ދައުލަތުގެ މީޑިއާ (ޕީއެސްއެމް)ގެ ކުރީގެ ފައިނޭންސް ޑިރެކްޓަރު، އަހުމަދު ހަނީފް އޭނާގެ އަމިއްލަ ދަރިއެއްގެ އެކައުންޓަށް މިލިއަނަކަށްވުރެ ގިނަ ރުފިޔާ އެކި ފަހަރު މަތިން ޖަމާކޮށްފައިވާކަން ހާމަވީ އޮޑިޓު އޮފީހުން އާންމުކުރި އޮޑިޓު ރިޕޯޓުންނެވެ.

ހަނީފް އަކީ ގިނަ އަހަރުތަކެން ވަންދެން ޕީއެސްއެމްގައި މަސައްކަތް ކޮށްފައިވާ ފަރާތެކެވެ. މީނާގެ ހިޔާނާތުގެ މައްސަލަތައް އަބަދުވެސް ޕީއެސްއެމްގެ ތެރެއިން ހުރީ އިވިއިވި އެވެ. ޕީއެސްއެމްގެ މެނޭޖިން ޑިރެކްޓަރުގެ މަގާމުގައި ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ހުންނެވިއިރު ލިޔެކިޔުން ނެތި އެ ކުންފުނިން ކުރުވި ބައެއް މަސައްކަތްތަކުގެ ބުގުލުގައި ހުންނެވި އެކަކީ ހަނީފް ކަމަށް ޕީއެސްއެމްގެ އެތެރޭގެ މަސްދަރުތަކުން ޔަގީންކޮށްދެ އެވެ. އަދި ހަލީލް ޕީއެސްއެމް ހިންގުމަށް ހަވާލުވާ ކޮންމެ ފަހަރަކު ހަނީފް ހުދު ފިނިފެންމަލެއްހެން ފޮޅިލާ ކަމަށް ޕީއެސްއެމްގެ އެތެރޭގެ މަސްދަރުތަކުން ސިފަކުރެ އެވެ.

ހަނީފްގެ ފައިނޭންސް ކަމުގައި ޕްރޮކިއުމެންޓް އުސޫލާ ހިލާފަށް ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލުގެ ބެލެނިވެރިކަމުގައި ގިނަ ސަކަރާތްތަކެއް ޖެހުމުގެ ސަބަބުން ކުންފުނި އޮތީ ވިޔަފާރިވެރިންނަށް ދަރާފަ އެވެ. ގިނަ މަސައްކަތެއް ޕީއެސްއެމްއިން ކުރުވާފައި އޮތީ އެ ކުންފުނީގެ ޕްރޮކިއުމެންޓް އުސޫލާ ހިލާފަށް ކަމަށް އެކުންފުންޏާއި ދެކޮޅަށް ކޯޓުތަކުގައި ނިމިފައިހުރި މައްސަލަތަކުން ސާފުވެ އެވެ. އަދި މަސައްކަތް ހަވާލު ކުރިކަމުގެ އަދި ނިންމިކަމުގެ ލިޔެކިޔުމެއް ވެސް ޕީއެސްއެމްއަކު ނެތެވެ.

މި ފަދަ ގިނަ މައްސަލަތަކެއް ފެންމަތިވެ މީޑިއާގެ ސަމާލުކަމަށް އައީ ޕީއެސްއެމްގެ އިންޓާނަލް އޮޑިޓް ޑިޕާޓްމަންޓު ފަޅާއަރުވާލި 100 މިލިއަން ރުފިޔާގެ ކޮރަޕްޝަނުގެ މައްސަލަ އިންނެވެ. ޕީއެސްއެމްގެ ހަޔާތުގައި ވެސް އެންމެ ފުރަތަމަ ހެދުނު އިންޓާނަލް އޮޑިޓްތަކުން ފެންނަން ހުރީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލުގެ ބެލެނިވެރިކަމުގައި ހިންގައިފަ ހުރި ބޮޑުތި ކޮރަޕްޝަން ހިމެނޭ މައްސަލަތަކެވެ. މިކަންކަމުގެ މޭސްތިރިންގެ ތެރޭގައި ޕީއެސްއެމްގެ ކުރީގެ ފައިނޭންސް ޑިރެކްޓަރު، އަހުމަދު ހަނީފް އާއި މިހާރުގެ ވެސް އެކުންފުނީގެ ވެރިންގެ ގޮތުގައި ތިއްބެވި ބައެއް ބޭފުޅުން ހިމެނެ އެވެ. އަދި މި ދެންނެވި އިންޓާނަލް އޮޑިޓް ރިޕޯޓްތަކުން "ޕީއެސްއެމް ވަގުން" ވަރަށް ސާފުކޮށް ތިލަވެ އެވެ.

