ނުރައްކާތެރި ކުށްތަކަށް އަރައިގަންނަކަމަށް ތުހުމަތުކުރެވޭ މީހަކު ފުލުހުންގެ ބެލުމުގެ ދަށަށް ގެނެސްފި އެވެ.
މާރާމާރީ އަދި ނުރައްކާތެރި ކުށްތަކަށް އަރައިގަތުމުގައި ބައިވެރިވާ ކަމަށް ތުހުމަތު ކުރެވޭ އުމުރުން 31 އަހަރުގެ ދިވެހި އެ ފިރިހެން މީހާ އެއާޕޯޓުން މިއަދު ހައްޔަރުކުރިކަން ފުލުހުން ކަށަވަރުކޮށްދެ އެވެ.
މާފަންނުގައި އޮޕަރޭޓްކުރާ ގޭންގަކަށް ނިސްބަތްވާ އަދި ކުށުގެ ރެކޯޑުތަކަށް ބަލައި ނުރައްކާތެރި ކުށްވެރިއެއް ކަމަށް ފުލުހުން ނިންމާފައިވާ ހުސައިން އަރީޝް އެއާޕޯޓުން ފުލުހުންގެ ބެލުމުގެ ދަށަށް މިހާރު ވަނީ ގެންގޮސްފަ އެވެ.
ފުލުހުން ބުނިގޮތުގައި، އެއީ ނުރައްކާތެރި ކުށްތައް ކުރުމުގައި މާލޭގައި އިސްކޮށް ހަރަކާތްތެރިވާ މީހެކެވެ.
އޭނާ ހައްޔަރުކުރި މައްސަލާގައި ފުލުހުން އަދި ރަސްމީކޮށް ވަކި އެއްޗެއް ނުބުނެ އެވެ.
މާލޭގައި މިފަހުން ހިނގި މާރާމާރީތަކުގައި މަރުތޭލު ފަދަ އާލަތްތައް ބޭނުންކޮށްފައިވެ އެވެ. އޭގެ ތެރެއިން އެއް މާރާމާރީއަކީ، މި މަހު 4 ވަނަ ދުވަހު އައިޖީއެމްއެޗު ކައިރީ ހުރި މީހަކަށް ސައިކަލެއްގައި ދިޔަ މީހެއްގެ ބޮލުގައި މަރުތޭލަކުން ޖެހި މާރާމާރީ އެވެ. އެ މާރާމާރީއާ އޭނާއާ ގުޅުން އޮތް ކަމަށް ތުހުމަތު ކުރެވެ އެވެ.
މި މާރާމާރީތަކާ ގުޅިގެން ފުލުހުން މި ހަފްތާ ތެރޭ ބައެއް އެހެން މީހުން ވެސް ހައްޔަރުކޮށްފައިވެ އެވެ.
