Majileehugai Thibee Rayyithunge Mandhoobunkameh Miadhu Rayyithun Gabooleh Nukurey: Raees Yameen

މަޖިލީހުގައި ތިބީ ރައްޔިތުންގެ މަންދޫބުންކަމެއް މިއަދު ރައްޔިތުން ގަބޫލު ނުކުރާކަމަށް ރައީސް އަބްދުﷲ ޔާމީން އަބްދުލްގައްޔޫން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޕީޕަލްސް ނޭޝަނަލް ފްރަންޓް ޕީއެންއެފްގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމކުންނެވެ.

ސަރުކާރުންދަނީ މިއަދު އެކި ނަންނަމުގައި ވިޔަފާރި ކުރަމުންކަމަށް ރައީސް ޔާމީންވަނީ ވިދާޅުވެފައެވެ.

ދައުލަތުންވަނީ ދާދި ފަހުން ދުންފަތު އިސްތިއުމާލު ކެފޭ ތަކުގައި އާއި ރެސްޓޯރަންޓްތަކުގައި އޭގެ ބޭނުން ކުރެވޭނީ ހާއްސަ ހުއްދައެއް ނެގުމަށްފަހުކަމަށް އިއުލާނުކޮށްފައެވެ. އަދި އެ ހުއްދަ ލިބޭނީ 10،000 ރުފިޔާއަށްކަންވެސްވަނީ ހާމަކޮށްފައެވެ. މީގެ އިތުރުން ޓެކްސީ ލައިނެއް އުފައްދާ ހިންގުން އެމްޓީސީސީ އާއި ހަވާލު ކުރިކަންވެސް ފާހަގަ ކޮށްލެވެއެވެ.

މިކަންކަމަށް ރިއާޔަތް ކުރައްވާ ރައީސް ޔާމީންވަނީ ސަރުކާރުންދަނީ އެކި ބަހަނާތައް ދެއްކުމަށްފަހު ވިޔަފާރި ކުރަމުންކަން ފާހަގަކޮށްފައެވެ. އަދި ކުރާ ކަންތައްތައް ރައްޔިތުންނަށް ޖަސްޓިފައި ނުކުރެވޭކަމަށްވެސް ވަނީ ވިދާޅުވެފައެވެ.

ރައްޔިތުންނަށް މިއަދު ނެތޭ އެމީހުންގެ މަންދޫބުން ކައިރިއަށް ދެވޭކަށް. އެއީ ދިމްޔާތުން އޮޅުކޮށްފައި ތިބި ކުދިން ކޮޅެކޭ. އެހެންވީމަ ނެތޭ މަޖިލީހަށް މި މައްސަލަ ވައްދައިގެން އެޖެންޑާ ކުރެވޭކަށްވެސް. އަބްދުއްރާހީމްވެސް މުއިއްޒު ކޯފާވި ފަހުން މަސައްކަތް ކުރަނީ އިތުރަށް ގާތް ވެވޭތޯ. މަޖިލީހުގައި ތިބީ ރައްޔިތުންގެ މަންދޫބުންކަމެއް މިއަދު ރައްޔިތުން ގަބޫލެއް ނުކުރޭ.

- ރައީސް ޔާމީން

މިއީ ރައްޔިތުން އާމްދަނީ ހޯދާ ގޮތް ގޮތް ނައްތާލާއި ބިކަކޮށްލަން ދައުލަތުން ކުރާކަމެއްގެ ގޮތުގައި ރައީސް ޔާމިންވަނީ ސިފަ ކުރައްވާފައެވެ.

އަދި ދައުލަތުން މިއަދު މަސައްކަތް ކުރަނީ ރައްޔިތުން އަޅުވެތި ކުރަން ކަމަށް ރައީސް ޔާމީން ވިދާޅުވެ، އެކަމާއި ގުޅިގެންވަނި ކަންބޮޑުވުން ފާޅު ކުރައްވާފައެވެ.

މިފަދަ ކަންކަމަކި ޕީއެންއެފުން ގަބޫލު ކުރާ ކަންކަން ނޫން ކަމާއި އެކަން ދައުލަތުން ކުރާތީ ނަފްރަތު ކުރާކަމަށްވެސް ރައީސް ޔާމީންވަނީ ވިދާޅުވެފައެވެ. އަދި ކުރީގެ ރައީސް އިބްރާހީމް މުހައްމަދު ސޯލިހުވެސް ރައްޔިތުންނަށް މިފަދަ އުނދަގޫތައް ނުކުރާކަންވެސްވަނީ ފާހަގަ ކުރައްވާފައެވެ.