މި މައްސަލަ ގަނޑު ފެންމަތިވެ ޕީއެސްއެމްގެ އެހާރާއި މިހާރުގެ ވެރިން ފަލީހަތްވެ މައްސަލަ ރައްޔިތުންގެ މަޖިލީހާއި މިނިވަން އެހެން އިދާރާތަކުން ބަލަން ފެށުމުން ޕީއެސްއެމް އިން އިންޓާނަލް އޮޑިޓަރު ވަޒީފާއިންވަކިކޮށް އިންޓާނަލް އޮޑިޓް ޑިޕާޓްމަންޓު އުވާލި އެވެ. މި ކަމުގެ އަޑީގައި ހުންނެވީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލުގެ "ފްރެންޑް" ޕީއެސްއެމްގެ ކުރީގެ ޗެއާމަން އިބްރާހިމް ހިލްމީ އެވެ. ހިލްމީއަކީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު އާއިއެކު ޕީއެސްއެމް ބޯޑުގައި ގިނަ ދުވަސްތަކެއް މަސައްކަތް ކުރެއްވި މީހެކެވެ.

އޮޓިޑް ޑިޕާޓްމަންޓުގެ ކުރީގެ ޗީފް އޮޑިޓަރު އަހުމަދު ފަޒީލް މީޑިއާ އަށް ކުރިން ދެއްވި އިންޓަވިއުތަކުގައި ވިދާޅުވެފައިވަނީ އޮޑިޓް ޑިޕާޓްމަންޓު އުވާލީ އޮޑިޓްތަކުން ފާހަގަވި މެނޭޖެމަންޓުގެ ކޮރަޕްޝަންގެ މައްސަލަތަކުގައި ޝާމިލުވާ މީހުންނަށް ފިޔަވަޅު ނާޅަން ކަމަށެވެ. ފަޒީލް ވިދާޅުވީ ތައްޔާރު ކުރި 14 ރިޕޯޓުގެ ތެރެއިން 10 ރިޕޯޓު، ޑިރެކްޓަރުންގެ ބޯޑުން ބަލައި، ފާހަގަކުރެވުނު މައްސަލަތުގައި ޝާމިލުވާ މީހުންނަށް ފިޔަވަޅު އަޅަން ބޯޑުން ނިންމާފައިވާ ކަމަށެވެ. ނަމަވެސް "ބާރު ގަދަ" ބައެއްގެ ނުފޫޒާއި ބޯޑަށް އައި ކުއްލި ބަދަލާއިއެކު މައްސަލަތައް މަޑުޖެހި އިންޓާނަލް އޮޓިޑް ހިންގުމަށް ހުރަސް އެޅި ކަމަށެވެ.

ކޮންމެ އަކަސް ޕީއެސްއެމްގެ ކުރީގެ އިންޓާނަލް އޮޑިޓް ރިޕޯޓްތަކުން ތިލަވަމުންދިޔަ ކޮރަޕްޝަނުގެ ގިނަ މައްސަލަތަކަށް ބާރު ލިބުނީ އޮޑިޓް އޮފީހުން އާންމުކުރި އޮޑިޓު ރިޕޯޓުންނެވެ. އެގޮތުން ޑޮލަރު ގަތުމުގެ ނަމުގައި ޕީއެސްއެމްގެ ކުރީގެ ފައިނޭންސް ޑިރެކްޓަރު، އޭނާގެ އަމިއްލަ ދަރިއެއްގެ އެކައުންޓަށް ވެސް މިލިއަނަކަށްވުރެ ގިނަ ރުފިޔާ އެކި ފަހަރު މަތިން ޖަމާކޮށްފައިވާ ކަން ހާމަވި އެވެ.

މީގެ އިތުރުން އޮޑިޓުގައިވާ ގޮތުން ޑޮލަރު ގަތުމަށް 2020ވަނަ އަހަރުން ފެށިގެން 2024 ވަނަ އަހަރުގެ އެޕްރީލު މަހުގެ ނިޔަލަށް އެކި ފަހަރު މަތިން ޖުމުލަ 373,988 ޑޮލަރަށްވާ 5,785,346 ރުފިޔާ ޕީއެސްއެމްގެ ބޭންކް އެކައުންޓުން ނަގައިފައިވާއިރު އެ ފައިސާގެ ތެރެއިން 4,583,701 ރުފިޔާ އަށްވާ 297,257 ޑޮލަރު ޕީއެސްއެމަށް ލިބިފައިނުވާކަން ފާހަގަކުރެވިފައިވެ އެވެ.

