ރ އިނގުރައިދޫއަށް މި ވަގުތު ދިމާވެފަިއވާ އެންމެ ބޮޑު އެއް މައްސަލައަކީ ރަށް ގިރުމުގެ މައްސަލަ ނަމަވެސް ސަރުކާރުން އެކަމާ އަޅާނުލާކަމުގެ މައުލޫމާތު ލިބިއްޖެއެވެ.

އެގޮތުން އެ ކަން ހިއްސާކޮށް އިނގުރައިދޫއިން "ތޭރަ އޮންލައިން"އަށް މައުލޫމާތު ދިން މީހާ ބުނެފައިވަނީ ރަށްގިރުމުގެ މައްސަލަ ސަރުކާރުގެ ކަމާބެހޭ ވުޒާރާތަކަށް ރިޕޯޓް ކުރަމުން ދާތާ އެތަކެއް އަހަރުތަކެއް ވެއްޖެ ކަމަށާ މިހާރު އާންމުންގެ ގެދޮރަށް އެތައް ބޮޑެތި ގެއްލުންތަކެއް ލިބިއްޖެ ކަމަށެވެ.

ޚާއްސަކޮށް އިރުވައި މޫސުމުގައި އުދަ އަރާ ރާޅުތައް ގޭގެއައް ވަންނަ ދަރަޖައަށް ގޮސްފައިވާއިރު މިކަމަށް އެއްވެސް ހައްލެއް ހޯދައި ދިނުމަށް ސަރުކާރުން މަސައްކަތް ނުކުރާ ކަމަށް ވެސް އެމީހާ ވަނީ މައުލޫމާތު ދެއްވާފައެވެ.

މިކަމާ ގުޅިގެން އިނގުރައިދޫ ކައުންސިލްގެ ބަހެއް ހޮދާލުމަށް ކުރި މަސައްކަތް ކާމިޔާބުވާ ގޮތް ނުވެފައިވާއިރު އީޕީއޭގެ ބަހެއް ވެސް އަދި ވަނީ ލިބޭ ގޮތް ނުވެފައެވެ.

ގޭގެއަށް ރާޅު ވަދެ ރައްޔިތުންގެ ގެދޮރު ހަލާކުވެ އަގު ބޮޑެތި މުދާވެސް ހަލާކުވަމުންދާއިރު ދާއިރާ ތަމްސީލު ކުރައްވަން ހުންނެވީ ސަރުކާރު ނިސްބަތްވާ ޕާޓީގެ ބޭފުޅެކެވެ. އެގޮތުން މަޖިލީހުގެ މެޖޯރިޓީ ލީޑަރު އިބްރާހިމު ފަލާހުގެ ދާއިރާގައި އިނގުރައިދޫ ހިމެނޭއިރު މިކަމަށް ފަލާހު މަސައްކަތްނުކުރާ ސަބަބާ މެދު ސުވާލުއުފެދެއެވެ.

ދާއިރާ ރައްޔިތުން ހާލުގައި ތިބިއިރު ފަލާހު ގެންދަވަނީ ނަމަވެސް މަޖިލިސް ގޮނޑީގެ ދިފާއުގައި ސިޔާސީ ޕޯޑިއަމްތަކުގައި ނުހަނު އަޑު ހަރުކޮށް ރައީސުލްޖުމްހޫރިއްޔާއަށް ސަނާ ކިޔަމުންނެވެ.