ގާނޫނާއި ގަވާއިދުތަކުން ލާޒިމް ކޮށްފައިވާ ސަރަހައްދުތައް ފިޔަވައި އެހެން ތަންތަނުގައި ހެލްމެޓް އަޅައިގެން އުޅޭ މީހުން ހުއްޓުވާނެ ފިޔަވަޅު އަޅާނެ ކަމުގެ އިންޒާރު ފުލުހުން ރޭ ދީފި އެވެ.

ފުލުހުން ނެރެފައިވާ ބަޔާނެއްގައި ބުނެފައިވަނީ މިގޮތަށް ނިންމާފައިވަނީ ކުށްކުށަށް އަރައިގަތުމުގެ ނިޔަތުގައި ހެލްމެޓު އަޅައިގެން އުޅޭކަމަށް އެ ހިދުމަތަށް ފާހަގަކުރެވިފައިވާތީ ކަމަށެވެ.

އެ ފިޔަވަޅު އަޅަން ބުނިގޮތުގައި، ހެލްމެޓް އެޅުން ގާނޫނުތަކުން ލާޒިމް ނޫން ސަރަހައްދުތަކުގައި، ކާކުކަން "ވަންހަނާކޮށް" ކުށްތަކަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭ ކަން މިހާރަކަށް އައިސް ވަނީ ފުލުހުންގެ ސަމާލުކަމަށް އައިސްފަ އެވެ.

އެފަދަ މީހުން ވިޔަފާރިކުރާ ތަންތަނާއި އެކިއެކި ހިދުމަތް ދޭ ތަންތަނަށް ވަދެ އުޅޭ ކަމަށް ވެސް ފުލުހުން ބުންޏެވެ.

ގަވާއިދުގައިވާ ގޮތުން އުޅަނދު ދުއްވަން އިންނަ މީހާ އާއި އޭނާގެ ފަހަތުގައި އިންނަ މީހާ ހެލްމެޓް އެޅުން ލާޒިމް ވަނީ 30 ކިލޯ މީޓަރަށް ވުރެ ބާރަށް ސައިކަލް ދުއްވަން ހުއްދަ ކޮށްފައިވާ ސަރަހއްދުތަކުގަ އެވެ. މާލެ ސަރަހަައްދުގައި ނަމަ އެއީ ސިނަމާލެ ބްރިޖާއި ބްރިޖުގެ ހައިވޭ އެވެ.

މާލޭގައި މި ދުވަސްވަރު މާރާމާރީތައް އިތުރުވެފައިވާއިރު އޭގެ ސަބަބުތައް ފުލުހުން އަދި ނުބުނެ އެވެ.