ތެދެކެވެ. ރައީސް ޑރ، މުއިއްޒު ވެރިކަމަށް ގެންނެވީ ފައިސަލްގެ ވެސް ވަރަށް ބުރަ މަސައްކަތާއި ވަރަށް ބޮޑު ބައިވެރިވުމަކާ އެކުއެވެ. އަނެއްކާ އޭނާއާ ގުޅޭ ގޮތުން މަގާމުގެ މަސްއޫލިއްޔަތު އަދާކުރުމުގައި އެއްވެސް [ގޯސް] ކަމެއް ފާހަގަވެފައެއް ނެތެވެ. އެހެން ވީމާ ފައިސަލް ވަކިކުރަން ޖެހޭ އެއްވެސް ސަބަބެއް އޮތް ކަމަށް ފައިސަލްގެ ބައްޕަ އަބްދުއްރަހީމް ފަދައިން އަޅުގަނޑަކަށް ވެސް ގަބޫލެއް ނުކުރެވެ އެވެ. އަދި މިއަށްވުރެ ވެސް ބޮޑަށް އަޅުގަނޑަށް ގަބޫލުކުރަން ދަތިވެގެން މިއުޅޭ އަނެއްކަމަކީ ރައްޔިތުންގެ މަޖިލީހުގެ ރައީސް ކަމުން އަބްދުއްރަހީމް އަބްދުﷲ ވަކިކުރުމަށް ޕީއެންސީ ޕާލިމެންޓްރީ ގްރޫޕްގެ އެތެރޭގައި ފެށި މަޝްވަރާތަކެވެ.

އަބްދުއްރަހީމް އަކީ ރައީސް ޑރ. މުއިއްޒުގެ "ރޯލްމޮޑެލް" އެވެ. މިހާލަތުގައި އަބްދުއްރަހީމްގެ ބާރު ސަރުކާރުން ކަނޑުވާލުމުގެ މުގުލުގައި ހުންނަވާނީވެސް ރައީސް ޑރ، މުއިއްޒު އެވެ. މިއީ ދެބަސް ނުވެވޭނެ ހަގީގަތެކެވެ. އެންމެ ފުރަތަމަ އަބްދުއްރަހީމްގެ ލޯބިވާ ދަރިފުޅު ފައިސަލް ސަރުކާރުން ނެރެ ހޫރާ ލެއްވީ ވެސް ހުދު ރައީސް ޑރ. މުއިއްޒު އެވެ. އަދި އެއަށްފަހު އިތުރު ވަޒީފާއެއް ދިނުމަކާއިނުލާ ފައިސަލްގެ މާލީ ހާލަތަށްވެސް ބަލާ ލުމެއްނެތި ހައްދުއްމައްޗަށް ފައިސަލް ފޮނުވާލައްވަން އަބްދުއްރަހީމް އަށް މަޖުބޫރުކުރުވީވެސް ހުދު ރައީސް ޑރ. މުއިއްޒު އެވެ.

ބޭނުމަކީ އަބްދުއްރަހީމްގެ ނޫކަށިފުރާގެ ދަރިފުޅާ އަބްދުއްރަހީމް ދުރުކޮށް އަބްދުއްރަހީމްވެސް ސިޔާސީ ގޮތުން "މަރާ"ލުމެވެ. އެ މަސައްކަތް މިހާރު އެދަނީ ފަތުއަޑު ކިޔާފައިބާރަށެވެ. ފުރަތަމަ އަތުލެއްވީ ދުލާއި ގަލަމުގެ މިނިވަން ކަމެވެ. އަމުރު ކުރެއްވީ ބަސްވިދާޅުނުވެ އަދި ޅެން ހެއްދެވުން ހުއްޓާލެއްވުމަށެވެ. ދެން އަތުލަން އުޅުއްވީ ސިޔާސީ ޖަގަހަ ތަކުގެ ތަޅުދަނޑިފައްޗެވެ. އެ ރައީސް ޑރ. މުއިއްޒު އަތުގައި ޖެހޭ ގޮތް ނުވުމުން ބަދަލުކުރީ ދޮރުތަކުގެ ތަޅުތަކެވެ.

ރައީސް ޑރ. މުއިއްޒު މީހަކަށް އަނިޔާވެރިނުވާނެ ކަމުގެ ޔަގީންކަން އަބްދުއްރަހީމް އަށް ކުރިން ހީވެފައި އޮތަސް ޑރ. މުއިއްޒުގެ ސިޔާސީ އަނިޔާވެރިކަމާއި ބަދަލުހިފުން މިހާރު ތަޖުރިބާކުރަމުން އެގެންދަވަނީ ހުދު އަބްދުއްރަހީމްގެ އަމިއްލަ ފުޅު ތަޖުރިބާއިން ނެވެ. އަބްދުއްރަހީމްގެ ދަރިންނާއި ފަހަރި ޅިޔަނުންނަށް ސަރުކާރުން ލިބެމުންދިޔަ ސިޔާސީ މަންފާ މުއިއްޒު އެ ހުއްޓުވާލީ އަބްދުއްރަހީމްގެ ސިޔާސީ "ޗޯރު" ކަން އޭނާއަށް ހަދާންކޮށްދެމުންނެވެ. ރައީސް މައުމޫނަށް އަދި ފަހުން ރައީސް ޔާމީންނަށް ނުވި ވަފާތެރިކަމެއް އަބްދުއްރަހީމްގެ ފުށުން ހުދު ރައީސް ޑރ. މުއިއްޒުއަށް ވެސް ނެތް ކަން ބުނެދެމުން ނެވެ.

