ރައީސް އަބްދުﷲ ޔާމީން އަބްދުލް ގައްޔޫމްގެ ތާއިދާއެކު 40 މީހަކު މަޖިލީހަށް ވާދަކުރަން އިލެކްޝަންސް ކޮމިޝަން (އީސީ)އަށް ހުށަހަޅައިފިއެވެ.

ރައީސް ޔާމީންގެ ތާއިދާއެކު މަޖިލީހަށް ވާދަ ކުރާ ބައެއް ފަރާތްތަކުގެ ފޯމް އަންގާރަ ދުވަހު ވަނީ އީސީއަށް ހުށަހަޅާފައެވެ. އެ ފޯމްތައް ހުށަހަޅުއްވަން އީސީއަށް ވަޑައިގެންނެވީ، ރައީސް ޔާމީން އިސްވެ އުފައްދަވާ ޕާޓީ ޕީޕަލްސް ނޭޝަނަލް ފްރޮންޓް (ޕީއެންއެފް) ގައި އިސްކޮށް މަސައްކަތް ކުރައްވާ ބޭފުޅުންނެވެ. އޭގެ ތެރޭގައި އެމަނިކުފާނުގެ ދަރިކަލުން ޒެއިން ޔާމީން ވެސް ހިމެނިވަޑައިގަންނަވައެވެ.

އެ ފޯމްތައް އީސީއާ ހަވާލު ކުރުމަށްފަހު ކުރީގެ ނައިބް ރައީސް އަދި ރައީސް ޔާމީންގެ އިސްގާނޫނީ ވަކީލް ޑރ. މުހައްމަދު ޖަމީލް އަހްމަދު ވިދާޅުވީ، ޕީއެންއެފްގެ ފަރާތުން މަޖިލީހަށް ކުރިމަތިލާ ކެންޑިޑޭޓުންނާއި، ޕީއެންއެފްގެ ތާއިދާއެކު މަޖިލީހަށް ކުރިމަތިލާ ކެންޑިޑޭޓުންގެ ފޯމުތައް މިއަދާއި މާދަމާ އީސީއަށް ހުށަހަޅާނެ ކަމަށެވެ.

އަދި ރައީސް ޔާމީންގެ އިލްތިމާސްއަކީ އެމަނިކުފާނުގެ ކެންޑިޑޭޓުންނަކީ ޕީއެންއެފް ކެންޑިޑޭޓުން ކަަމަށް އޭނާ ވިދާޅުވިއެވެ. އަދި އެމަނިކުފާނަށް ތާއިދު ކުރައްވާ ކެންޑިޑޭޓުން އަމިއްލަގޮތުން ތިއްބެވިއިރު، އެ ބޭފުޅުންނަށް ވޯޓު ދެއްވުމަށް އެދިވަޑައިގެންނެވިއެވެ.