2023 ވަނަ އަހަރާ އަޅާބަލާއިރު އެމްޓީސީސީއަށް ލިބުނު އާމްދަނީ 2024 ވަނަ އަހަރު ދަށަށް ގޮސްފި އެވެ.

އެމްޓީސީސީއަށް މިދިޔަ އަހަރުގެ އާމްދަނީގެ ގޮތުގައި ލިބުނީ 2.1 ބިލިއަން ރުފިޔާ އެވެ. މިއީ 2023 ވަނަ އަހަރާ އަޅާބަލާއިރު 32.1 އިންސައްތަ ދަށް އަދަދެކެވެ. 2023 ވަނަ އަހަރު އެ ކުންފުންޏަށް 3.2 ބިލިޔަން ރުފިޔާގެ އާމްދަނީ ލިބިފައިވެ އެވެ.

މިދިޔަ އަހަރު ނިމުނުއިރު އެމްޓީސީސީ ހިންގައިގެން ލިބުނު އާމްދަނީވެސް ވަނީ 37.2 އިންސައްތަ ދަށްވެފަ އެވެ. މިދިޔަ އަހަރު އެމްޓީސީސީއަށް ހިންގުމުގެ އާމްދަނީގެ ގޮތުގައި 211.2 މިލިއަން ރުފިޔާ ލިބިފައިވާއިރު 2023 ވަނަ އަހަރު އެ ދާއިރާ އިން ލިބުނީ 336.7 މިލިއަން ރުފިޔާ އެވެ.

ފާއިތުވި އަހަރު ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެމްޓީސީސީއަށް ލިބިފައިވަނީ 84.2 މިލިއަން ރުފިޔާ އެވެ. ޓެކުހަށް ކެނޑުމުގެ ކުރިން ލިބުނު ފައިދާއަކީ 99.1 މިލިއަން ރުފިޔާ އެވެ. މިއީ 2023 އަހަރާ އަޅާބަލާއިރު 41 އިންސައްތަ ދަށް އަދަދެކެވެ.

އެމްޓީސީސީގެ މާލީ ރިޕޯޓުގައިވާ ގޮތުން މިދިޔަ އަހަރުގެ ފަހު ކުއާޓަރުގައި އެކުންފުންޏަށް ލިބިފައިވަނީ 418.2 މިލިޔަން ރުފިޔާގެ އާމްދަނީއެކެވެ. މިއީ މިދިޔަ އަހަރުގެ ތިންވަނަ ކުއާޓަރުގައި ލިބުނު 587.1 މިލިޔަން ރުފިޔާ އަޅާ ބަލާއިރު 28.8 އިންސައްތަ ދަށް އަދަދެކެވެ.

ހަތަރުވަނަ ކުއާޓަރުގައި އެމްޓީސީސީއަށް ކުންފުނި ހިންގައިގެން ލިބިފައިވަނީ 177.5 މިލިޔަން ރުފިޔާއެވެ. ތިންވަނަ ކުއާޓަރުގައި އެ ކުންފުނި ހިންގައިގެން ލިބިފައިވަނީ 12.7 މިލިޔަން ރުފިޔާއެވެ.

އާމްދަނީ ދަށްވުމާއި އެކު، މިދިޔަ އަހަރުގެ ފަހު ކުއާޓަރުގައި އެމްޓީސީސީއަށް ޓެކުހަށް ކެނޑުމަށްފަހު ސާފު ފައިދާގެ ގޮތުގައި ލިބިފައިވަނީ 151.3 މިލިޔަން ރުފިޔާ އެވެ.