

ރައްޔިތުންގެ މަޖިލީހުގެ ދައުރަކީ ރައްޔިތުންގެ އަޑު ސަރުކާރަށް އިއްވުން ކަމަށާ އެ ދައުރަށް ރައީސުލްޖުމްހޫރިއްޔާއަށް ވެސް ހުރަސް ނޭޅޭނެ ކަމަށް ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ ޖަމީލު އެކްސްގައި ކުރެއްވި ޕޯސްޓެއްގައިވަނީ ސުޕްރީމު ކޯޓަށް މަޖިލިސް މެދުވެރިކޮށް ސަރުކާރުން ނުފޫޒުފޯރުވަން މަސައްކަތްކުރަމުން ދާތީ އެކަމަށް އިޝާރާތްކުރައްވާފައެވެ. އެގޮތުން ޑރ ޖަމީލު ވިދާޅުވީ މިއަދު ސަރުކާރުގެ ނުފޫޒު ސުޕްރީމު ކޯޓަސް ފޯރާފައިވާ މިންވަރު ފަނޑިޔާރު ސުއޫދުގެ އިސްތިއުފާ ސިޓީއިން ހާމަވާ ކަމަށެވެ.
އެގޮތުން ފަނޑިޔާރު ސުޢޫދުގެ ވާހަކަފުޅުގައި ރައީސް ޑރ މުހައްމަދު މުއިއްޒު ގާނޫނު އަސާސީއާ ޚިލާފުވިކަން ސާފުކޮށް އެނގެން އެބަ އޮތް ކަމަށާ ދުސްތޫރީ ނިޒާމުގައި ރައީސަށްވެސް އޮންނަނީ ވަކި ދައުރެއްކަމަށެވެ.
މީގެ އިތުރުން ކަނޑައެޅިފައިވާ ދާއިރާއިން ބޭރަށް ރައީސުލްޖުމްހޫރިއްޔާއަށް ވެސް ނުދެވޭއިރު ރައްޔިތުންގެ މަޖިލިހަކީ ރައްޔިތުންގެ އަޑުއިއްވާ ފަރާތްކަމަށާ އެހެންކަމުން އެ ދައުރު ރައީސަކަށް ނިގުޅައި ނުގަނެވޭނެކަމަށް ވެސް ޑރ ޖަމީލު ވިދާޅުވެފައިވެއެވެ.
ހަމައެހެންމެ ސުޕްރީމް ކޯޓުގެ ދައުރު ވަރަށް ތަފާތުކަން ފާހަގަކުރައްވާ ޑރ ޖަމީލު ވިދާޅުވީ ދުސްތޫރީ ގޮތުން ގާނޫނު އޮތްގޮތް ކަނޑައެޅުމުގެ ސީދާބާރު ދީފައިވަނީ ސުޕްރީމު ކޯޓަށް ކަމަށާ ގާނޫނު މާނަކުރުމުގެ ފަހު ބަސްބުނުމާ، މަޖިލިހުގެ މެމްބަރުގެ ގޮނޑި ގެއްލުމާ، ރައީސަކު އަޒުލު ކުރުމާ، ކުއްލި ނުރައްކަލުގެ ގަރާރުގެ ސައްޙަކަމާ، މަޖިލިހުން އިސްތިޝާރީ ލަފާ ހޯދުން ފަދަ ކަންތައްތައް ސުޕްރީމް ކޯޓަށް ނޫން ތަނަކަށް ނުބެލޭކަމަށް ވެސް ޑރ ޖަމީލުގެ ޕޯސްޓުގައިވެއެވެ.
ފަނޑިޔާރު ސުޢޫދަކީ ކިޔެވި އިރުވެސް ވިސްނުންތޫނު ބޭފުޅެއްކަމަށާ އެމަނިކުފާނާ ޚިޔާލު ތަފާތު ބޮޑެތި ނިންމުން ފަނޑިޔާރެއްގެ ގޮތުގައި ސުޢޫދު ނިންމަވާފައިވާ ކަމަށް ވިދާޅުވެ ޑރ ޖަމީލު ވަނީ އެހެން އެކަން އޮތް ނަމަވެސް ސުޢޫދަކީ މި ދިވެހިރާއްޖޭގެ ސުޕްރީމް ކޯޓުގައި ހުންނަން އެންމެ ގާބިލް ގާނޫނީ ވަރުގަދަ އެއް ސިކުނޑިކަމަށެވެ.
ޑރ ޖަމީލު މިފަދައިން ވިދާޅުވެފައި މިވަނީ ސުޕްރީމު ކޯޓުގެ ބެންޗު ހަތަކުން ފަހަކަށް ތިރި ކުރުމަށް ސަރުކާރުން ކުއްލި ގޮތަކަށް ބިލެއް ހުށަހަޅާ މަޖިލީހުން ފާސްކޮށްފައިވެސް ވާ ދަނޑިވަޅެއްގައެވެ. މަޖިލީހަށް މިފަދަ ބިލެއް ސަރުކާރުން ހުށަހެޅީ އެންޓި ޑިފެކްޝަން ގާނޫނާ ގުޅިގެން ދުސްތުރީ މައްސަލައެއް ސުޕްރީމު ކޯޓުން ބަލަމުން ދަނިކޮށެވެ.