އެންޓި ކޮރަޕްޝަންސް ކޮމިޝަން އޭސީސީގައި ހުރި ރައީސް ޑރ މުހައްމަދު މުއިއްޒުގެ ކޮރަޕްޝަނާއި ގުޅުން އެތައް މައްސަލައެއް ނުބަލާ އޮތުމުން އެކަމާއި ގުޅިގެން ދައުލަތުގެ ޕްރޮސެކިއުޓަރ ޖެނެރަލް އައްބާސް ޝަރީފަށް ރައީސް އަބްދުﷲ ޔާމީން އަބްދުލްގައްޔޫމް ފާޑު ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ ބުރާސްފަތި ދުވަހުގެ ރޭ ޕީޕަލްސް ނޭޝަނަލް ފްރޮންޓް ޕީއެންއެފުން ބޭއްވި ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.
އެއީ ދައުލަތުގެ ޕްރޮސެކިއުޓަރ ޖެނެރަލްކަމާއި ދިމްޔާތުގެ ޕްރޮސެކިއުޓަރ ޖެނެރަލް ނޫންކަމަށް ރައީސް ޔާމީންވަނީ ފާހަގަ ކުރައްވާފައެވެ. އެގޮތުން ރައީސް މުއިއްޒުގެ ގިނަ މައްސަލަތަކެއް އޭސީސީގައި ފުނި ޖެހިފައި އޮތުމުން ޕީޖީއަށް އެ މައްސަލަތައް ބެލުމަށް އަމުރެއް ނުނެރެވި އުޅެނީ ކޮން ސަބަބަކާއި ހުރެތޯވަނީ ރައީސް ޔާމީން ސުވާލު އުފައްދަވާފައެވެ.
އައްބާސް ޝަރީފްވެސް މޫނަށާއި ކަނދުރާއަށް ނުބެލިއަސް އޭނަ ބަލާ ހުރިހާ ތާކަށް. މި ފެންވަރުގެ މީހުންނަކީ މަގާމަތަކަށް ޝަރުތު ފުރިހަމަ ނުވާ މީހުން. އައްބާސް ޝަރީފަކީ ދައުލަތުގެ ޕްރޮސެކިއުޓަރ ޖެނެރަލް. ދިމްޔާތުގެ ޕްރޮސެކިއުޓަރ ޖެނެރަލްއެއް ނޫން. އޭސީސީއަށް މުއިއްޒުގެ މައްޗަށް އޮތް މައްސަލަތައް ނުބެލިގެން އުޅޭ އިރު ކީއްވެތޯ އައްބާސް ޝަރީފަށް އެ މައްސަލަތައް ބެލުމަށް އަމުރެއް ނުނެރިވިގެން އެ އުޅެނީ؟ އެއީ ދައުލަތުގެ ޕްރޮސެކިއުޓަރ ޖެނެރަލް ކުރަން ޖެހޭ ކަމަކީ.
ރައީސް ޔާމީން
އޭސީސީގައި ބަލަނީ ޖިނާއީ މައްސަލަތައްކަމާއި އަދި އޭސީސީން މައްސަލަތައް ނުބެލޭކަމަށް ވާނަމަ ޕީޖީން އިސްވެ ހުރިހާ އެންމެންގެ މެދުގައި ހަމަހަމަ ކަމާއި އިންސާފު ގާއިމު ކުރުމަށް މަސައްކަތް ކުރަން ޖެހޭ ކަމަށް ރައީސް ޔާމީން ވިދާޅުވިއެވެ.
އަދި އެފަދަ ހައްސާސް މައްސަލަތަކުގައި އެއްވެސް ކަމެއް ނުކުރުމުން ހާމަވަނީ އައްބާސްފަދަ ބޭފުޅުންނަކީ މަގާމަށް ޝަރުތު ފުރިހަމަ ނުވާ ބޭފުޅުންކަން ހާމަވާކަމަށް ވިދާޅުވެ ރައީސް ޔާމީންވަނީ ވަރަށް ބޮޑަށް ފާޑު ވިދާޅުވެފައެވެ.
