ސުޕްރީމު ކޯޓުގެ ފަނޑިޔާރުންނަށް ސަރުކާރުން ބިރު ދައްކަމުން ދިޔަ ނަމަވެސް އެއްވެސް ހާލެއްގައި ފަހަތަށް ނުޖެހި ކުރިއަށް ވަޑައިގެންނެވުމަށް ރައީސް އަބްދުﷲ ޔާމީން ގޮވާލައްވައިފިއެވެ.

ބުރާސްފަތި ދުވަހުގެރޭ ޕީއެންއެފުން ބޭއްވު ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ފަނޑިޔާރުންނަކީ އިންސާފު ގާއިމުކޮށްދޭން ހަމަހަމަ ކަކާމ މިނވަންކަމާ އެކު ތިއްބަވަން ޖެހޭ ބޭފުޅުން ނަމަވެސް ފަހަކަށް އައިސް ކޮންމެ ވެރިއަކުވެސް ގެންދަވަނީ ޝަރުއީ ދާއިރާއަށް ނުފޫޒު ފޯރުވަމުން ކަމަށެވެ. އެގޮތުން މިހާރުގެ ސަރުކާރުން ސުޕްރީމު ކޯޓުގެ ފަނޑިޔާރުންނަށް ބިރު ދެއްކުމަށް ގާނޫނަށް އިސްލާހު ގެނެސް އެ ކޯޓުގެ ފަނޑިޔާރުންގެ އަދަދު މަދު ކުރަން ނިންމާ ދައްކަމުން ދަނީ ހުު ނަމޫނާއެއް ކަމަށެވެ.

ރައީސް ޔާމީން ވިދާޅުވީ ސުޕްރީމު ކޯޓުގައި ދުސްތޫރީ މައްސަލައެއް އޮއްވާ މަޖިލީހަށް ވެސް އެފަދަ ބިލެއް ފާސްނުކުރެވޭނެ ކަމަށާ އެއީ ސީދާ ބިރު ދެއްކުމުގެ އަމަލެއްގެ ގޮތުގައި ރައީސް ޔާމީން ސިފަކުރެއްވިއެވެ. އަދި ރައީސް ޔާމީން ވަނީ މިހާރު ސަރުކާރުން ދައްކަމުންދާ ބިރަށް ފަސް ނުޖެހި ގައުމާ ރައްޔިތުންގެ މަސްލަހަަތު އިސްކުރުމަށާ އެއްވެސް ފަނޑިޔާރަކު އިސްތިއުފާ ނުދިނުމަށްވެސް ގޮވާލައްވާފައެވެ.

ރައީސް ޔާމީން މިފަދައިން ވިދާޅުވެފައިވާއިރު ސުޕްރީމު ކޯޓުން އެންޓި ޑިފެކްޝަން ގާނޫނުގެ ދުސްތޫރީ މައްސަލަ ބަލަން ނިންމިތާ ދެ ދުވަސް ފަހުނ ޖޭއެސްސީއިން ވަނީ ސުޕްރީމު ކޯޓުގެ ތިން ފަނޑިޔާރުން ކަމަށް ވާ އަލްއުސްތާޛު ހުސުނުއަލް ސުއޫދާ ފަނޑިޔާރު މަހާޒު އަލީ ޒާހިރާ ފަނޑިޔާރު ޑރ އަޒްމިރަލްދާ ޒާހިރު ސަސްޕެންޑް ކޮށްފައެވެ. އަދި ފަނޑިޔާރު ސުއޫދު ވަނީ މިއަދު އިސްތިއުފާ ދީފައެވެ.