ދައުލަތަށް ފައިސާ ވައްދާ ގައުމުގައި ޕްރޮޖެކްޓްސްތައް ހިންގާ އިގްތިސޯދު ހަމައަކަށް އެޅުވުމުގައި ރައީސް ޑރ މުހައްމަދު މުއިއްޒުގެ ސަރުކާރު ފެއިލްވެފައިވާތީ ރައީސް އަބްދުﷲ ޔާމީންގެ ފާޑުވިދާޅުވުމާ ނުރުހުން ސަރުކާރުގެ ވެރިންނަށް އަމާޒުކުރައްވައިފިއެވެ.

ރައީސް ޔާމީންގެ ނުުރުހުމާ ފާޑުވިދާޅުވުން އަމާޒުކުރެއްވީ ބުރާސްފަތި ދުވަހުގެރޭ އޮތް ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

އެގޮތުން ރައީސް ޔާމީން ވަނީ ގައުމުގައި ޕީއެސްއައިޕީ މަޝްރޫއުތައް ހުއްޓިފައިވާ ކަމަށާ ދައުލަތުން އާމްދަނީ އުފެއްދުމަށް ނުކުޅެދިފައިވާ ކަން ފާހަގަކުރައްވާފައެވެ. އަދި މި ވަގުތު ރާއްޖޭގެ އިންފްލޭޝަން ވެސް ހުރީ ނުހަނު މަތީގައި ކަން ފާހަގަކުރައްވާ ރައީސް ޔާމީން ވިދާޅުވީ ބޭރު ގައުމުތަކުންވެސް ރާއްޖެއަށް ފައިސާ ދޭން ދެކޮޅު ހަދަމުން ގެންދާ ކަމަށެވެ. އޭގެ ސަބަބުން މަޖްބޫރު ވަނީ ފައިސާ ޗާޕުކުރަން ނަމަވެސް އެއީ ހައްލެއް ނޫން ކަމަށް ރައީސް ޔާމީން ވިދާޅުވިއެވެ.

އެގޮތުން އެމަނިކުފާނު ވިދާޅުވީ، ގައުމުުގައި ޗާޕު ކުރާ ފައިސާއިން ދެ މަހެއް ދުވަހުގެ މުސާރަ ސަރުކާރު މުވައްޒަފުން ދެވިދާނެ ކަމަށާ ނަމަވެސް އޭގެ ފަހުން ދެން ވިއްކާނީ ކޯއްޗެއްކަމާ މެދު ސުވާލު އުފެދޭ ކަމަށެވެ. އެގޮތުން އެމަނިކުފާނު ވަނީ ދެން ވިއްކާނީ ދިވެހި ދިދަތޯ ނޫނީ ރައީސުލްޖުމްހޫއްރިއްޔާގެ ގެ މ. ދިމްޔާތުތޯ އައްސަވާ މަޖާޒީ ގޮތަކަށް ސުވާލު އަމާޒުކުރައްވާ ގައުމުގެ އިގްތިސޯދީ ހާލަތާ މެދު ނުހަނު ކަންބޮޑުވުން ފާޅުކުރައްވާފައެވެ.

ރައީސް ޔާމީން ވިދާޅުވީ، ގައުމުގެ އިގްތިސޯދު އޮތީ ނުކިސާރު ފައްތަރެއްގައި ކަމަށެވެ. އެގޮތުން އެމަނިކުފާނު ގައުމުގެ އިގްތިސޯދު އޮތް ހާލަތު ސިފަކުރައްވަމުން ވިދާޅުވީ ގައުމުގެ އިގްތިސޯދު އޮތީ ބޭރަށް ހިންގުން ޖެހިފައި ކަމަށެވެ.