Rayyithunge Baaruge Vaahaka Seupreme Court In Dhekkyma Varah Bodah Joke: Maleeh

ރައްޔިތުންގެ ބާރުގެ ވާހަކަ ސުޕްރީމް ކޯޓުން ދެއްކީމަ ވަރަށް ބޮޑަށް ޖޯކުކަމަށް ޕީޕަލްސް ނެޝަނަލް ޕްރޮންޓުގެ ސެކެރެޓަރީ ޖެނެރަލް މުހައްމަދު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ "ގަޟާއީ އަހަރު 2025" އިފްތިތާހުކުރުމަށް ބެއްވި ހަފްލާގައި އުއްތަމަ ފަނޑިޔާރު މުއުތަސިމް އަދްނާނު ދެއްކެވި ވާހަކަފުޅަކަށް އިޝާރާތްކުރައްވާ އެކްސްގައި ކުރެއްވި ޕޯސްޓެއްގައެވެ.

ޝަރުއީ ދާއިރާގެ "ގަޟާއީ އަހަރު 2025" އިފްތިތާހު ކުރުމުގެ ރަސްމިއްޔާތުގައި އުއްތަމަ ފަނޑިޔާރު ވިދާޅުވީ 2008 ވަނަ އަހަރު ދިވެހިން ލިބިގަތް ގާނޫނުއަސާސީއިން ވަނީ ދައުލަތުގެ ތިން ބާރު ވަކިކުރެވި ބައިނަލްއަގުވާމީ މިންގަނޑުތަކާ އެއްގޮތަށް މުސްތަގިއްލު ފަނޑިޔާރުގެއެއް ގާއިމުކޮށްފައި ކަމަށެވެ.

އެގޮތުން ފުރިހަމަ ގޮތެއްގައި ދައުލަތެއް ހިނގައި ރައްޔިތުންގެ ހައްގު ކަށަވަރު ކުރެވޭނީ ދައުލަތުގައި ހިމެނޭ ހުރިހާ އެންމެން އިހުލާސްތެރިކަމާ އެކު ގާނޫނުގެ ބާރު ނަގަހައްޓައިގެން ކަމަށް އެމަނިކުފާނު ވިދާޅުވިއެވެ.

ގާނޫނުގެ ބާރު ނެގެހެއްޓުމަކީ ދައުލަތުގެ ތިން ބާރުގެ އިތުރުން މުސްތަަގިއްލު ކޮމިޝަންތަކާއި މުސްތަގިއްލު މަގާމުތަކުގައި ތިއްބެވި ބޭފުޅުންގެ މައްޗަށް އޮތް ދުސްތޫރީ ވާޖިބެއްކަމަށާ އަދުލްއިންސާފާއި ރައްޔިތުންގެ ބާރު ކަށަވަރު ކުރުމުގައި ފަނޑިޔާރުން ސާބިތުކަމާ އެކު އެބަ ތިބެން ޖެހޭ ކަމަށްވެސް އުއްތަމަ ފަނޑިޔާރު ވިދާޅުވެފައިވެއެވެ.

އެ ވާހަކަތަކަށް ރައްދުދެއްވާ މަލީހު ވިދާޅުވީ، ރައީސް އަބްދުﷲ ޔާމީންގެ ރިޔާސީ ޓިކެޓް ކަޓުވާލީ ސުޕްރީމް ކޯޓުން ހައްލުނުދީ ހައިކޯޓުގައި ތާށިކޮށްފައި ބޭއްވުމަށް ފަހު ކަމަށެވެ. އަދި އޭގެ ބޭރުންވެސް ހިނގީ ލަދުވެތި ކަންކަންކަމަށް ވިދާޅުވެ މަލީހު ވިދާޅުވީ ފަނޑިޔާރުގެ އިސްލާހުކުރަން އެއްވެސް މަސައްކަތެއް ނުކުރާ ކަމަށެވެ.

ރައްޔިތުންގެ ބާރުގެ ވާހަކަ ސުޕްރީމް ކޯޓުން ދެއްކީމަ ވަރަށް ބޮޑަށް ޖޯކު. ރައީސް ޔާމީންގެ ރިޔާސީ ޓިކެޓް ކަޓުވާލީ ސުޕްރީމް ކޯޓުން ހައްލުނުދީ ހައިކޯޓުގައި ތާށިކޮށްފައި ބާއްވާފަ. އަދި އޭގެ ބޭރުންވެސް ހިނގީ ލަދުވެތި ކަންކަން. ފަނޑިޔާރުގެ އިސްލާހުކުރަން މަސައްކަތް ނުކުރޭ. https://t.co/FsesVbF71F
— Mohamed Maleeh Jamal (@maleehjamal) February 11, 2025

އެހެންކަމުން ރައްޔިތުންގެ ބާރުގެ ވާހަކަ ސުޕްރީމް ކޯޓުން ދެއްކީމަ ވަރަށް ބޮޑަށް ޖޯކަކަށްވާކަމަށް މަލީހު ވިދާޅުވެފައިވެއެވެ.

މަލީހު މިފަދައިން ވިދާޅުވެފައިވާއިރު، 2023 ވަނަ އަހަރުގެ ރިޔާސީ އިންތިޚާބުގައި އެތައް ބަޔަކު ރައީސް ޔާމީނަށް ވޯޓުލާން ނިންމައިގެން ތިބި ތިބުމަށް ހުރަސް އެޅިގެން ދިޔައީ ހައިކޯޓުގައި އޮތް މައްސަލައެއް ނުނިމެނީސް ސުޕްރީމު ކޯޓުން އެކަމަށް ރިއާޔަތްކުރުމެއް ނެތި ރައީސް ޔާމީންގެ ކެންޑިޑެންސީ ބާތިލުކުރުމުންނެވެ. އޭގެ ސަބަބުން އެތައް ރައްޔިތުންގެ ހައްގެއް ގެއްލިގެން ދިޔައެވެ. ރައީސް ޔާމީންގެ މައްސަލަ ބަލާ ހުކުމް ކުރި ފަނޑިޔާރުންގެ ބެންޗުގައި އުއްތަމަ ފަނޑިޔާރު މުއުތަސިމްވެސް އިންނެވިއެވެ.