ހދ. ހަނިމާދޫގައި އޮންނަ އިންޑިއާގެ ޑޯނިއާއިން ރާއްޖޭގެ އުތުރު ބޯޑަރު ކައިރީގައި މިއަދު އުދުހެފިއެވެ.
މިކަން ހާމަވެފައިވަނީ އަދަދު ނޫހުން ރިޕޯޓު ކުރުމާއި ގުޅިގެންނެވެ.
ވައިގެމަގުން ދަތުރުކުރާ އުޅަނދުތައް ޓްރެކްކުރާ ސައިޓުތަކުން ދައްކާ ގޮތުގައި ހަނިމާދޫ އިންޓަނޭޝަނަލް އެއާޕޯޓުން ޑޯނިއާވަނީ ފުރާފައެވެ. މި ދަތުރުގައި އެ އުޅަނދު ވަނީ ހއ. ކެލާ އިން ފެށިގެން 60 އަށްވުރެ ގިނަ ކިލޯމީޓަރު އުތުރަށް ދުއްވާފައިވާއިރު އެ ހިސާބުން އަނބުރާލުމަށްފަހު ދުއްވީ ދެކުނަށެވެ
މިކަމާއި ގުޅިގެން އެމްއެންޑީއެފް އާއި ޑިފެންސް މިނިސްޓްރީން ފޯނު ނުނެގުމުގެ ސަބަބުން އިތުރު މައުލޫމާތުވަނީ ސާފު ކުރެވޭ ގޮތް ނުވެެފައެވެ. ނަމަވެސް މި ދެ އިދާރާއަށްވެސް އެކަމާއި ގުޅުން ހުރި މައުލޫމާތު ނޭނގޭކަމަށް އަދަދު ނޫހުގައިވަނީ ރިޕޯޓުކޮށްފައެވެ.
ޑޯނިއާ ދުއްވަން ތިބި އިންޑިއާ ސިފައިން ދައުލަތުން ފޮނުވާލައި މިހާރު އެ އުޅަނދު ދުއްވަނީ އިންޑިއާގެ ސަރުކާރުން ހިންގާ ޑިފެންސް ކުންފުންޏެއްގެ މަދަނީންނެވެ. އެގޮތުން އެއީ ޔުނީފޯމު ނުލާ ސިފައިންކަމަށް ސިފަކުރެއެވެ.
