ފެން ނުހިނދުމުގެ ސަބަބުން ހުޅުމާލެ ސަހަރާގައި މީހުން ވަޅުލުން އަނެއްކާވެސް މެދު ކަނޑާލައިފިއެވެ.
ނިމިދިޔަ ޖެނުއަރީ މަހުވެސް ބިމުން ފެން ނުހިނދޭތީ ހުޅުމާލެ ސަހަރާގައި މީހުން ވަޅުލުން މެދުކަނޑާލާފައިވެއެވެ.
އެކަން ހާމަކޮށް މާލޭ ސިޓީ ކައުންސިލުންވަނީ އެކްސްގައި ޕޯސްޓެއްކޮށްފައެވެ.
އެގޮތުން ބޯކޮށް ވާރޭ ވެހުމުގެ ސަބަބުން ކަށްވަޅުގައި 8 އިންޗި އާއި 9 އިންޗިއާއި ދެމެދު ފެން އޮތްކަމަށް ބުނެފައިވެއެވެ. އަދި އޭގެ ސަބަބުން މައްޔިތާ ވަޅު ނުލެވުނު ވާހަކަވެސް ހާމަކޮށްފައިވެއެވެ.
ގަދަ ވިއްސާރާގައި ހުޅުމާލެ ސަހަރާގައި ފެންބޮޑުވެ، މީހުން ވަޅުލަން ދަތިވާ މައްސަލަ މިހާރު ވަރަށް ބޮޑެވެ. މީގެ ކުރިން ވެސް ތިން ފަހަރެއްގެ މަތިން ހަމަ މި މައްސަލަ ދިމާވެގެން އެ ސަހަރާގައި މީހުން ވަޅުލުން މެދުކަނޑާލި އެވެ.
