ގައުމު ހިންގަން ރައީސް ޑރ. މުއިއްޒު އަށް ހައްދުފަހަނައަޅާ ވަރަށް ބާރުތައް ދިނުމަށް، ފޭދޫ ދެކުނު ދާއިރާގެ ޕީއެންސީ މެންބަރު އިބްރާހިމް ދީދީ (އައިބީ) ގޮވާލައްވައިފި އެވެ.

ގޭންގު ކުށްތައް ހުއްޓުވަން ސަރުކާރުން މަޖިލީހަށް ހުށަހަޅާފައިވާ ބިލަށް ބަހުސްކުރައްވަމުން ދީދީ ވިދާޅުވީ، ގާނޫނުތައް ހަރުކަށިކޮށްގެން ބާރުތައް ވަކި މީހެއްގެ އަތްމައްޗަށް ގެނައި ނަމަވެސް ލިބޭ ބާރުތަކުގެ ނަހަމަ ފައިދާ ނެގިޔަދިނުން މަޖިލީހުން ހުއްޓުވާނެ ކަމަށެވެ. ރައީސްއަށް ބާރުތައް ދިނުމަށް ދީދީ ގޮވާލެއްވީ އެއަށްފަހު އެވެ.

ޗައިނާ މިސާލެއްގެ ގޮތުން ނަންގަވާ އައިބީ ވިދާޅުވީ އެ ފަދަ ހުރިހާ ބާރެއް ރައީސަށް ދީފައިވުމުން ކުށް މަދު ގައުމެއްގެ ގޮތުގައި ޗައިނާ އޮންނަ ކަމަށެވެ.

ހުރިހާ ބާރު ދީގެންވެސް ރައްޔިތުން ބޭނުންވަނީ ތަރައްގީ ކަމަށް އިބްރާހިމް ދީދީ ވިދާޅުވި އެވެ.