ބީއެމްއެލްއަށް ޑޮލަރުގެ ތާށިކަން ބޮޑުވެ ކާޑު ލިމިޓް 25 ޑޮލަރަށް ކުޑަކުރަން ނިންމައިފިއެވެ.

 ޑޮލަރު ލިބުމުގެ ތާށިކަން މިހާރު ބޮޑުވެފައި ވާތީ ކުރިއަށް އޮތް ދުވަސްތަކުގައި މި ހާލަތު ރަނގަޅު ނުވެއްޖެ ނަމަ ހުރިހާ ކާޑުތަކެއްގެ ލިމިޓް މަހަކަށް 25 ޑޮލަރަށް ކުޑަކުރަން ބީއެމްއެލް އިން ވަނީ ނިންމާފައެވެ.  އަދި މި ބަދަލު ކުރިއަށް އޮތް މަދު ހަފްތާތަކެއްގެ ތެރޭގައި ބޭންކުން އިއުލާންކޮށް ތަންފީޒު ކުރާނެ ކަމަށް ވެސް މައުލުމާތު ލިބިފައިވެއެވެ.

ރާއްޖެއިން ބޭރުގައި ބޭންކުގެ ކާޑުތަކުން މިހާރު މަހަކަށް މުއާމަލާތް ކުރެވޭ ލިމިޓްތަކަކީ ޑެބިޓު ކާޑުނަމަ 250 ޑޮލަރު އަދި ކްރެޑިޓު ކާޑު ނަމަ 750 ޑޮލަރެވެ.

މިކަމާ ގުޅޭ ގޮތުން ބީއެމްއެލް ގެ ސީދަ ބަހެއް ލިބިފައެއް ނުވެއެވެ. އެހެންނަމަވެސް މީގެ ކުރިން ބީއެމްއެލް އިން ބުނެފައިވަނީ ބޭންކުން ކަސްޓަމަރުންނަށް ޑޮލަރުގެ އެހީތެރިކަން ދެވޭނީ ބޭރު ފައިސާ ގަތުމަށް ބޭންކަށް ލިބޭ ޑޮލަރުގެ އަދަދުުގެ މައްޗަށް ބަލާފައި ކަމަށެވެ.

ބީއެމްއެލް ނޫން ރާއްޖޭގެ އެހެނިހެން ބޭންކުތަކުގައި ހުޅުވާފައިވާ ރުފިޔާ އެކައުންޓްތަކަށް ދޫކުރާ ކާޑުތަކުން ރާއްޖެއިން ބޭރުގައި ބޭނުމެއް ނުކުރެވެ އެވެ.

މިފަހުން ބޭންކުން ވަނީ ރާއްޖެއިން ބޭރުގައި ކިޔަވަން ތިބޭ ދަރިވަރުންނަށް ބީއެމްއެލްގެ ކާޑް ލިމިޓް މި ހިނގާ ފެބްރުއަރީ މަހުގެ އެކަކުން ފެށިގެން ބޮޑުކޮށްދޭން ނިންމި ނަމަވެސް ޑޮލަރުގެ ތާށިކަމާ ހުރެ އެ ބަދަލު ނުގެނެވޭނެ ކަން ހާމަކޮށްފައެވެ.

ރައީސް ޑރ މުއިއްޒު ވަނީ ޑޮލަރުގެ މައްސަލަ ހައްލުކުރަން މިއަހަރުގެ ތެރޭގައި ފިޔަވަޅު އެޅުއްވުމަށް ވައުދުވެ ވަޑައިގެންފަ އެވެ.