައް ބާއްވާ ކަމަށެވެ. އަދި ގުރުއާން ވެސް ކިޔަވައިދެމުންދާ ކަމަށާ ގުރުއާން ޕޫލުވެސް އޮންނަ ކަމަށް އެ ބެލެނިވެރިޔާ ވަނީ މައުލޫމާތު ދީފައެވެ.

މީގެ އިތުރުން އެ މީހާ މައުލޫމާތު ދިން ގޮތުގައި ދަރިވަރުން ވަނީ ފާއިތުވި ތިން އަހަރު އެސްއެސްސީ އިމްތިހާނުވެސް އެ މާއްދާތަކުން ހަދާފައެވެ.

ކުރީ ސަރުކާރުގެ އިހުމާލުން ބޭރު ގައުމުތަކުގައި ދިވެހި އިސްލާމް ކިޔަވައިދިނުން ހުއްޓިފައިވާކަމަށް އެޑިއުކޭޝަން މިނިސްޓަރު ވިދާޅުވެފައިވާއިރު، ލަންކާގެ ސޯސަންވިލާގައި ހިންގާ މޯލްޑިވްސް ސެންޓަރުގެ އިސްވެރިޔަކަށް ދާދި ފަހަކާ ޖެހެންދެން ހުންނެވި ޖައުފަރު ރަޝީދު (ޖޯރޭ) ވެސް ވަނީ އެކަން ދޮގުކުރައްވާފައެވެ.

ޖައުފަރު ފޭސްބުކްގައި ކުރެއްވި ޕޯސްޓެއްގައި ވިދާޅުވީ ޝަފީއުގެ އެ ވާހަކަތަކަކީ "ސީދާ ކަނޑައެޅިގެން ބުހުތާނު ދޮގު" ކަމަށެވެ. އަދި އެޑިއުކޭޝަން މިނިސްޓަރު ރާއްޖޭގެ ރަށަކަށް ވަޑައިގެން ރޯމާ ދުވާލު އެހާ ބޮޑު ދޮގެއް ހެއްދެވީ ކީއްވެތޯ އޭނާ ސުވާލު ކުރެއްވިއެވެ.

ޖައުފަރު މިފަދައިން ވިދާޅުވެފައިވާއިރު، އެމްޑީޕީގެ ސަރުކާރު ނިމުނުއިރު 198 ދަރިވަރުން އެ ސެންޓަރު ތިބިއިރު، އެ ދަރިވަރުންނަށް އިސްލާމް، ދިވެހި އަދި ގުރުއާން ކިޔަވައިދޭން ތިބީ ހުސް ދިވެހި ޓީޗަރުންކަމަށް ޗެނަލް13 އަށް ވަނީ ކަށަވަރުވެފައެވެ.

މިކަމުގައި ލަންކާ އެމްބަސީގެ ބަހެއް ހޯދާލަން ކުރި މަސައްކަތްވަނީ ކާމިޔާބުވާ ގޮތް ނުވެފައެވެ.