ރައީސް ޑރ. މުހައްމަދު މުއިއްޒު ސަރުކާރުން އެދިގެން ސިވިލް ސާވިސް ކޮމިޝަން (ސީއެސްސީ)އިން, މަރުވާ މީހުން ވަޅުލުމުގެ މަސައްކަތްކުރާ ޖަމާއަތްތެރިންނާއި ގަބުރުސްތާނު މަސައްކަތުގައި އުޅޭ މީހުންނަށް މި ހުރިހާ ސަރުކާރުތަކުން ދެމުން އައި އެލަވަންސް ކަނޑާލައިފި އެވެ.

ޖަމާއަތްތެރިންނާއި ގަބުރުސްތާން މަސައްކަތު އެލަވަންސަކީ އަތޮޅުތަކުގެ ރަށްރަށުގައި މަރުވާ މީހުން ވަޅުލުމުގެ މަސައްކަތްކުރާ މީހުންނަށް ދިނުމަށް ހަމަޖެހިފައިވާ އެލަވަންސެކެވެ. އެގޮތުން އެ މަސައްކަތް ކުރާ މީހުން ނިކުންނަ ކޮންމެ ދުވަހަކަށް 50ރ. އެލަވަންސެއްގެ ގޮތުގައި ދެ އެވެ.

ނަމަވެސް އެ އެލަވަންސް ސިވިލް ސާވިސް ކޮމިޝަނުން އުވައިލި ސަބަބެއް މިހާތަނަށް ހާމައެއް ނުކުރެ އެވެ.

ކައުންސިލްތަކުގެ ސެކެޓްރީ ޖެނެރަލުންނަށް މިދިޔަ ބުރާސްފަތި ދުވަހު ސީއެސްސީން ނެރުނު ސާކިއުލާއެއްގައިވަނީ، މަރުވާ މީހުން ވަޅުމުގެ މަސައްކަތްކުރާ މީހުންނަށްދޭ "ޖަމާއަތްތެރިންނާއި ގަބުރުސްތާނު އެލަވަންސް" މިއަދުން ފެށިގެން އުވާލައިފައިވާ ކަމަށެވެ.

އެހެން ކަމުން "ޖަމާއަތްތެރިންނާއި ގަބުރުސްތާނު އެލަވަންސް" ދިނުމުގައި މާލިއްޔަތު ގަވާއިދާ ފުށުނާރާ ގޮތަށް، ކައުންސިލްތަކުގެ ފުދުންތެރިކަމަށް ރިއާޔަތްކޮށް، ކައުންސިލްތަކުން ކަނޑައަޅާ ގޮތެއްގެ މަތިން އަމަލު ކުރުމަށް ވަނީ އަންގައިފަ އެވެ.

ޖަމާއަތްތެރިންނަކީ މުހިންމު މަސައްކަތެއް ކުރާ ބަަޔަކަށްވާއިރު، ކުއްލިއަކަށް އެ މީހުންގެ އެލަވަންސް ކަނޑާލުން އެއީ މި ސަރުކާރުގެ ބޭ އިންސާފުވެރި ކަމުގެ އިތުރު ހެއްކެތް ކަމަށް ބުނެ ގިނަބަޔަކު އަންނަނީ ނުރުހުން ފާޅުކުރަމުން ނެވެ.

ސަރުކާރުން ޖަމާއަތްތެރިންގެ އެލަވަންސް ކަނޑާލުމުން ކޮންމެ ޖަމާއަތްތެރިއެއްގެ މުސާރައިން މަހަކު 1500ރ. ކެނޑޭ ނެއެވެ. ރޯދަމަހާ ދިމާކޮށް މުސާރައިން އެ ވަރުގެ ބޮޑު އެއްޗެއް ކަނޑާލުމުން ދަތިވާނެ ކަަމަށާއި އެއީ ރަނގަޅަށް ކުރި ކަމެއް ނޫން ކަމަށް ގިނަ ކައުންސިލްތަކުން ވެސް އަންނަނީ ބުނަމުން ނެވެ.