މި ސަރުކާރަށް އަދި ރައީސް ޑރ. މުއިއްޒު އަށް ވެސް ދެރަވާނޭ އެއްވެސް ކަމެއް ކޮށްފައެއް ނުވާނެ ކަމާއި އަދި ރައީސް ޑރ. މުއިއްޒު ވިދާޅުވެ ކޮންމެ ކަމެއް ހަމަ އެގޮތަށް ކުރައްވަމުން ގެންދެވި ކަމަށް އަބްދުއްރަހީމް ފާހަގަކުރެއްވި ނަމަވެސް މިއަދު މުއިއްޒު އެ ވާހަކަތަކެއް ގަބޫލެއްނުކުރައްވަ އެވެ.

އެއީ އެއްފުޅައް މަތިން ފުންމައިލި ބަކަރި އަނެއް ފުޅައް މަތިން ވެސް ފުންމާލާނެކަމާއި އެކަކަށް ހަރާންކޯރުވީ މީހަކު އަނެކަކަށް ވެސް ހަރާންކޯރުވާނެ ކަން ހުދު މުއިއްޒުއަށް ވެސް އިވިވަޑައިގެންފާއޮތުމެވެ.

މިހާލަތުގައި ދެންވާނެ ހުރިހާ ގޮތެއް މިހާރު އެވަނީ އެވެ. މި ވެރިކަން ފެށުނުއިރު [ރައީސް މުއިއްޒުއާ އެކު] އޮތް ގާތްގުޅުމާއި އިތުބާރު އޮތް ނަމަ މިކަންކަން މިގޮތަކަށް ނުހިނގާނެ އެވެ. މިހާރު ރަށުތެރޭގައި އިވެނީ އިންޑިއާ ދަތުރަށްފަހު އަބްދުއްރަހީމްގެ ރަސްމީކަން ގެއްލި ނުރަސްމީ ގޭބަންދެއްގައި އަބްދުއްރަހީމްގެ ސިޔާސީ ހަޔާތް ލިޔެވެން ފެށޭނެ އަޑުތަކެވެ.

މިއަދުގެ ސިޔާސީ ދުރުމިން ބަލާލުމުން ރައީސް ޑރ. މުއިއްޒުގެ އިތުބާރު އޮތް މީހަކަށް މަޖިލިސް ރައީސް ކަމުގައި ހުރުން މޮޅު އިތުރެވެ. ރައީސް ޑރ. މުއިއްޒު ގަބޫލުކުރައްވާ ގޮތަކީ ވެސް އެއީ އެވެ. އެހެންވީމަ، އަމިއްލަފުޅަށް އިސްތިއުފާ ނުދެއްވާ ނަމަ، އަބްދުއްރަހީމް މަޖިލީހުގެ ރައީސްކަމުގެ މަގާމުން ވަކިކުރާނެ އެވެ.

މަޖިލީހުގެ ރައީސް މަގާމުން ވަކިކުރުމުގެ އިޖުރާއަތްތައް ބަޔާން ކުރަނީ މަޖިލީހުގެ ގަވައިދުގެ 227 ވަނަ މާއްދާގަ އެވެ. އެގޮތުން މަޖިލީހުގެ ރައީސް މަގާމުން ވަކިކުރަން މައްސަލަ ހުށަހަޅަން ޖެހެނީ މަދުވެގެން 24 މެންބަރުން ސޮއިކޮށް ގަރާރެއް ހުށަހަޅައިގެން ނެވެ.  އެ ގަރާރު މަޖިލީހަށް ލިބޭތޭ ގިނަވެގެން ރަސްމީ ތިން ދުވަސް ތެރޭ 14 ދުވަހުގެ ނޯޓިސް އަމީން އާންމު މެންބަރުންނަށާއި މަޖިލީހުގެ ރައީސަށް ދޭން ޖެހޭނެ އެވެ. އަދި އެ 14 ދުވަސް ދިނުމަށް ފަހު، އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަކަށް އެ ގަރާރު ހުށަހަޅަން ޖެހެ އެވެ.

ޖާހާއި މަގާމަކީ ސުންގަޑި ކަނޑައެޅިފައިވާ ކަންތައްތަކެކެވެ. އަދި ބާރުގެ ތަރަހައިގެ މައްޗަށް ބިނާކޮށް ލިބޭ ލޯތްބާއި އިހުތިރާމާއި ގަދަރަކީވެސް، ފެށުނީއްސުރެ ނިމުމުގެ ސިއްކަ ޖެހިފައިވާ ކަންތައްތަކެކެވެ.

މި ހަގީގަތް ސާފުވާން ދާދި ގާތެވެ. ހާލަތާއި މަންޒަރު ބަދަލު އެބަވެ އެވެ...!