

ރައީސް ޑރ މުހައްމަދު މުއިއްޒަުގެ ވެރިކަމަކީ ދިވެހިންނަށް ނަފާވެރި ފާގަތި ދުވަސްތަކަކަށް ވާނެކަމުގެ އުއްމީދަކީ ގިނަ ދިވެހިން އުއްމީދު ކުރިކަމެކެވެ.
ދިވެހީންގެ ރާއްޖެއަކީ ތަފާތު ދައްކާ ދިވެހިންގެ ތުންފަތް މައްޗަށް ހިނިތުންވުން ގެނުވާނެ ވެރިކަމަކަށް ވާނެ ކަމަށްވެސް ގިނަ ބަޔަކު ގަބޫލުކުރިއެވެ. އެ ފޮނި އުއްމީދުގައި ރައީސް މުއިއްޒު ވެރިކަމަށް ދިވެހި ރައްޔިތުން އިންތިޚާބުކުރީ 2018 އިން 2023 އަށް ދިވެހިން ދުށް ބަނަ، މާޔޫސް ދުވަސްތަކަށް އަލްވަދާއު ކިޔުމުގެ ނުހަނު ފޮނި އުއްމީދާއެކުއެވެ.
އެމްޑީޕީއަށް ވެރިކަން ހަވާލުކުރި ކޮންމެ ފަހަރަކު ރައްޔިތުންގެ ފައިސާ ކޮޅު ދަވާލާ ޚާޒާނާ ދޮވެ ސާފުކުރުމަށް ފަހު ވެރިން ބަޗާތީ އެކަންކަން ނިމުމަކަށް ގެނެސް ރައްޔިތުންގެ ފައިސާއާ ހައްގުތަކަށް އަމާނާތްތެރިވާނެ މީހަކު އިންތިޚާބު ކުރުމުގެ ނިޔަތުގައި ރައީސް މުއިއްޒު ދިވެހިންގެ ވެރިކަމުގެ ތަޚުތަށް ރެނދަލިކުރިއެވެ.
ނަމަވެސް މާކަ ގިނަ ދުވަސްތަކެއް ނުވެ ދިވެހީންނަށް ދިމާވީ ނުހަނު ހިތްދަތިކަމާ ނުތަނަވަސްކަމެވެ. ވެރިކަމަށް އަހަރު ނުފުރެނީސް އިވެން ފެށީ ވެރިންގެ ތެރޭގައި ބޮޑެތި މާސިންގާ ވައްކަންތައް ހިންގަން ފެށި ވާހަކައެވެ. ރައްޔިތުން ގަވާލުކުރި އަމާނާތަށް ޖެހިލުމެއްނެތި ޚިޔާނާތްތެރިވެ ރައްޔިތުންގެ ފައިސާކޮޅުން ވައްކަންކޮށް އޭގެ ފަހުން ރައްޔިތުންގެ ޒާތީ މައުލޫމާތުންނާ ރައްޔިތުންގެ ބޭސްފަރުވާއާ އިޖްތިމާއީ ޚަރަދުތަކަށް ހުރި ފައިސާކޮޅުންވެސް ވައްކަންކުރީއެވެ. ވާނީ ވެސް އެހެންތާއެވެ. ވެރިއަކަށް އިންތިޚާބު ކުރެވުނީ ޚިޔާނާތްތެރިއެއްވިއްޔާއެވެ.
ވެރިކަމަށް އަހަރަކާ ތިން މަސްވާން ގާތްވީއިރު ރައްޔިތުންގެ އިތުބާރު މުޅި ދައުލަތާ ވެރިންގެ މައްޗަށް ވެސް ގެއްލިއްޖެއެވެ. ގެއްލިއްޖެ އިތުބާރެއް ހޯދުމަކީ ފޫނެއް ފާއްޔަކަށް ފެން ފުރުންކަމަށް ވާއިރު، މިއަދު ވެރިންނާ ސަރުކާރު ޕްރޮމޯޓުކުރާ ކުދިން ވެސް ވަރަށް އަވަދިނެތި އުޅެނީ މަސްދަޅުތަކެއް ބެހުމުގައެވެ.
