

ސުޕްރީމް ކޯޓުގެ ބެންޗު ބަދަލުކުރަން ރައީސް ޑރ މުހައްމަދު މުުއިއްޒުގެ ފަރާތުން އެޓާނީ ޖެނެރަލް އަހުމަދު އުޝާމް އަމަލުކުރަމުން ދަނީ ތާރީޚުގައި ނުފެންނަހާ މުޑުދާރުކޮށް ކަމަށް ވިދާޅުވެ ކުރީގެ ނައިބު ރައީސް ޑރ މުހައްމަދު ޖަމީލު އަހުމަދުގެ ނުރުހުން ސަރުކާރަށް އަމާޒުކުރައްވައިފިއެވެ.
ޑރ ޖަމީލު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
ސުޕްރީމު ކޯޓުގައި ދުސްތޫރީ މައްސަލައެއް ރައީސް މުއިއްޒާ ދެކޮޅަށް ހުށަހެޅި ހިނގަން ފެށުމުން ކުށްވެރިވީ ފަނޑިޔާރުން ކަމަށް ވިދާޅުވެ ޑރ ޖަމީލު ވަނީ ގާނޫނު އޭޖީ ފަރުމާކޮށް މަޖިލިހަށް ހުށަހަޅާ ވޯޓް ދިނީ ޕީއެންސީގައި ތިބި ޖިންނީންތޯ އައްސަވާ ނުރުހުމުގެ ސުވާލެއް ސަރުކާރަށް އަމާޒުކުރައްވާފައެވެ. އަދި މަޖިލިސް މެމްބަރުންނަކީ ދިމްޔާތުގެ ބާރުގެ ދަށުގައި ތިބި އަޅުކުދިންތަކަކަށް ވުމުން އެހެން އެކަން ދިމާވީ ތޯ ވެސް ޑރ ޖަމީލު ވަނީ އައްސަވާފައެވެ.
ގާނޫނު އަސާސީގެ 141 ގެ (ނ) ގައި ބުނާ ޖުޑިޝަރީއާ ބެހި ނުފޫޒު ފޯރުވުން ފަނޑިޔާރު ސުޢޫދާ، ޑރ އަޒްމިރަލްދާގެ ބަހުން ޝައްކެއްނެތް މިންވަރަށް އޭޖީގެ މައްޗަށް ސާބިތުވާކަން ފާހަގަކުރައްވާ ޑރ ޖަމީލު ވަނީ އޭޖީ އުޝާމަކީ ރައީސް މުއިއްޒުގެ ފަރާތުން ހުރި ޖައްލާދުގެ ގޮތުގައި ސިފަކުރައްވާފައެވެ. އަދި މިދުވަސް ނިމޭއިރު ޔަގީނުންވެސް ތިޔަ ޢަމަލުތަކުގެ ދިފާޢުއަށް އޭޖީއާ މުޅި ސަރުކާރުވެސް ތައްޔާރުވާންޖެހޭނެ ކަމަށްވެސް ޑރ ޖަމީލު ވަނީ ވިދާޅުވެފައެވެ.
ސުޕްރީމް ކޯޓުގެ ބެންޗު ބަދަލުކުރަން މުުއިއްޒުގެ ފަރާތުން އޭޖީ އަމަލުކުރަމުން ދަނީ ތާރީޚުގައި ނުފެންނަހާ މުޑުދާރުކޮށް!
— Mohamed Jameel Ahmed (@MJameelAhmed) March 12, 2025
ދުސްތޫރީ މައްސަލައެއް މުއިއްޒާދެކޮޅަށް ހުށަހެޅި ހިގަން ފެށުމުން ކުށްވެރިވީ ފަނޑިޔާރުން! ތިޔަ ގާނޫނު އޭޖީ ފަރުމާކޮށް މަޖްލިހަށް ހުށަހަޅާ ވޯޓްދިނީ ޕީއެންސީގައި… https://t.co/sOvvVYW4Aj
ޑރ ޖަމީލުގެ ނުރުހުން އޭޖީއަށް އަމާޒުކުރައްވާފައި މިވަނީ ސުޕްރީމު ކޯޓުގެ ފަނޑިޔާރުން މަދު ކުރަން ސަރުކާރުގެ މެމްބަރަކު މަޖިލީހަށް ހުށަހަޅާ ސަރުކާރުގެ މެމްބަރުންގެ އަޣްލަބިއްޔަތުން ފާސްކޮށް ތަސްދީގުކުރަން ފޮނުވި ބިލު އަނބުރާ މަޖިލީހަށް ރައީސް އޮފީހުން ފޮނުވާ ބޮޑު ޑްރާމާ އެއް ސަރުކާރު ތެރެއިން ކުޅެމުން ގެންދާ ދަނޑިވަޅެއްގައެވެ.