ޝަރުއީ ނިޒާމަށް ނުފޫޒެއް ނެތްކަމަށް ރައީސް ޑރ. މުހައްމަދު މުއިއްޒު ތަކުރާރުކޮށް ވިދާޅުވަމުން ގެންދަވާނީ އޭގެ ފަހަތުގައި ސަބަބުތަކެއް އޮވެގެން ރައްޔިތުންނަށް ދޭ މެސެޖެއްގެ ގޮތުންކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ވެރިކަމަށް ވަޑައިގެންނެވުމަށް ފަހު ތަކުރާރުކޮށް، ޝަރުއީ ނިޒާމަށް އެއްވެސް ނުފޫޒެއް ނުފޯރުވާކަމަށް ރައީސް މުއިއްޒު ވިދާޅުވަމުން ގެންދާތީ އެކަމުގެ ރައްދުގައި ރައީސް ޔާމީން ވިދާޅުވީ ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކު އަދުލު އިންސާފާއި، ހިންގުމުގެ ދާއިރާއަށް އެއްވެސް ވަރަކަށް ބާރު ފޯރުވަން މަސައްކަތްކޮށްގެން ނުވާނެ ކަމަށެވެ.
ރައީސް ޔާމީން ވިދާޅުވީ އަދުލު އިންސާފުގެ ދާއިރާއަކީ، ރައީސުލްޖުމްހޫރިއްޔާއާއި މުޅިން ވަކިކޮށްފައިވާ ދާއިރާއެއްކަމަށާއި އެކަމަކު އެކަމުގެ ތެރެއަށް ނުފޫޒު ނުފޯރުވާނެކަމަށް ސަރުކާރުން ބުނަމުން ގެންދަނީ އެމަނިކުފާނު މިނިވަން ކުރުމަށް ގޮވާލާތީކަމަށެވެ.
ދެން ފަހުން ވިދާޅުވީ، ޕާޓީގެ އެއްވެސް ބޭފުޅެއް ވިޔަސް އަދުލު އިންސާފުގެ ދާއިރާއަށް އަތް ބާނާކަމަށް ވަނީނަމަ ހުއްޓުވާނަމޭ. މި އަންނަނީ ޝަރުތުތަކާއި އެކީ މިކަން ކުރާކަމަށް ވަނީނަމަ ހުއްޓުވާނަމޭ. ރައީސުލްޖުމްހޫރިއްޔާއާއި މުޅިން ވަކިކޮށް، ބީކޮށްފަ އޮތް ދާއިރާއެއް އަދުލު އިންސާފުގެ ދާއިރާއަކީ. ދެން އެދާއިރާއަށް އަތް ނުބާނާނެކަމަށް އެ ދާއިރާއަށް ނުބެހޭނެކަމަށް ރައީސުލްޖުމްހޫރިއްޔާ ތަކުރާރުކޮށް އެ އަޑުއިއްވަން ޖެހޭ ސަބަބަކީ ކޮބާ؟
ޝަރުއީ ނިޒާމާއި ގުޅޭގޮތުން ސަރުކާރުން ވާހަކަ ދައްކާނެ ސަބަބެއް ވެސް އޮންނާނެކަމަށާއި އެކަމުން ރައްޔިތުން ދެނެގަންނަން ޖެހޭ މެސެޖެއް ވެސް ވާނެކަމަށް ރައީސް ޔާމީން ފާހަގަކުރެއްވިއެވެ.
