ސަރުކާރުން ގިނަ ވައުދުތަކެއް މި އަހަރުގެ ރިޔާސީ ބަޔާނުގައި ވި ނަމަވެސް ނިމި ދިޔަ އަހަރު ނުކުރެވުނު އެއްވެސް ޕޮސިޓިވް ކަމެއް މި އަހަރުވެސް ނުކުރެވޭނެކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ބުރާސްފަތި ދުވަހުގެ ރޭ ޕީޕަލްސް ނޭޝަނަލް ފްރަންޓް ޕީއެންއެފްގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.

ރައީސް މުއިއްޒު މި އަހަރާއި އަންނަ އަހަރު ތެރޭގައި ގިނަ އިގްތިސާދީ އަދި އުމްރާނީ މަޝްރޫއުތަކެއް ނިންމާލެވޭނެ ކަމަށްވަނީ ރިޔާސީ ބަޔާނުގައި ވިދާޅުވެފައިވެއެވެ.

އެކަމަށް އިޝާރާތް ކުރައްވާ ރައީސް ޔާމީންވަނީ ފުރަތަމަ ރިޔާސީ ބަޔާނުގެ ތެރެއިން މިހާތަނަށް ކޮށްދެވުނު ކަންކަން ވިދާޅުނުވާ ކަމަށް ފާހަގަ ކުރައްވާފައެވެ.

އަދި މިއަދު ރާއްޖޭގެ އިގްތިސާދީ ހާލަތުވަނީ ފުނޑިފައިކަމަށް ވިދާޅުވެ ނިމި ދިޔަ އަހަރު ނުކުރެވުނު އެއްވެސް ޕޮސިޓިވް ކަމެއް މި އަހަރުވެސް ނުކުރެވޭނެކަމަށް ފާހަގަކޮށްފައެވެ.

ރައީސް މުއިއްޒު ގިނަ މަޝްރޫއުތަކެއް މި އަހަރު ނިންމާލެވޭނެކަމަށް ވިދާޅުވި ނަމަވެސް ދައުލަތުގެ ބަޖެޓުގައި ޕީއެސްއައިޕީގެ ބޮޑު އެއްވެސް މަޝްރޫއެއް ހިމަނާފައި ނުވާކަމަށް ރައީސް ޔާމީން ފާހަގަކޮށް ވަރަށް ބޮޑަށް ސަރުކާރަށްވަނީ ފާޑު ވިދާޅުވެފަވެއެވެ.

އެގޮތުން ރައްޔިތުންނަށް އެއްވެސް ކަހަލަ އުންމީދެއް ލިބެން ނެތްކަން ރައީސް ޔާމީންވަނީ ފާހަގަ ކުރައްވާފައެވެ. އެގޮތުން މިދިޔަ އަހަރަށް ފާސްކުރި 55 ބިލިއަން ރުފިޔާގެ ބަޖެޓު ހުސްވިއިރު އެއްވެސް ކަމެއް ސަރުކާރުން ރައްޔިތުންނަށް ނުކޮށްދިނުމުން އެކަމާއި ގުޅިގެންވެސް އެމަނިކުފާނުވަނީ ކަންބޮޑުވުން ފާޅު ކުރައްވާފައެވެ.