މި އަހަރުގެ ޙައްޖުގެ އަޅުކަމަށް ޖާގަ ކަށަވަރުކުރުމަށް ކަމަށް ބުނެ ފައިސާ ޖަމާކުރުމަށް އެދި މޯލްޑިވްސް ޙައްޖު ކޯޕަރޭޝަންގެ ނަމުގައި ކުރާ ފޯން ކޯލުތަކަކަށް ސަމާލުވުމަށް އިލްތިމާސްކުރައްވައިފިއެވެ.
ޙައްޖު ކޯޕަރޭޝަނުން ވިދާޅުވީ އެ ކޯޕަރޭޝަންގެ ނަމުގައި ފަހަކަށް އައިސް ޙައްޖާއި ގުޅުވާގެން ސްކޭމް ކޯލުތަކެއް ކުރަމުންދާ ކަމަށެވެ. އަދި އެ ކޯލުތަކުގައި ޙައްޖުގެ އަޅުކަން އަދާކުރުމަށް ޖާގަ ކަށަވަރުކުރުމަށްޓަކައި ފައިސާ ޖަމާކުރުމަށް އެދެމުންދާ ކަމަށް އެ ކޯޕަރޭޝަނުން ވިދާޅުވިއެވެ.
އެ ކޯލްތަކުގައި އެދެމުންދަނީ، ފައިސާ ޖަމާކުރުމަށް ކަމަށާއި، އެދެނީ އަމިއްލަ ފަރުދެއްގެ އެކައުންޓަކަށް ކަމަށް އެ އިދާރާއިން ވަނީ ހާމަކޮށްފައެވެ.
އަމިއްލަ ފަރުދެއްގެ އެއްވެސް އެކައުންޓަކަށް ފައިސާ ޖަމާކުރުމަށް ޙައްޖު ކޯޕަރޭޝަނުން ނާންގާނެކަމަށްވެސް، އެ ކޯޕަރޭޝަނުން ވިދާޅުވެއެވެ.
މި އަހަރުގެ ޙައްޖުގެ އަޅުކަމަށް ޖާގަ ކަށަވަރުކުރުމަށް ކަމަށް ބުނެ މި ކޯޕަރޭޝަންގެ ނަމުގައި ކުރަމުން ދާ ފޯންކޯލްތަކަށް ސަމާލުވެލެއްވުމަށް އިލްތިމާސްކުރަން! https://t.co/Q0uLLzcjTm">pic.twitter.com/Q0uLLzcjTm
— Maldives Hajj Corporation Limited (@Hajjcorporation) https://twitter.com/Hajjcorporation/status/1756262712173322252?ref_src=twsrc%5Etfw">February 10, 2024
މި ފަހަކަށް އައިސް ބީއެމްއެލްއާއި އެޗްޑީސީ ފަދަ ތަންތަނުގެ ނަމުގައި އޯޓީޕީ ހޯދުމަށް ވެސް ބައެއް ފަރާތްތަކަށް މެސެޖުތައް ފޮނުވަމުންދެއެވެ.
އެފަދަ އޮޅުވާލުންތަކުގެ ޒަރިއްޔާއިން މީހުންގެ ޒާތީ މަޢުލޫމާތު ހޯދުމާއި ފައިސާ ހޯދުމަށް ފޯނުން ގުޅުމާއި މެސެޖުކުރުން ވެސް ވަނީ ޢާންމުވެފައެވެ.
