ގައުމު ދެކެ ލޯބިވާ ބޭއްފުޅެއްގެ ހައިސިއްޔަތުން ހިތްދަތިވާ މިންވަރަށް ރާއްޖޭގެ އެތެރޭގެ ކަންކަމަށް ބޭރުގެ ނުފޫޒު ވަދެފައިވާ މަންޒަރު ފެންނަކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ކޮންމެ ވެރިއަކުވެސް ގައުމަށް ކޮށްދެއްވަން ވާނީ ގައުމީ ވެރިކަމެއް ކަމަށާ ނަމަވެސް އެފަދަ ވެރިކަމެއް ކޮށްދެއްވޭނީ ނުހަނު އަޒުމުވަރުގަދަވެ ނުފޫޒުން އެއްކިބާވެވަޑައިގެން ހުންނަވާ ކަމަށެވެ.
ރައީސް ޔާމީން ވިދާޅުވީ ނަމަވެސް މިހާރު ވެސް އަދި 2018 އިން 2023 އަށް ވެސް ފެނިގެން ދިޔައީ ގައުމުގެ ކަންކަމުގެ ތެރެއަށް ބޭރުގެ ނުފޫޒު އިމެއް ނެތް މިންވަރަށް ވައްދާ ގައުމުގެ ޚާރިޖީ ސިޔާސަތާ ދާޚިލީ ސިޔާސަތުވެސް ކިލަނބުކޮށްފައިވާ މަންޒަރު ކަމަށެވެ.
އަޅުގަޑުގެ ކުރިންނާ އަދި ފަހުންވެސް ވަޑައިގެންނެވި ބޭފުޅުން އަޅުގަޑު ހަމަ ބޮލަށް އުނދަގޫ ވާ ވަރަށް ހިތްދަތިވާ ވަރަށް ރާއްޖޭގެ އެތެރޭގެ ކަންކަމަށް ރާއްޖޭގެ ދާޚިލީ ކަންކަމަށް ރާއްޖޭގެ ޚާރިޖީ ކަންކަމަށް ބޭރު މީހުންގެ ނުފޫޒު ވައްދައިގެން ބޭރު މީހުންނަށް ބޯލަނބައިގެން ދެން ނުނެއްޓެވޭ ވަރަށް ހަމަ އިނގޭތޯ. ކަނޑު ވިއްކާލަން ޖެހުނީ އިންޑިއާ ސިފައިން ގެންނަން ޖެހުނީ ވަކި ބަޔަކަށް ގޮސް ދަރާ ހުސްވީ. އެމީހުން ގޮވައިގެން އުޅެވޭކަށް ނެތް ނުލާ އުޅެވޭކަށް ވެސް ނެތް. މި ފެންނަވަރަށް ކަންކަން ގޮއްސަ އޮތީ.
ރައީސް ޔާމީން
ރައީސް ޔާމީން ވިދާޅުވީ އެމަނިކުފާނުގެ އަމިއްލަފުޅު ވެރިކަމާ މެދު އެންމެ އުފާވާ ކަމަކީ އެމަނިކުފާނަކީ ރާއްޖޭގެ ދާޚިލީ ޚާރިޖީ މިނިވަންކަން ފުރިހަމައަށް ދިވެހިރާއްޖޭގެ އިސްތިގުލާލު ދިވެހިރާއްޖެއަށް އޮވެގެން ފުރިހަަމައަށް ދިވެހިރާއްޖޭގެ ވެރިކަން ބޭރުބައެއްގެ އެއްވެސް ނުފޫޒެއް ނެތި ކުރެއްވުމުން ކަމަށެވެ.
