މިއަދު ގައުމުގައި ފެނިގެން މިއުޅޭ ވެރިކަމުގެ ނުފުޒަށް ޖާގަ ލިބިގެން ދިޔައީ ރައްޔިތުންގެ މަޖިލީހުގެ މެމްބަރުން ޣާފިލުވެ ތިއްބަވައިގެން ނެންގެވި ފިޔަވަޅުތަކުގެ ސަބަބުން ކަމަށް ކެންދޫ ދާއިރާގެ ކުރީގެ މެމްބަރު އަލްއުސްތާޛު އަލީ ހުސެއިން ވިދާޅުވެއްޖެއެވެ.

އަލީ މިފަދައިން ވިދާޅުވީ ޗެނަލް13 ގެ ނިއުސްޓޯކު ޕްރޮގްރާމުގައި ވާހަކަ ދައްކަވަމުންނެވެ.

އަލީ ވިދާޅުވީ ގާނޫނު އަސާސީއަކީ ވެރިކަމުގައި ހުންނަ ބޭފުޅަކު ހަމަ ހިތަށް އެރުމާ އެކު ބަދަކުކުރަން އޮތް އެއްޗެއް ނޫން ކަމަށެވެ. އަލި ވިދާޅުވީ އެހެން އެކަން އޮންނަކަމުގައި ވަނީ ނަމަ ރައީސް މުހައްމަދު މުއިއްޒުވެސް މުޅި އުމުރަށް ދައުރު ދަންމަވާލަން މަގު ފަހިވާ ގޮތަށް ވެސް ގާނޫނު އަސާސީގައި ލިޔެ އެކަމަށް ޕީއެންސީގެ ސުޕަރ މެޖޯރިޓި ބޭނުން ކޮށްގެން ކަންކަން ހިންގަންވީ ނޫންތީވެސް އައްސަވާ އަލީ ވަނީ ނުުރހުން ސަރުކާރަށް އަމާޒުކުރައްވާފައެވެ.

އަލި ވިދާޅުވީ މިހާރު ފެންނަމުން ދަނީ ޚުދުމުހުތާރު ރަސްކަމަކަށް ވުރެވެސް ކަންކަން ގޮސްމަގުން ހިނގާ ވެރިކަމެއް ކަމަށެވެ. އަލީ ވިދާޅުވީ އެކަމުގެ ޒިންމާ މަޖިލިސް މެމްބަރުން ނަންގަވަން ޖެހިވަޑައިގަންނަވާނެ ކަމަށާ މިހުރިހަކަމުގެ އަސްލަކީ މަޖިލިސް މެމްބަރުން ޣާފިލުކަންމަތީ ތިބުން ކަމަށް އަލީ ވިދާޅުވިއެވެ.

އަލީ އިޝާރާތްކުރެއްވީ އެންޓި ޑިފެކްޝަން ގާނޫނު އުވާލަން ސުޕްރީމު ކޯޓަށް މައްސަލަ ހުށަހަޅާފައި އޮއްވާ ކުއްލިއަކަށް ސުޕްރީމު ކޯޓުގެ ފަނޑިޔާރުންނާ ކުޅޭވޭނެހެން ފާސްކުރި ބިލަށެވެ. އަލީ ސިފަކުރެއްވި ގޮތުގައި އެއީ މަޖިލިސް މެދުވެރިކޮށް ފަނޑިޔާރުގެ ވަށާ ގޮށް ރޯނު ދެމުން ކަހަލަ ކަމެކެވެ.

އަލީ ވިދާޅުވީ މަޖިލީހުގެ މެމްބަރުން ގޮނޑީއާ ލާ ބަނދެ ރައީސް މުއިއްޒު ފާސްކުރި އިސްލާހާ ގުޅިގެން މައްސަލަ ބަލަމުންދަނިކޮށް ފަނޑިޔާރުންތަކެއް ސަސްޕެންޑްކުރީ ސީދާ މައްސަލައަށް ނުފޫޒު ފޯރުވަން ކަމަށާ އެއީ އިއްތިފާގެ ކަމަށް ގަބޫލުކުރެވޭނެ އެއްވެސް ޖާގައެއް ނެތް ކަމަށެވެ.