ދައްކަން ޖެހޭ ބޭރުގެ ދަރަނިތައް ނުދެއްކި ރާއްޖެ ބަނގުރޫޓުވުމުގެ ބިރު އެބަ އޮތް ކަމަށް ދުނިޔޭގެ މީޑިޔާތަކުގައި ރިޕޯޓުކުރަން ފަށައިފިއެވެ.

އެގޮތުން އިކޮނޮމިކް ޓައިމްސް އިން ރިޕޯޓުކޮށްފައި ވާ ގޮތުގައި ލޯނު ދައްކައި، މާލީ ހާލަތު ރަނގަޅު ކުރަން ސްރީ ލަންކާ އަދި ބަންގްލަދޭޝްގެ ފަރާތުން ރާއްޖެއިން އެހީއަށް އެދިފައިވާ ކަމަށް އިކޮނޮމިކް ޓައިމްސް އިން ބުނެ އެވެ. އަދި ޔުނައިޓެޑް އެރަބް އެމިރޭޓްސްގެ ޝާރްޖާ އިސްލާމިކް ބޭންކުން ފައިނޭންސިން ހޯދޭތޯ ވެސް ސަރުކާރުން މަސައްކަތް ކުރި ކަމަށެވެ.

ނަމަވެސް އެއިން އެއްވެސް ގައުމަކުން ރާއްޖެއަށް އެހީތެރިކަން ފޯރުކޮށްދޭން އެއްބަސްވެފައިނުވާ ކަމަށްވެއެވެ. އެ ގައުމުތަކުގެ އިތުރުން، އެހީއަށް އެދި ޗައިނާ އާއި ބަހުރެއިން އާއި ސައުދީ އަރަބިއްޔާ އާއި ޔުނެއިޓެޑް އެރަބް އެމިރޭޓްސްގެ ވެރިންނަށް ރައީސް މުހައްމަދު މުއިއްޒުގެ ފަރާތުން ސިޓީއެއް ފޮނުވިއެވެ.

އެކަމަކު، އެއިން އެއްވެސް ގައުމަކުން އަދި އެހީތެރިކަމެއް އަދި ނުލިބެ އެވެ. ބަޖެޓު ސަޕޯޓަށް ޗައިނާއިން 200 މިލިއަން ޑޮލަރު ހޯދަން ރާއްޖެއިން އެދިފައިވާ ކަމަށް ވެސް އިކޮނޮމިކް ޓައިމްސް އިން ބުނެއެވެ. އަދި ކަރަންސީ ސްވޮޕު އެގްރިމަންޓަކާއި ދަރަނި ރިފައިނޭންސިންގެ އެގްރިމަންޓަކަށް ދިޔުމަށް ވެސް ޗައިނާގައި އެދިފައިވާ ކަމަށް އެ ނޫހުން ބުންޏެވެ.

މީގެ އިތުރުން ބޭރުގެ ދަރަނި މިހާރު 3.4 ބިލިއަން ޑޮލަރަށް އަރާއިރު، އޭގެ ތެރެއިން މައިގަޑު ދަރަންޏަކީ އިންޑިއާ އަދި ޗައިނާއަށް ދައްކަން ހުރި ދަރަނި ކަމަށާ މި ދަރަނިތައް ވެސް ނުދެއްކި ރާއްޖެ ލަންކާ ދިޔަމަގުން ގޮސްދާނެކަމަށް ލަފާކޮށްފައިވެއެވެ.

އިކޮނޮމިކު ޓައިމްސްގައި މިފަދައިން ރިޕޯޓުކޮށްފައިވާއިރު، ޗައިނާއަށް ދައްކަންޖެހޭ ލޯނެއް ރިފައިނޭންސް ކުރަން އެ ގައުމުން ވަނީ އޮކްޓޯބަރު، 2024، ގައި 74 މިލިއަން ރުފިޔާގެ އިތުރު ލޯނެއް ނަގައިފައެވެ. ޗައިނާއިން ލޯނު ނެގީ، ރާއްޖެއަށް އެންމެ ރަނގަޅު ގޮތަކީ ރިފައިނޭންސް ނުވަތަ ރިސްޓްރަކްޗާނުކޮށް ލޯނުތައް ދެއްކުން ކަމަށް ޗައިނާއިން ބުނެފައި އޮއްވައެވެ.

އޭގެ އިތުރުން، ރާއްޖެއިން ދައްކަންޖެހޭ 50 މިލިއަން ޑޮލަރުގެ ލޯނެއް އިންޑިއާއިން ވަނީ އޮކްޓޯބަރު، 2024، ގައި ރޯލްއޯވާ ކޮށްދީފަ އެވެ. ރޯލްއޯވާ ކުރުމަކީ ލޯނު ދައްކަންޖެހޭ ތާރީހުތަކަށް ބަދަލު ގެނައުމެވެ. އޭގެ އިތުރުން، އިންޑިއާއިން ވަނީ 400 މިލިއަން ޑޮލަރު އަދި 30 ބިލިއަން ރުޕީސް (400 މިލިއަން ޑޮލަރު) ގެ ކަރަންސީ ސްވޮޕެއް ވެސް ރާއްޖެއަށް ހަމަޖައްސައިދީފައެވެ.

ރާއްޖޭގެ ދަރަނި ނުދެއްކި ބަނގުރޫޓުވުމާ ދިމާއަށް ދަތުރުކޮށްފައިނެ ކަމުގެ ބިރު އޮތް ކަމަށް އަޑު ގަދަވަމުންދާއިރު، ދުނިޔޭގެ މާލީ އިދާރާ އައިއެމްއެފުން ވެސް ވަނީ މިކަންބޮޑުވުން މީގެ ކުރިން ފާޅުކޮށްފައެވެ. އެގޮތުން އިސްލާހީ ހަރުދަނާ ފިޔަވަޅުތައް އަވަސްނުކޮށްފި ނަމަ ރާއްޖޭ ބަނގުރޫޓުވުމުގެ ހިރާސް އޮތް ކަމަށް އެ އިދާރާއިން ވެސް ބުނެފައިވެއެވެ.