ރައީސް ޑރ މުހައްމަދު މުއިއްޒުވަނީ ބޮޑުތަނުން ފެއިލްވެފައިކަމަށް ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވެފައިވަނީ ސަރުކާރުން އެތައް ނުފޫޒުތަކެއް ފޯރުވުމާއި ގުޅިގެން ސުޕްރީމް ކޯޓުގެ ފަނޑިޔާރު ހުސްނުސުއޫދު އިސްތިއުފާ ދެއްްވާ ރައީސް މުއިއްޒު ގެންދަވަނީ ގާނޫނާއި ހިލާފުވަމުންކަމަށް ތުހުމަތު ކުރުމުންނެވެ.
މަލީހު ކުރެއްވި އެކްސް ޕޯސްޓެއްގައިވަނީ އެކަމާއި ގުޅިގެން ކަންބޮޑުވުން ފާޅުކޮށްފައެވެ.
އެގޮތުން ރައީސް މުއިއްޒު ގާނޫނު އަސާސީ އާއި ހިލާފުވެއްޖެނަމަ އެމަނިކުފާނުގެ މަގާމުން ވަގުތުން ވަގުތަށް އަޒުލު ކުރުމަށް މަޖިލީހަށް މަލީހުވަނީ ގޮވާލައްވާފައެވެ.
މީގެ އިތުރުން ރައީސް މުއިއްޒުގެ މައްސަލަ ބަލައި ދައުލަތަށް ދިން ބޮޑެތި ގެއްލުންތަކަށް ހައްގު އަދަބު ދިނުމަށްވެސް މަލީހުވަނީ ގޮވާލާފައެވެ. އެގޮތުން މިއަދު ރައީސް މުއިއްޒުވަނީ ފެއިލްވެފައިކަމަށް މަލީހު ފާހަގަ ކުރެއްވިއެވެ.
ރައްޔިތުންގެ މަޖިލިހުގެ މެމްބަރުންގެ ގޮނޑި ގެއްލޭ މައްސަލަ ބެލުމުގެ އިހްތިސާސް ސުޕްރީމް ކޯޓަށް ލިބިގެންވާ ކަމަށް އެ ކޯޓުން ނިންމުމާއެކު، ސަރުކާރުގެ ފަރާތުން ގާނޫނު އަސާސީއާ ހިލާފަށް ރާއްޖޭގެ އަދުލު އިންސާފުގެ ބާރަށް ނުފޫޒު ފޯރުވަމުންދާކަން ފާހަގަ ކުރެވެއެވެ.
އަދި ސުޕްރީމް ކޯޓަށް ހުށަހަޅާފައިވާ އެ މައްސަލަ އެ ކޯޓުގައި ބެލުން ހުއްޓުވުމުގެ ގޮތުން ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށް، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް މަޖިލީހުން ބިލެއް ފާސްކޮށްފައިވާކަންވެސް ފާހަގަ ކުރެވެއެވެ.
