ރައީސް ޑރ މުހައްމަދު މުއިއްޒު މީޑިއާ އާއި ރައްޔިތުންނާއި ބައްދަލު ނުކުރައްވާތާ އަހަރަކަށް ވުރެ ގިނަ ދުވަސްވުމުން އެކަމާއި ގުޅިގެން ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ކަންބޮޑުވުން ފާޅުކޮށްފިއެވެ.

މަލީހު މިކަމާއި ގުޅިގެން ކަންބޮޑުވުން ފާޅުކޮށްފައިވަަނީ ޕީއެންއެފުން އާދިއްތަ ދުވަހުގެ ރޭ ބޭއްވި ފްރަންޓް އޮފީސް ޖަލްސާގައި ވާހަކަ ދަައްކަވަމުންނެވެ.

އެގޮތުން އެމެރިކާގެ ރައީސަކީ ރައީސް މުއިއްޒަށް ވުރެ ދެގުނަ އުމުރު ދޮށީ ބޭފުޅެއްކަމަށް މަލީހު ފާހަގަ ކުރެއްވިއެވެ. ނަމަވެސް ހުރިހާ ދުވަހަކު އެމެރިކާގެ ރައީސް ޑޮނަލްޑް ޓްރަމްޕާއި އޭނާގެ ޕްރެސް ސެކްރެޓަރީ ޕްރެސް ކޮންފަރެންސްތައް ބާއްވާ މީޑިއާ އާއި ބައްދަލު ކުރައްވާކަމަށް މަލީހުވަނީ ފާހަގަ ކުރައްވާފައެވެ.

މަލީހު މިފަދައިން ވިދާޅުވެފައިވާއިރު ސަރުކާރުން މީޑިއާތަކަށް މައުލޫމާތު ހިއްސާ ކުރުމުގެ ބަދަލުގައި ބިރު ދައްކަމުންދާކަން ފާހަގަކޮށްލެވެއެވެ. ވަކިން ހާއްސަކޮށް އަދަދު ނޫހާއި ރާއްޖެ ޓީވީ އަދި ޗެނަލް 13 އަށް ސަރުކާރުގެ ނުފޫޒުން އެކި ކަހަލަ ބިރު ދައްކަމުން ދާކަން ފާހަގަކޮށްލެވެއެވެ.