ރައީސުލްޖުމްހޫރިއްޔާ އަކީ ރަސްގެފާނެއް ނޫން ކަމަށް ކެންދޫ ދާއިރާގެ ކުރީގެ މެމްބަރު އަލީ ހުސެއިން ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އަލީ ހުސެއިން ވިދާޅުވީ ސީދާ ރައީސުލްޖުމްހޫރިއްޔާ މަޖިލީހަށް ހާޒިރުކޮށް ޖަވާބުދާރީ ކުރެވޭނެ ނިޒާމެއް އެކުލަވާލަންޖެހޭ ކަމަށެވެ.

އަލީ ހުސެއިން މިހެން ވިދާޅުވި އިރު ރައީސް ޑރ. މުހައްމަދު މުއިއްޒުގެ ހުއްދަ ނެތި ވަޒީރުންނާއި ސަރުކާރު ކުންފުނިތަކުގެ ވެރިން ރައްޔިތުންގެ މަޖިލީހަށް ހާޒިރު ނުކުރަން ޕީއެންސީގެ ޕާލިމެންޓަރީ ގްރޫޕަށް ވަނީ އަންގައިފަ އެވެ.

އަދި އެމަނިކުފާނު ކޮންޓްރޯލް ކުރައްވާ ރައްޔިތުންގެ މަޖިލީހުން ވަނީ ޕާޓީ ބަދަލުކޮށްފި ނަމަ ނުވަތަ ޕާޓީގެ ރައީސް ބޭނުންފުޅުވާނަމަ މެންބަރު ކަމުގެ ގޮޑި ގެއްލޭ ގޮތަށް ގާނޫނު އަސާސީ އަށް އިސްލާހު ވެސް ގެނެސް ފަ އެވެ. އަދި މިހާރު ރައީސް މުއިއްޒު ކޮންޓްރޯލް ކުރައްވާ ޖޭއެސްސީން ބޭނުން ކުރައްވާ ފަޑިޔާރުންނަށް ބިރު ދެއްކުމުގެ އަމަލުތައް ވެސް އަންނަނީ ހިންގަމުން ނެވެ.

ރައީސް އަށް ލިބިދޭ ގާނޫނުގެ ބޭރުން ގިނަ ކަންކަން ރައީސް މުއިއްޒު ކުރައްވަމުން ގެންދަވާ ކަމަށް ވިދާޅުވެ ގިނަބަޔަކު އަންނަނީ ސަރުކާރަށް ފާޑު ކިޔަމުން ނެވެ. އެގޮތުން ރައީސް މުއިއްޒުގެ އޯޑަރަށް ކަމަށް ބުނެ ޖޭއެސްސީން ސުޕްރީމް ކޯޓުގެ ފަނޑިޔާރުންގެ މައްސަލަތަކެއް ބަލަމުން އަންނާތީ ރައީސް މުއިއްޒު ސީދާ ޖުޑީޝަރީއަށް ނުފޫޒު ފޯރުވާ ކަމަށް ބައެއް ސިޔާސީ ޕާޓީތަކުން ވެސް އަންނަނީ ބުނަމުން ނެވެ.

އެގޮތުން އިއްޔެ ސުޕްރީމް ކޯޓުން އިސްތިއުފާ ދެއްވި ސުއޫދު ވެސް ވަނީ ސްޕްރީމް ކޯޓަށް ހުށަހަޅާފައިވާ މައްސަލަ އަށް ރައީސް މުއިއްޒު ބޭނުންފުޅުވާ ގޮތަށް ނިންމަން ގާނޫނުއަސާސީގެ 144ގެ ނ. އާއި ރ. އާ ހިލާފަށް ސުޕްރީމް ކޯޓަށް އެމަނިކުފާނު ނުފޫޒު ފޯރުވަމުން ގެންދަވާ ކަމަށް ތުހުމަތުކުރައްވާފަ އެވެ.

ރައީސް ޑރ. މުހައްމަދު މުއިއްޒަށް ސުއޫދު ފޮނުއްވި އިސްތިއުފާގެ ސިޓީއެއްގައި ވިދާޅުވީ ރައްޔިތުންގެ މަޖިލިހުގެ މެމްބަރުންގެ ގޮނޑި ގެއްލޭ މައްސަލަ ބެލުމުގެ އިހްތިސާސް ސުޕްރީމް ކޯޓަށް ލިބިގެންވާ ކަމަށް އެ ކޯޓުން ނިންމުމާއެކު، ސަރުކާރުގެ ފަރާތުން ގާނޫނު އަސާސީއާ ހިލާފަށް ރާއްޖޭގެ އަދުލު އިންސާފުގެ ބާރަށް ނުފޫޒު ފޯރުވަމުންދާ ކަމަށެވެ.

އަދި ސުޕްރީމް ކޯޓަށް ހުށަހަޅާފައިވާ އެ މައްސަލަ އެ ކޯޓުގައި ބެލުން ހުއްޓުވުމުގެ ގޮތުން ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށް، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް މަޖިލީހުން ބިލެއް ފާސްކޮށް، ސުޕްރީމް ކޯޓުގެ ހުރިހާ ފަނޑިޔާރުންނަށް ބިރު ދައްކަމުންދާ ކަމަށްވެސް ސުއޫދު ވިދާޅުވި އެވެ.