ދިވެހި ދައުލަތަކީ އިސްލާމީ ދައުލަތެއް ކަމަށް ފޮތުގައި ލިޔެފައި އޮތް ނަމަވެސް މި ގައުމުން އިސްލާމީ ސިފަވަންތަކަން ގެއްލިފައިވާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އާދިއްތަ ދުވަހުގެރޭ ބޭއްވި ޕީއެންއެފްގެ ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ދިވެހި ދައުލަތަކީ އިސްލާމީ ދައުލަތެއް ކަމަށް ފޮތުގައި ހުދާ ކަޅުން ލިޔެފައި އޮތް ނަމަވެސް ގައުމުގެ ދިމާތަކުން އެ މަންޒަރު ނުފެންނަ ކަމަށެވެ.

އެގޮތުން އެމަނިކުފާނު ވިދާޅުވީ ވެރިންގެ ކިބައިންވެސް ފެނިގެންދަނީ ދީނާ ބީރައްޓެހި ނިންމުންތައް ނިންމަމުން ގެންދާ މަންޒަރު ކަމަށް ވިދާޅުވީ ރައީސް ޔާމީން ވިދާޅުވީ އޭގެ ހެއްކަކީ ހަލާލު ޓުއަރިޒަމްގެ ނަމުގައި ހައްޖު ކޯޕަރޭޝަންއިން އިސްނަގައިގެން މާފުށި ކައުންސިލާ ގުޅިގެން ހަދާ ޓޫރިސްޓު ހޮޓާ ކަމަށެވެ.

ރައީސް ޔާމީން ވަނީ އިސްލާމީ ރައުޔު ނެރެވޭނީ އިސްލާމީ ތައުލީމު ރަގަޅަށް އުނގެނިގެން ހުންނެވި ބޭފުޅަކަށް ކަމަށްވެފައި ރާއްޖޭގެ އަދުގެ އިސްލާމިކު މިނިސްޓަރު އެކަން އެގޮތަށް ނުކުރެވޭނެއޭ ވިދާޅުވުމުން ވެސް އެމަނިކުފާނާ ދެކޮޅަށް ރައީސުލްޖުމްހޫރިއްޔާ އެކަމަށް ހުއްދަދެވުމުން ފެނިގެން ދަނީ އިސްލާމީ ދައުލަތުގެ ސިފަ ގެއްލިފައިވާ ކަން ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވަނީ އިސްލާމްދީނުގެ އަސާސްތަކާ ކަނޑައެޅިގެން ދެކޮޅު އެގްރިމަންޓަކަށް ސަމޯއާ އެގްރިމަންޓު ވާއިރުވެސް އެ އެގްރިމަންޓުގައި ވެސް މި ސަރުކާރުން ސޮއިކުރިކަން ފާހަގަކުރައްވާފައެވެ.

އެމަނިކުފާނު ވަނީ ސަރުކާރުގެ ތެރެއިން ހިންގަމުންތާ ވައްކަމާ ކޮރަޕްޝަންގެ ހުރިހާ ޖަރީމާއަކުން ލިބޭ ފައިދާގެ ބައި އެޅުން ރައީސް މުހައްމަދު މުއިއްޒަށް ލިބިވަޑައިގަންނަވާކަމަށްވެސް ތުހުމަތު ކުރައްވާފައެވެ.