އަދި ޑޮލަރު ގަތުމަށް ނެގި ފައިސާގެ ތެރެއިން ޕީއެސްއެމްއަށް ލިބިފައިވަނީ ހަމައެކަނި 1,201,645 ރުފިޔާ އަށްވާ 76,731 ޑޮލަރުކަމަށް ވަނީ ބުނެފައެވެ.

މީގެ އިތުރުން އޮންލައިން ޓްރާންސްފާ ހަދައިގެން 1,284,479 ރުފިޔާ ޑޮލަރު ގަތުމަށް ނަގއިފައިވާއިރު ޖުމުލަ 75,491 ޑޮލަރަށްވާ 1,164,068 ރުފިޔާ އެކިފަހަރު މަތިން ޖަމާކޮށްފައިވަނީ ޕީއެސްއެމްގެ ކުރީގެ ފައިނޭންސް ޑިރެކްޓަރުގެ ދަރިއެއްގެ ބޭންކް އެކައުންޓަށްކަން ފާހަގަކުރެވުނުކަމަށް ވެސް އޮޑިޓުގައިވަނީ ބުނެފަ އެވެ.

ޕީއެސްއެމްގެ މާލިއްޔަތުން ނުވަ މިލިއަނަށް ވުރެ ގިނަ ރުފިޔާ ގެއްލިފައިވާ މައްސަލަ މީޑިއާތަކުން ރިޕޯޓް ކުރުމުން އެންޓި ކޮރަޕްޝަން ކޮމިޝަން (އޭސީސީ)އިން ބަލަން ފެށިއެވެ. އަދި ހަނީފުގެ ޕާސްޕޯޓު، އެންޓި ކޮރަޕްޝަން ކޮމިޝަން (އޭސީސީ)ގެ އެންގުމަށް ހިފެހެއްޓި އެވެ. ނަމަވެސް މައްސަލަ އޮތީ އޮބިފަ އެވެ.

މީގެއިތުރުން ޑޮލަރު މާރުކުރުމަށް ޕީއެސްއެމުން ހިންގާފައިވާ އެކި މުއާމަލާތްތަކުން އެ ކުންފުންޏަށް ހަތަރު މިލިއަން ރުފިޔާ ނުލިބި ހުރި ކަން ފާހަގަކުރެވިފައިވާ ކަމަށް އެކުންފުނީގެ މެނޭޖިން ޑިރެކްޓަރު ކަމުގެ މަގާމުގައި މިފަހުން ހުންެނެވި ޒީނާ ޒާހިރު ވެސް ވިދާޅުވި އެވެ. އަދި އިތުރަށް ޒީނާ ވިދާޅުވީ، އެ މައްސަލަ ފުލުހުންނަށް ހުށަހަޅާފައިވާ ކަމަށާއި 2017 އަހަރުން ފެށިގެން ޕީއެސްއެމްގެ މާލީ ކަންތައްތައް ބެލުމަށް އޮޑިޓް ތައްޔާރު ކުރުމުގެ މަސައްކަތް ކުރަމުންދާ ކަމަށެވެ. ނަމަވެސް ޒީނާފެއްޓެވި މި މަސައްކަތް ވެސް މިހާރު ވަނީ ހަލީލްގެ ނަން އަންނާތީ ހުއްޓުވާފަ ކަމަށް ޕީއެސްއެމްގެ އެތެރޭގެ މަސްދަރުތަކުން ބުނެއެވެ.

