މޯލްޑިވްސް ހައްޖު ކޯޕަރޭޝަން މެދުވެރިކޮށް އުމުރާ އަށް ދާ ހުރިހާ މީހުންގެ ވިސާ ނަގަމުން ދަނީ އެކުންފުނީގެ ޑީއެމްޑީ ޝޭޚް އަލީ ޝަރީފްގެ އަމިއްލަ ކުންފުންޏެއް ކަމަށްވާ އެލްކާސަސް އިން ކަމަށް ބުނެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.
އެ ކުންފުންޏަށް މޯލްޑިވްސް ހައްޖު ކޯޕަރޭޝަނުން ވިސާ ފީ ދައްކަމުން ދަނީ 350 ޔޫއެސް ޑޮލަރު ކަމަށް ވެސް މައްސަލައިގައި ބުނެފައިވެއެވެ.
އެހެން ނަަމަވެސް ސައުދީ އަރަބިއްޔާ އަށް ވިސާ ފީ ގެ ގޮތުގައި ދައްކަން ޖެހޭނީ 150 ޑޮލަރު ކަމަށް މައްސަލަ ހުށަހެޅި ފަރާތުން ބުނެފައިވެއެވެ.
އޭސީސީ އިން މައްސަލަ ހުށަހެޅި ފަރާތައް ފޮނުވި ލިޔުމުގައި ވަނީ މައްސަލަ ވަނީ ކޮމިޝަނުގައި ރަޖިސްޓަރީ ކޮށްފައި ކަމަށެވެ.
ސަރުކާރާއި ސަރުކާރުގެ ކުންފުނިތަކުގެ ތެރޭގައި ވައްކަމާއި ކަރަޕްޝަން ވަރަށް ބޮޑަށް އަށަގަނެފައިވާ ކަމުގެ އެތައް މައްސަލަ އެއް ކޮންމެ ދުވަހަކު ކަހަލަ ގޮތަކަށް ދަނީ އިތުރުވެ ހާމަ ވަމުންނެވެ.
