ސަރުކާރުން ރައްޔިތުންނަށް ރައްޔިތުންގެ ފައިސާއިން ބަހާ މަސް ދަޅު ކޭހަކީ އިހުލާސްތެރިކަމާ އެކު ދޭ ހަދިޔާއެއް ނަމަ ރައްޔިތުން ގަނަ ނުތަޅުވާ ފަސޭހަ އިންތިޒާމުތަކަކާ އެކު އެކަން ނިންމަވާލުމަށް އިސްލާމިކު މިނިސްޓްރީގެ ކުރީ ނައިބު އަލީ އާދަމް ގޮވާލައްވައިފިއެވެ.
އަލި މިފަދައިން ވިދާޅުވީ މަސް ދަޅު ކޭސް ބެހުމަށް ސަރުކާރުން ހަމަ ޖައްސަފާއިވާ އިންތިޒާމަށް އިޝާރަތްކުރައްވާ ފޭސްބުކްގައި ކުރެއްވި ޕޯސްޓެއްގައެވެ.
އަލީ ވިދާޅުވީ މަސްދަޅު ހޯދުމަށް ދިވެހިން ލައްވާ މިހާ ގަނަ މިތަޅުވަނީ، ދިވެހިންނަކީ ނުހަނު ދަހި، ގޮތެއް ނެތް ބިކާރީން ތަކެއް ކަމަށް ދައްކަން ކަމާ މެދު ސުވާލު އުފެދޭ ކަމަށެވެ. އަދި މިފަދަ ނިކަމެތި ކަމެއްގެ ތެރެއަށް ދިވެހިން މި ވައްޓާލަނީ ކޮން ބަޔަކަށް ދައްކަން ކަމާ މެދު ސުވާލު އުފައްދަވާ އަލީ ވަނީ މިފަދަ ނިކަމެތި ކަމެއްގެ ތެރެއަށް ދިވެހިން ވައްޓާލައިގެން ސަރުކާރަށް ހާސިލްވާނެ މަންފާއަކީ ކޮބައިކަމާ މެދުވެސް ސުވާލު އުފައްދަވާފައެވެ.
އެހެންކަމުން މި މަސްދަޅު ކޭސްތަކަކީ އިޚްލާސް ތެރިކަމަކާއި އެކީ ދިވިހިންނަށް ދޭ ހަދިޔާއެއްނަމަ، ރައްޔިތުން ނުތަޅުވާ އިންތިޒާމުތައް ހަމަ ޖެއްސުމަށް އަލީ ވަނީ ގޮވާލައްވާފައެވެ.
އެގޮތުން މަސްދަޅު ކޭހަކަށް ވާ ފައިސާ ދިވެހި ކޮންމެ ގޭބިސީއަކަށް ޕޯސްޓުގެ ޒަރިއްޔާއިން ނުވަތަ ބޭންކު އެކައުންޓުގެ ޒަރިޔާ އިންވެސް ދެވިދާނެނުންތޯ އައްސަވާ އަލީ ވަނީ ނޫންނަމަ އެ އަދަދަށް ވާ ފައިސާ ކޮންމެ ގޭބިސީއެއްގެ ކަރަންޓު ބިލުން ވެސް ކަނޑާ ލެވިދާނެ ނޫންތޯ ވެސް ވިދާޅުވެފައެވެ.
އެހެންކަމުން ކަންކަން ދާ ގޮތަށް ބަލާއިރު ކުޑަކޮށްވެސް ކަމުގައި އިޚުލާސްތެރިކަމެއް އޮތް ކަމަކަށް އަލީއަށް ގަބޫލު ނުކުރެއްވޭ ފަދަ މޭރުމަކުން ޕޯސްޓުގައި ލިޔުއްވާފައިވެއެވެ. އަދި ރައްޔިތުންގެ ފައިސާ އިން ބޮޑު ހަރަދު ކުރައްވައިގެން އެސްޓްރޯނިއާއަށް ވަޑައިގެން ހޯއްދެވި ޓެކުނޮލަޖީގެ މޮޅުކަމަކީ މިއީ ކަމާ މެދުވެސް އަލީ ސުވާލު އުފައްދަވާފައިވެއެވެ.
އަލީ މިފަދައިން ކަންބޮޑުވުން ފާޅުކުރައްވާފައިވާއިރު، މަސްދަޅު ކޭސް ބަލާ ގޮސް ދިގު ކިޔުއެއްގައި އެތައް އިރަކު ތިބެން ޖެހުމަކީ ގިނަ ރައްޔިތުން ސިފަކުރާ ގޮތުގައި އަނިޔާއެކެވެ.