ޒީނާގެ މިވާހަކަތަކަށް މާގިނަ ދުވަސްތަކެއް ނުވެ އިވިގެންދިޔައީ ޕީއެސްއެމްގެ މެނޭޖިން ޑިރެކްޓަރުގެ މަގާމުން ޒީނާ ޒާހިރު އިސްތިއުފާ ދެއްވި ވާހަކަ އެވެ. ޕީއެސްއެމްގެ އެތެރޭގެ މަސްދަރުތަކުން ބުނީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ހިއްފުޅާ ނުވުމެވެ. ހަލީލް އަށް ޒީނާ ކުއްލިއަކަށް ގޯސްވީ ޒީނާ ކުންފުނި ހިންގުމުގެ މަގާމާ ހަވާލުވެ ވަޑައިގެންނެވިއިރު ޕީއެސްއެމްގެ ދަރަނި 261 މިލިއަނަށް އަރާފައިވާ ކަމަށް ޕްރެސް ކޮންފަރެންސް ބާއްވާ ޒީނާ ވިދާޅުވުމުން ނެވެ. ޒީނާ ވަނީ ޕީއެސްއެމްގެ ދަރަނީގެ ތަފްސީލު ކުރުކޮށް އެދުވަހު ވިދާޅުވެފަ އެވެ. އެގޮތުން ސަރުކާރުގެ ކުންފުނިތަކަށް 122 މިލިއަން ރުފިޔާ ދައްކަން ޖެހޭއިރު، އަމިއްލަ ކުންފުނިތަކަށް 27 މިލިއަން ރުފިޔާ، ބޭރުގެ އެކި ފަރާތްތަކަށް 25 މިލިއަން ރުފިޔާ އަދި ލޯނުގެ ގޮތުގައި 88 މިލިއަން ރުފިޔާގެ ދަރަނި ޕީއެސްއެމްގައި އޮތެވެ.

ޒިނާއަށް ވެސް ވާރުތަވި ދަރަނީގެ މޭސްތިރި އަކީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ކަމަށް ޕީއެސްއެމްގެ ލިޔެކިޔުން ބަލާލުމުން ސާފެވެ.

ކޮންމެ އަކަސް ޕީއެސްއެމްގެ ހިޔާނާތުގެ ގިނަ މައްސަލަތަކެއް އަދި ކުންފުނި އެންމެ ބޮޑަށް ދަރާ ވިކުނީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލުގެ ޒައާމަތުގައި އެވެ. މިއީ ދެބަސް ވެވެން ނެތް ހަގީގަތެވެ. އަދި ހަލީލް ޕީއެސްއެމްގައި ހުންނެވި ދުވަސްވަރު ހެއްދެވި ހުރިހާ ގޯހެއްގެ މަދަދުގާރަކީ ފައިނޭންސް ޑިޕާޓްމަންޓުގެ ޕޭމަންޓުތަކާއި ކޭޝްފްލޯ މެނޭޖް ކުރުމުގައި ކޯޕަރޭޓް އުސޫލާ ހިލާފަށް ކަންކަން ގެންދެވި ކުރީގެ ފައިނޭންސް ހެޑް ހަނީފު އެވެ.

އެހެން ކަމުން އަދި މީހަކު ބޭނުން ވިޔަކަސް އަދި ވަކިން ހާއްސަކޮށް ރައީސް އޮފީހުގެ ކޮމިއުނިކޭޝަން މިނިސްޓަރުގެ މަގާމުގައި އިބްރާހިމް ހަލީލު ހުންނަވަނިކޮށް އޭނާގެ އެކުވެރި ހަނީފްގެ މައްސަލައެއް މި އުޑުދަށުގައި ބެލޭނެ ގޮތެއް އެއީ ވުމަށް ވުރެއް ނުވުން ގާތް ކަމަކެވެ. މިހާރު ވެސް އެ ފެންނަނީ އެ މަންޒަރުތަކެވެ. ސަބަބަކީ ހަނީފް "ކަރުގައި" ހިފުމުން ނިކުންނާނީ ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ނަމެވެ. އަޑެވެ.

ތެދެކެވެ، ޕީއެސްއެމްގެ މެނޭޖިން ޑިރެކްޓަރުގެ މަގާމުގައި ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ހުންނެވިއިރު ލިޔެކިޔުން ނެތި އެ ކުންފުނިން ކުރުވި ބައެއް މަސައްކަތްތަކުގައި ޕީއެސްއެމްއާ ދެކޮޅަށް މިހާރު ވެސް ކޯޓުގައި ގިނަ މައްސަލަތަކެއް އެބަ ހިނގަ އެވެ. އޭގެ ތެރެއިން ގިނައީ ކުންފުންޏާ ހަލީލު ހަވާލުވެ ހުންނެވިއިރު ކުރުވާފައިވާ މަސައްކަތްތަކަށް ނުދައްކާ އޮތް ފައިސާ އެވެ. އެއިރުވެސް ފައިނޭން ހެޑްކަން ކުރަމުން ދިޔައީ ރައީސް އޮފީހުގެ ކޮމިއުނިކޭޝަން މިނިސްޓަރުގެ މަގާމުގައި މިހާރު ހުންނެވިއިބްރާހިމް ހަލީލުގެ "ދޯސްތު" ހަނީފް އެވެ.