

ރައީސް މުހައްމަދު މުއިއްޒު ގައުމު އޮޕަރޭޓު ކުރަމުން ގެންދަނީ ޚުދުމުހުތާރު ރަސްކަމަކަށްވުރެ ވެސް ގޯސްކޮށް ކަމަށް ކެންދޫ ދާއިރާގެ ކުރީގެ މެމްބަރު އަލްއުސްތާޛު އަލީ ހުސެއިން ވިދާޅުވެއްޖެއެވެ.
އަލީ މިފަދައިން ވިދާޅުވީ ޗެނަލް13 ގެ ނިއުސް ޓޯކު ޕްރޮގްރާމުގައި ވާހަކަ ދައްކަވަމުންނެވެ.
އަލީ ވިދާޅުވީ، ސަރުކާރުން ފަނޑިޔާރުން ވަކިކުރުމަށް ގާނޫނަށް އިސްލާހު ގެނެސް މަސައްކަތްކުރަމުން ގެންދަނީ ރާއްޖޭގައި އޮތް ތިން ބާރު ވަކިވެފައިވާ ރިޔާސީ ނިޒާމު ގަނޑުބަނޑުކޮށް ހުރިހާ ބާރެއް ރައީސުލްޖުމްހޫރިއްޔާގެ މުށުތެރެއަށް ލުމަށް ކަމަށެވެ.
އަލީ ވިދާޅުވީ މިއަދު ގައުމުގެ ކަންކަން ހިނގާ މަގަށް ބަލާ ނަމަ މިއަދު ރާއްޖޭގައި އޮތީ ތިން ބާރު ވަކިވެފައިވާ ރިޔާސީ ނިޒާމެކޭ ބުނެވެން ނެތް ކަމަށެވެ.
އެގޮތުން މިއަދު ވެރިކަމުގެ ހުރިހާ ބާރެއް އޮތީ ރައީސް މުއިއްޒުގެ އަތްޕުޅުގައި ކަމަށާ ރައީސް މުއިއްޒު ގައުމު އޮޕަރޭޓުކުރައްވަމުން މި ގެންދަަނީ ހުދުމުހުތާރު ރަސްކަލަކުވެސް ވެރިކަން އޮޕަރޭޓު ނުކުރާނެ ހާ ހުދުމމުހުތާރުކޮށް ކަމަށެވެ.
މިހާރު ރާއްޖޭގައި ތިން ބާރުވަކިވެފައި އޮތް ނިޒާމެއް ނެތް. ހުރިހާ ބާރެއް މިއޮންނަނީ ޑރ މުއިއްޒުގެ އަތު ތެރޭގައި. މިއަދު ޑިމޮކްރެސީގެ ދަވާދު ބޭރުގަ ލައިގެން ހުންނެވި ކަމުގައި ވިޔަސް މިހާރު މިހުރީ ހުދުމުހުތާރު ރަސްކަލަކަށް ވުރެ ވެސް ގޯސްކޮށް ގައުމު އޮޕަރޭޓުކުރާ ވެރިއެއް
އަލީ ވިދާޅުވީ، މަޖިލީހުގެ މެމްބަރުން ގޮނޑިއާ ލާ އެންޓި ޑިފެކްޝަން ވާފަށަކުން ބަނދެލުމުން ސުޕްރީމު ކޯޓަށް މައްސަލައެއް ވައްދާ އަޑު އެހުންތައް ފަށާފައިވަނިކޮށް ކުއްލިއަކަށް ފަނޑިޔާރުންގެ އަދަދު މަދުކުރަން ބިލެއް ވައްދައިގެން ސަރުކާރުން މަސައްކަތްކުރަމުން ދަނީ ސީދާ ރައީސް ޑރ މުހައްމަދު މުއިއްޒުގެ އަމުރަށް ކަމަށާ އަދި އެ މައްސަލަ ސުޕްރީމު ކޯޓަށް ނުބެލޭނެ ކަމަށް ބައެއް ސިޔާސީ ފަރާތްތަކުންނާ އަދި ގާނޫނީ ބޭފުޅުންވެސް ވިދާޅުވަމުން ގެންދެވި ނަމަވެސް އެ މައްސަލަ ކޯޓަށް ބެލޭނެ ކަމަށްވެސް އަލީ ވަނީ ވިދާޅުވެފައެވެ.
އަލީ އިތުރަށް ވިދާޅުވީ، ދުސްތޫރީ މައްސަލަ ސުޕްރީމު ކޯޓުން ބަލަން ފެށުމާ އެކު ސުޕްރީމު ކޯޓުގެ ފަނޑިޔާރުންގެ އަދަު މަދުކުރަން ބިލެއް ހުށަހެޅުމަކީ އިއްތިފާގެއް ކަމަށް ގަބޫލުނުކުރެވޭ ކަމަށެވެ.
އަލީ ވަނި މިއަދު ފަނޑިޔާރުންނަސް ބިރު ދައްކާ ރައީސް މުއިއްޒު ފަނޑިޔާރުގެތައް ވަށާ ފަށްރޯނުން ބަނދެފައިވާ ކަމަށްވެސް ވިދާޅުވެފައެވެ.