ދިވެހީން ސިޔާސީ ކުލަޔަކަށް، ފިކުރަކަށް ނުބަލާ ގައުމީ ޖޯޝުގައި ނުކުމެ ގައުމު ސަލާމަތްކުރުމުގެ މަސައްކަތް ފަށަން ވެއްޖެ ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް)ގެ އިސް ސަފުގައި ހަރަކާތްތެރިވާ މުހައްމަދު އަހުމަދު ވަހީދު (ވައްޑެ) ވިދާޅުވެއްޖެއެވެ.

އެމްއެމްއޭގެ ޑެޕިއުޓީ ގަވަރުނަރު މަގާމުން އިސްތިއުފާ ދެއްވި ދެއްވުމަށް އިޝާރާތްކުރައްވާ ވައްޑެ އެކްސްގައި ކުރެއްވި ޕޯސްޓެއްގައި ވިދާޅުވީ، ތަފާތު އެކިއެކި ދާއިރާތަކުން ތަޢުލީމާއި ތަޖުރިބާ އެއްމެ މަތީން ލިބިފައިވާ މޮޅު އަދި އެހާމެ ޤާބިލް ބޭބޭފުޅުން ސަރުކާރުގެ ވުޒާރާތަކުގެ މަތީ މަގާމުތަކުން ފަހަރަކު ބޭފުޅަކު އިސްތިއުފާ ދެމުން ގެންދަނީ ރައީސް ޑރ މުހައްމަދު މުއިއްޒުގެ ސަރުކާރުން އެބޭބޭފުޅުންނަށް ސިޔާސީ ނުފޫޒު ފޯރުވާ އެބޭބޭފުޅުންގެ ޒަމީރު ގަބޫލު ނުކުރާވަރުގެ ކަންކަން ކުރުވަން މަޖުބޫރުކުރާތީ ކަމަށެވެ.

އެގޮތުން މިނިވަން މުއައްސަސާތައް ޕެރަލައިޒްކޮށް ހިތު ހުރިހާ ގޮތަކަށް ދިވެހި ދައުލަތަށް މިސަރުކާރުން ވަމުން ގެންދާ ޚިޔާނާތް ރިކަވާކުރަން މަދުވެގެން 50-60 ވަރަކަށް އަހަރުނަގާނެ ކަމަށް ވިދާޅުވެ ވައްޑެ ވަނީ ރައީސް އަބްދުﷲ ޔާމީން ވިދާޅުވާ ވިދާޅުވުމެއް ހަނދާނަށް ގެނެސްފައެވެ.

ފަރުދީ މަންފާއަށްވުރެން މި ޤައުމީ މަންފާއަށް އަބަދުވެސް އިސްކަން ދޭންޖެހޭނޭ ކަމެއްކަމަށް ރައީސް ޔާމީން އަބަދުވެސް ވިދާޅުވާކަން ހަނދާނަށް ގެނެސް ވައްޑެ ވިދާޅުވީ އަންނާން އޮތް ޖީލިތަކުގެ ހައްގުތައް ހިމާޔަތްކޮށް ރައްކާތެރި ކުރުމަކީ އެއިރަކު ދައުލަތާއި ހަވާލުވެގެން ތިބޭ ބައެއްގެ ބޮލުގަ އެޅިފައޮތް މަތިވެރި އަމާނާތެއް ކަމަށްވެސް ރައީސް ޔާމީން ވިދާޅުވާ ކަމަށެވެ.

އެހެންކަމުން މިއަދު ދިވެހީން ސިޔާސީ ކުލަޔަކަށް، ފިކުރަކަށް ނުބަލާ ގައުމީ ޖޯޝުގައި ރައީސް ޔާމީންގެ ފަހަތްޕުޅުގައި ވަތަނުގެ ދިފާއުގައި ނިކުމެ މިގައުމު ސަލާމަތް ކުރާންވީ ވަގުތު ޖެހިއްޖެ ކަމަށް ވައްޑެ ވިދާޅުވިއެވެ.