ކޮންމެ ގޯސް ނިންމުމެއް ނިންމުމުން ރައްޔިތުންގެ ރުޅިގަނޑު ފަޅައިގެން ގޮސް އޮބި ނޯންނަ ހިސާބަށް ދިއުމުން ކުރިން ބުނި އެތި ކެންސަލްކޮށް އުނބަށް ޖަހަމުން އެއް އަހަރު ކަޑައްތުކުރުމަށް ފަހު މިހާރު މިއުޅެނީ ސަރުކާރުގެ ހެޔޮ ފުޅުކަން ދައްކަން މަސްދަޅުތަކެއް ރޯދައަށް ބަހަންށޯލައެވެ. މަސްދަޅު ބެހުން އޭގެ ޒާތުގައި ގޯހެއް ނޫނެވެ. ނަމަވެސް މީގައިވެސް އޮޅުވާލުންތަކެއް ހުރުމުން ގޯހެވެ. އެހެނީ އެ މަސްދަޅަކީ ސީދާ ރައީސް މީހާގެ ޖީބުން ދެއްވާ އެއްޗެކޭ ބުނާއިރު، ރައިސް މީހާގެ ޖީބުން މިއަދު ރައްޔިތުންނަށް އެއްޗެއް ދެއްވޭނީ ރައީސް މީހާއަށް ލިބޭ މުސާރައަކުންނެވެ. އެއީ ރައީސްކަމުގެ މަގާމުގައި ހުންނަ މީހަކަށް އެހެން އެއްވެސް ގޮތަކަށް ފައިސާ ހޯދޭނެ އަދި ލިބޭނެ ގޮތެއްވެސް އޮވެގެން ނުވާނެތީއެވެ. އެހެންކަމުން ރައީސް މީހާގެ ޖީބުން ދޭ މަސްދަޅު ކޭސްތަކެއް ކަަމަށްބުނާއިރު އެއީ ރައްޔިތު މީހާގެ ޓެކްސް ފައިސާއިން ދޭ މުސާރައެވެ. ވެން މަސް ވެނަށް ކާންދެނީތާއެވެ.
ދެން އޮތް ވާހަކައަކީ ރައްޔިތުންނަށް މަސްދަޅު ކޭސް ބަހާ މެޑަލް ޖަހަން މަސައްކަތް ކުރަމުންދާއިރު ރައްޔިތުންގެ ޖީބުން ކުރަންވާ އެހެނިހެން ޚަރަދުތައް އިންތިހާއަށް ބޮޑެވެ. ކަރަންޓު ބިލު އިންތިހާއަށް ބޮޑެވެ. ފެން ބިލު އެންމެ ބިލެއް އޮތަސް މިހާރު ފެން ކަނޑާލަނީއެވެ. ކުރިއަށް ރޯދަ މަހެއް އޮތްއިރު ތަކެއްޗާ ޚިދުމަތުގެ އަގު އަތުފަތު ނުޖެހި ހުރީ މެދު އުޑުގައެވެ. މިއިން ކަމަކަށް ހައްލެއް ގެނެސް ނުދެއްވާ ރައްޔިތުންނަށް މަސްދަޅު ބެހިޔަކަށް އެހެންވީމާ އަދި ކަމަކު ނުދާނެއެވެ.
ރައްޔިތުންގެ ބައިތުލްމާލު އެއްކޮށް ބަނޑުއަޅައިގެން ތިބެ އަދި ތިޔަހެން ދިއްކޮށްލާ މަސްދަޅު ކޭހަކުން ރައްޔިތުން ހެއްލިދާނެ ކަމަށް ގަބޫލުކުރުމަކީ ސިޔާސީ ނުހަނު ކޮށި ވިސްނުމެކެވެ. ރައްޔިތުންނަށް މަސްދަޅު ކޭސް ދިނުމަށް ފަހު ތަމެން އެ ރައްޔިތުންގެ ބައިތުލް މާލު އެއްކޮށް ހުސްކޮށްލަންދެން ބަލަން އެ ރައްޔިތުން ނުތިބޭނެކަން ހަނދާ ބަހައްޓަންވާނެއެވެ.
ވެރިކަމަށް އަހަރު ފުރި ތިން މަސް ފާއިތުވާއިރު މުޅި ބައިތުލްމާލު ދަމައިގަނެ ވެރިންގެ ޖީބުތައް ބޮޑުކުރުމަށް ފަހު ރައްޔިތުންނަށް ދޭން ހަމަ ހައްގު މިންވަރަކީ މަސްދަޅު ކޭހެއް ތޯއެވެ؟ ރައްޔިތުންނަށް މަސްދަލޫ ހެއްޔެވެ؟ ވެރިންނަށް ބައިތުލްމާލު ހެއްޔެވެ؟