އަޅުތަކުންގެ ޙައްޤުތަކުގެ ތެރެއިން މީސްތަކުން ވަރަށް ބޮޑަށް ފަރުވާކުޑަކޮށްލާފައިވާ އެއްކަމަކީ ދަރަނީގެ ކަންކަމެވެ. އެއީ މުސްލިމުންގެ މުޖުތަމަޢުތަކާއި އެނޫން މުޖުތަމަޢުތަކުގައިވެސް ވަރަށް ބޮޑަށް ފެތުރިފައިވާ ކަމެކެވެ. ދަރަނި ދޭމީހުންނާއި ދަރަނި ނަގާމީހުން ކޮންމެ މުޖުތަމަޢަކުންވެސް ފެންނާނެއެވެ.

ގިނަ މީހުންވަނީ އެބައިމީހުންގެ ނަފްސުތަކުގެ މައްޗަށް ދަރަނީގެ ދޮރު ހުޅުވާލާ، އެކަމުން އިސްރާފުކޮށް، އެކަމުގެ ތެރޭގައި މީހާ މާޔޫސްވެ ވަރުބަލިވެފައެވެ. އެބައިމީހުންނަށް ތަހަންމަލު ކުރެވިދާނެ ކަންކަމުގައިވެސް އެބައިމީހުން އަވަސްއަރުވާލާ، ވަރަށް ފަސޭހައިން މީހެއްގެ އަތުން ފަހުންދޭ ގޮތަށް އެއްޗެހި ނަގައެވެ. އެކަމާމެދު ވިސްނާ، ހިސާބުކޮށް ބެލުމަށް މަޑުކުރުމެއް ނެތި އަވަސްއަރުވާލައެވެ. ޝަރުޢީ ގޮތުން ދަރަނީގެ ޙުކުމްތަކާއި އަދަބުތައްވެސް ނޭނގޭ ޙާލެވެ. އެބައިމީހުން އެކަމުގައި ފަރުވާކުޑަކޮށްލައެވެ. އެއިން ސަލާމަތްވެވެން އޮތް އިރުވެސް، ނިމުމެއް ނެތް ދަރަނިތަކާއި ޙައްޤުތަކުގެ ތެރޭގައި އެބައިމީހުންގެ ނަފްސުތައް ބަނދެވިފައިވެއެވެ.

ދަރަނީގެ ވާހަކަ މިއަދުގެ ރިޕޯޓުގައި މި ފާހަގަކުރަން ޖެހުނީ ފަހަކަށް އައިސް ސަރުކާރު ތެރޭގައިވެސް ދަރަނި އަދާނުކޮށް ތިބި ވެރިން ގިނަ ކަމަށް އަޑުތައް ފެންމަތިވަމުންދާތީވެއާވެސް އެކުގައެވެ.

މައިންބަފައިން އަތުނ ނެގިޔަސް ފަހުން ދޭން ނެގި އެއްޗެއް ވިއްޔާ ވާނީ ހަމަ ދަރަންޏަށެވެ. އެހެންކަމުން އަދި ގައުމުގެ ރައްޔިތުންގެ ހައްގުތަކާ ގުޅިފައިވާ ކަންކަމުން ދަރަނި ނަގައިފިނަމަ މިކަން އަވަހަށް އަދާކުރެވޭތޯ އުޅުމަކީ އެއި އެންމެ ރީތި އަދި ފުރިހަމަ މިސާލެވެ.

ދަރަންޏަކީ ސުވަރުގެ ވަނުމަށް އޮތް އެންމެ ބޮޑު އެއް ހުރަސް ކަމަށާއި އަދި އެންމެ ދިނާރެއްގެ ދަރަންޏާއި ހުރެ ވެސް ސުވަރުގެ ވަނުމަށް ހުރަސް އެޅޭކަން ކައު އިތުރު ރަސޫލާގެ ޙަދީޘްފުޅުން ސާބިތުވާއިރު ސައްތައިން ސައްތަ މުސްލިމު ގައުމެއްގައި ވެރިންގެ ގޮތުގައި ތިބި ބަޔަކު ދަރަނީގެ ޝިކާރައަށްވެ މުޅި ގައުމުގައި އެވާހަކަ ދައުރުވަމން ދިއުމަކީ ލަދުވެތިކަމެކެވެ.

މަޖިލިސް މެމްބަރުންނާ ކުންފުނިތަކުގެ ބޮޑުންނާ މިނިވަން މުއައްސަސާތަކުގެ ވެރިންގެ ގޮތުގައި ވެސް ތިއްބެވި ބޭބޭފުޅުން މިކަންކަމުގައި ހިމެނުމަކީ ގައުމެއްގެ ހައިސިއްޔަތުން ނުހަނު ލަދު ހުތުރު ކަންކަމެވެ.

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު ސިނާން ސިވިލް ކޯޓަށް ދައްކަން ޖެހޭ 2.5 މިލިއަން ރުފިޔާއެވެ. ބްރޮޑްކާސްޓިންގ ކޮމިޝަންގެ މެމްބަރު މުހައްމަދު އަބްދުﷲ ސިވިލް ކޯޓަށް ދައްކަން ޖެހޭ 5.02 މިލިއަން ރުފިޔާއެވެ. އައިބީއެމްގެ މެނޭޖިން ޑިރެކްޓަރ މުހައްމަދު ޖިނާނު ޖަލީލު ސިވިލް ކޯޓަށް ދައްކަން ޖެހޭ 2،700 ޔޫއެސް ޑޮލަރެވެ. ފެނަކަ ކޯޕަރޭޝަންސްގެ ޑެޕިއުޓީ މެނޭޖިން ޑިރެކްޓަރ މުހައްމަދު އަބްދުލް ކަރީމު ސިވިލް ކޯޓަށް ދައްކަން ޖެހޭ 4،088.51 ޑޮލަރެވެ. މިއީ އަދި އެނގޭ މިންވަރެވެ. ނޭނގި ސަރުކާރުގެ ވެރިންގެ ތެރޭގައި ކިތައް ދަރަނިވެރިން ތިބޭނެ ބާއެވެ؟

ވެރިންނަކީ ރައްޔިތުންނަށް ނަމޫނާއަކަށްވާން ޖެހޭ ބަޔަކަށް ވާއިރު ދިވެހީންގެ ބޭންކު ލޫޓުވައިގެން ތިބެ ބޭންކު ބަގާވާތޭ ކިޔަން ހަގީގަތުގައި މި ސަރުކާރުގެ ވެރިން އެހެންވީމާ ލަދު ގަންނަން ޖެހޭނެއެވެ. މިއީ ސަރުކާރެއް ހެއްޔެވެ. އެހެންނޫނީ ވަގުންތަކެއް ފިލާތިބި ދަރަނި ފީންޏެއް ހެއްޔެވެ.