މާލެ ފިޔަވައި ރާއްޖޭގެ އެންމެ ބޮޑު އާބާދީއެއް ދިރިއުޅެމުންދާ އައްޑޫ ސިޓީއިން ހަކުރު ބަލީގެ މީހުން ބޭނުންކުރާ އިންސިއުލިން ހުސްވެފައިވާ ކަން ހާމަވެއްޖެއެވެ.
މިކަން ސަމާލު ކަމަށް އައިސްފައިވަނީ އާންމު ރައްޔިތަކު އެކްސްގައި ކުރި ޕޯސްޓަކުންނެވެ. އެގޮތުން އޭނާ ވަނީ މާލެއިން އައްޑޫއަށް ދާ މީހަކު ހުރިތޯ އަހާ އޭނާއަށް އެހީވުމަށް އެދިފައެވެ. އަދި ބުނެފައިވަނީ އައްޑޫއިން އިންސިއުލިން ހުސްވެފައިވާ ކަމަށާ އޭނާގެ ފުރާނަ ނުރައްކަލަށް ހުށަހެޅިފައިވާ ކަމަށެވެ.
މިކަމާ ގުޅިގެން "ތޭރަ އޮންލައިން" އެފަރާތަށް ގުޅާ މައުލޫމާތު ސާފުކުރުމުން އޭނާ ކިޔައިދީފައިވާ ގޮތުގައި އޭނާއަކީ މާލޭގައި ދިރިއުޅޭ ފަރާތެކެވެ. ނަމަވެސް ދުވަސްކޮޅަަކަށް އައްޑޫއަށް ޒިޔާރަތްކުރި އިރު އޭނާ ގެންދިޔައީ އެންމެ އިންސިއުލިން އެއް ކަމަށާ އަދި އައްޑޫއިން ހަކުރު ބަލި މީހުން ބޭނުން ކުރާ އެއްވެސް އިންސިއުލިންއެއް ނުލިބޭކަން އެނގުނީ އެ ސިޓީއަށް ދިއުމުން ކަމަށެވެ. އޭނާ ބުނި ގޮތުގައި އައްޑޫގެ އެއްވެސް ބޭސް ފިހާރައަކުން އިންސިއުލިން ނުލިބެއެވެ. އައްޑޫގެ ގުޅިފައިވާ ރަށްތަކުންނާ އަދި ވަކިން އޮންނަ ހޅުދޫ މީދޫއިން ވެސް އެއްވެސް ބޭސް ފިހާރައަކުން އިންސިއުލިން ނުލިބޭކަމަށް ވެސް އޭނާ ވަނީ މި ނޫހަށް ކިޔައިދީފައެވެ.
މިކަމާ ގުޅިގެން ހެލްތު މިނިސްޓްރީގެ ބަހެއް ހޯދާލުމަށް އަދި ބޭސް ފޮނުވުމުގައި ޒިންމާވާން ޖެހޭ ފަރާތެއްގެ މައުލޫމާތު ހޯދާލުމަށް ހެލްތު މިނިސްޓްރީގެ މީޑިޔާ ކޯޑިނޭޓާރ ޝޫބާއަށް ގުޅާލުމުން ވިދާޅުވީ ޕްރޮސެސް އޮންނަ ގޮތް ވެސް އަދި އިތުރު މައުލޫމާތުވެސް ޖެހޭނީ ސާފުކޮށްލަން ކަމަށާ މައުލޫމާތު ސާފު ވީހާ އަވަހަކަށް މައުލޫމާތު ހިއްސާކުރާނެ ކަމަށެވެ.
އައްޑޫ ސިޓީއަކީ ނިސްބަތުން ހަކުރު ބަލީގެ މީހުން ގިނަ ސިޓީއަކަށް ވެފައި އައްޑޫއިން އިންސިއުލިން ހުސްވުމުން ގިނަ ބައެއްގެ ކަންބޮޑުވުން އެކަމުގައި އޮތްކަން ފާހަގަކޮށްލެވެއެވެ.
