Majilis Memberunge Dhulaa Nafsu Vanee Raees Muizzah Vikkaafa: Dr Jameel

ރައްޔިތުންގެ މަޖިލީހުގެ މެމްބަރުން މިއަދު ތިބީ އަމިއްލަ ނަފްސާ ދުލުގެ ބާރު ވެސް ރައީސް ޑރ މުހައްމަދު މުއިއްޒަށް ވިއްކައިގެން ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ "ޗެނަލް13"ގެ ނިއުސް ޓޯކު ޕްރޮގްރާމުގައި ވާހަކަފުޅު ދައްކަވަމުންނެވެ.

ގައުމުގެ މިސްރާބު ދަތުރުކުރަމުން ދާ މަގަށް ނަޒަރު ހިންގަވާލައްވަމުން ޑރ ޖަމީލު ވިދާޅުވީ، މިއަދު ރައްޔިތުންގެ ހައްގުގައި ވަކާލާތު ކުރުމުގެ ބާރުވެސް ރައީސް މުއިއްޒު ވަނީ މަޖިލިސް މެމްބަރުންގެ ކިބައިގެން ނިގުޅައިގެންފައި ކަމަށާ މަޖިލިސް މެމްބަރުންގެ ބާރުވެސް އެމަނިކުފާނުގެ އަތްޕުޅަށް ނަގާފައި ކަމަށެވެ. އެގޮތުން ރައްޔިތުންގެ ހައްގުގައި މިއަދު މަޖިލިސް މެމްބަރުންނަށް ކުރެވޭނެ މަސައްކަތެއްވެސް އަދި ބުނެވޭނެ ބަހެއްވެސް ނޯންނާނެ ކަމަށް ޑރ ޖަމީލު ވިދާޅުވިއެވެ.

މުއިއްޒު ބޭނުންވީމަ އެދިޔަ ގޮތަށް ގޮސް، ރައްޔިތުންގެ މަޖިލިސް މެމްބަރުން އެތިބީ އެ ބޭފުޅުންގެ ދާއިރާގެ ރައްޔިތުންގެ ބަސް ނުބުނެވޭނެ ގޮތަށް އެ ބޭފުޅުންގެ ދުލާ ނަފްސު މުއިއްޒަށް ވިއްކާފައި. އެ ބޭފުޅުންނަކީ މިއަދު ރައްޔިތުންގެ ހައްގުގައި ވަކާލާތު ކުރެވޭނެ ބޭފުޅުންނެއް ނޫން. އެ ބޭފުޅުންނަށް ހަމައެކަނި ކުރެވޭނީ މުއިއްޒު ވިދާޅުވާ ގޮތަށް. އެއީ އަކީ ގާނޫނު އަސާސީ ދެކޭ ގޮތެއް ނޫން. އެއަށް ފަހު މިއަދު ގޮސްލާފަ ޕާޓީތެރޭގެ ހުރިހާ ބާރެއް މުއިއްޒަށޭ އެނެގީ. ގައުމެއްގެ ހައިސިއްޔަތުން ބަލާނަމަ މިއަދު އެހިފާފަ ހުރި މިސްރާބަކީ ޑޭންޖަރަސް މިސްރާބެއް. ނުރައްކަލުން ފުރިގެންވާ ރަނގަބީލު އެ ޖަަހަނީ. އެއީ ނޯމަލްކޮށް ވިސްނާލާނަމަ މީހެއްގެ ސިކުނޑި އެ ފެންވަރަކަށް ދާކަށް ނުޖެހޭނެ. އެއީ ޕާޓި އެކަންޏެއް ނޫނޭ. މިއަދު ބަލާ ރައްޔިތުންގެ މަޖިލީހުގައި ތަހައްމަލެއް ނުކުރެވުނު މެމްބަރުން މެމްބަރުންގެ ގޮތުގައި ތިބެގެން ދާއިރާގެ އަޑު އުފުލާ ގޮތަށް ތިބޭކަށް. މިއަދު ނުކުރެވޭނެ އެ މަސައްކަތެއް.

ޑރ ޖަމީލު ވިދާޅުވީ، މިއަދު ގައުމު ދަތުރުކުރަމުން ދަނީ ފުލް ގިއަރުގައި ޚުދުމުހުތާރު ވެރިކަމަކާ ދިމާއަށް ކަމަށާ އެކަން ހުއްޓުވުމުގައިވެސް ރައްޔިތުންނަށް މަދަދުވެރިވާން ތިބި މެމްބަރުން ތިބީ ކުޑަ ކަކުލުން ވާގި ދޫވެ ރައީސް މުއިއްޒު ކުރިމަތީ ގޮތް ހުސްވެފައި ކަމަށެވެ.