ރާއްޖޭގެ މަސްވެރިން ތިބީ ހާލުގައި ޖެހުމާއި ގާތުގައި ކަމަށާއި އެހެންކަމުން ސަރުކާރުން ދޭންޖެހޭ ފައިސާ ވީ އެންމެ އަވަހަކަށް ހަވާލުކޮށްދިނުމަށް ގޮވާލާ ކުއްލި މައްސަލައެއް ހުށަހަޅައިފިއެވެ.

މައްސަލަ ހުށަހެޅުއްވީ އައްޑޫ މީދޫ ދާއިރާގެ މެންބަރު ރޮޒައިނާ އާދަމްއެވެ.

ދިވެހިރާއްޖޭގައި މަސްވެރިކަން ކުރާ ފަރާތްތަކަށް ފައިސާ ނުދެވި ލަސްވުމުގެ ސަަބަބުން ދަތިތަކެއް ކުރިމަތިވަމުންދާކަމަށާއި އެކަން ހައްލުކުރުމަށްޓަކައި މަސްވެރިންނަށް ދޭންޖެހޭ ފައިސާ ދިނުމުގެ މަސައްކަތްތައް ވީ އެންމެ އަވަހަކަށް ނިންމާލުމަށް ގިނަ ފަރާތްތަކަކުން ގޮވާލަމުންދަނިކޮށް ސަރުކާރު ޖަވާބުދާރީ ކުރުވުމަށް ރޮޒެއިނާ ހުށަހެޅި ގަރާރުގައި ވަނީ މަސައްކަތަށް ފައިސާ ނުލިބި ދެ މަސްދުވަހަށްވުރެ ދިގު މުއްދަތެއް ވެފައިވާކަމަށެވެ. އަދި އެކަމުގެ ސަބަބުން ރައްޔިތުންނަށް ބޮޑެތި ދަތިތައް ކުރިމަތިވަމުންދާތީ ސަރުކާރުން އެ މަސައްކަތްތައް އަވަސްކޮށްދިނުމަށް ގޮވާލައްވާކަމަށެވެ.

ރޮޒައިނާ ވިދާޅުވީ މަސްވެރިކަމާއި ބޭހޭ ގާނޫނުގެ މަގުސަދުތަކުގެ ތެރޭގައި މަސްވެރިންނަށް އެ މަސައްކަތްތަކުން އެކަށީގެންވާ ނަފާއެއް ލިބިގެންދާކަން ކަށަވަރުކުރުން ހިމެނޭކަމަށްވާއިރު، ރައީސް ޑރ މުހައްމަދު މުއިއްޒު މަސްވެރިންނަށް ވެފައިވާ ވައުދުތަކުގެ ތެރޭގައި 48 ގަޑިއިރުގެ ތެރޭގައި ފައިސާ ލިބޭނެ އިންތިޒާމުތައް ހަމަޖައްސައިދިނުން ހިމެނޭކަމަށްވެސް އޭނާ ފާހަގަކުރެއްވިއެވެ.

މަސްވެރިންނަކީ ބުރަ މަސައްކަތްތަކެއް ކުރާ ބައެއްކަމަށްވާއިރު، އެ މީހުންނަށް ހައްގުވާ ފައިސާ އެމީހުންނަށް ލިބޭނެ އިންތިޒާމުތައް ވެފައިވާ ވައުދާއި އެއް ގޮތަށް ހަމަޖައްސައިދިނުމަކީ ސަރުކާރުގެ ޒިންމާއެއް ކަން ފާހަގަކޮށް އެެ މައްސަލައިގައި އިތުރަށް ރޮޒައިނާ ވިދާޅުވީ، މިހާރު ފައިސާ ނުލިބި ދިގު މުއްދަތެއް ވެފައިވާއިރު، ރަމަޟާން މަސް ވެސް އިންތިހާއަށް ގާތްވެފައިވާއިރު އެކަމުގެ ދަތިތައްވެސް ކުރިމަތިވެގެންދާނެ ކަމަށާ އާއިލާތަކުގެ ދެމެހެއްޓެނިވިކަން ބިނާވަނީ މަހަށް ގޮސް ހޯދާ އާމްދަނީގެ މައްޗަށް ކަމަށެވެ. ރޮޒައިނާ ވިދާޅުވީ، މަސްވެރިންނާއި އާއިލާތައްވެސް ތިބީ ހާލުގައި ޖެހުމާއި ގާތުގައިކަމަށެވެ.

އޭނާ ވިދާޅުވީ، މަސްވެރިންނާއި އާއިލާތަކަށް ޒަރޫރީ ބޭނުންތައް ފުއްދުމުގައި ދަތިތައް ދިމާވެ ދުވަސްތަކެއްވެސް ވެފައިވާކަން މަސްވެރިން ހިއްސާކުރަމުންދާކަމަށެވެ. އޭނާ ވިދާޅުވީ، މިކަމުގެ ސަބަބުން މަސްވެރިންނަށް ބޮޑެތި ނޭދެވޭ އަސަރުތަކެއް ކުރަމުންދާކަމަށްވުމުން އަވަސް ފިޔަވަޅުތަކެއް އަޅައި މަސްވެރިންނަށް ހައްގު ފައިސާ ހަވާލުކޮށްދިނުމަށް ސަރުކާރަށް ގޮވާލައްވާކަމަށެވެ.