ޝަމްއާން އަތުން 5 ލައްކަ، ފަޒުލްގެ އަތުން 1.4 މިލިއަން ؛ ނަތީޖާ، ޝަމްއާން ހޫނު ގޮޅި އަށް ފަޒުލް ފިނި ކޮޓަރީގައި..! / ތޭރަގްރެފިކްސް
ރިޕޯޓު
ޝަމްއާން އަތުން 5 ލައްކަ، ފަޒުލްގެ އަތުން 1.4 މިލިއަން ؛ ނަތީޖާ، ޝަމްއާން ހޫނު ގޮޅި އަށް ފަޒުލް ފިނި ކޮޓަރީގައި..!
Qudhrathullah Ameen
ގުދުރަތުﷲ އަމީން
23 މާރިޗު 2025
މާލެ ސިޓީ

ރާއްޖޭގެ ވެރިކަމާއި ޑރ. މުއިއްޒު ހަވާލުވެލެއްވީ ވަގުންގެ ކިބައިން ގައުމު ސަލާމްތް ކުރައްވާނެ ކަމަށް ވިދާޅުވެ ސޮލަވާތް ކިޔަވަމުން ނެވެ. ނަމަވެސް މިއަދު އިވޭ އަޑާ މަންޒަރު ތަފާތެވެ. ރަށުތެރެއިން އިވޭ ފަހުގެ އަޑުތަކަށް ބަލާއިރު މުއިއްޒު ވެރިކަމުގެ ސިޔާސީ ވަޒީފާތަކުގެ އާބާދީގެ 20 ޕަސަންޓު މީހުންގެ މަސައްކަތަކީ ހެޔޮ ވެރިކަމެއް ކޮށްދިނުން ކަމަށް ވިޔަސް އެކަން އެގޮތަށް ވާތަން ނުފެނުމަކީ ހައިރާން ވާންޖެހޭ ކަމެއް ނޫނެވެ. ސަބަބަކީ މުއިއްޒު ވެރިކަމުގެ ސިޔާސީ ވަޒީފާތަކުގެ އާބާދީގެ ބާކީ 80 ޕަސަންޓު މީހުންގެ ދުވަހުގެ މަސައްކަތަކީ ދައުލަތުގެ ހަޒާނާއިން ނުހައްގު މުއްސަދިކަން ހޯދާ އެއިން ބައެއް "ދިމްޔާތުގެ ގަނޑުވަރަށް" ގެންގޮސް ދިނުމެވެ.

ނަތީޖާ އަކީ ވެރިކަމުގެ ކޮލިތެރޭގައި ވައްކަން އިތުރުވެ، ނުހައްގު މުއްސަދިކަމުގައި ހިފުން އާންމުވެ، ގައުމުގެ މާލީ ހާލަތުގެ ނުރައްކާތެރިކަން ދުވަހަކަށްވުރެ ދުވަހެއް އިތުރުވަމުންދިއުމެވެ. މިކަންތައްތައް ހުއްޓުވަން މިނިވަން މުއައްސަސާތަކުން ހަރުދަނާ ފިޔަވަޅުތަކެއް އަޅާތަން ނުފެންނަ އިރު، "ވަގުން" ވައްކަން ކުރުން އިތުރުވަމުން އަންނަނީ ކަންބޮޑުވާން ޖެހޭ މިންވަރަކަށެވެ.

ކޮންމެ ދުވަހަކީ ވެސް ވެރިކަމުގެ ތެރެއިން ވައްކަމާއި ކޮރަޕްޝަނުގެ މައްސަލަތަކުގައި އެތައް ބަޔަކު ގެ ނަން ލީކުވެ އެތައް ބަޔަކު ފަލީހަތްވަމުން ދާ ދުވަހެކެވެ. ނަމަވެސް މި ވެރިންނަށް "އަދަބު" ދިނުމާއި އަދަބު ކަނޑައެޅުން ހާއްސަވެފައި އޮންނަނީ "ދިމްޔާތުގެ ގަނޑުވަރަށް" ކަމުން މި ބައިމީހުން ކުށަށް އަދަބު ދިނުމުގައި އާންމު ރައްޔިތުން އަދި އެދޭހާ ގޮތަކަށް ކަން ނުވެ ހިގައި ދާނެ ކަން ގަބޫލް ކުރައްވާނެ އެވެ.

އެއް މިސާލެވެ.

އެޗްޑީސީގެ ތެރެއިން ވަގަށް ގޯތި ތަކެއް ބަހާލި މައްސަލައިގައި ފަލީހަތްވި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ގެ ފުލުހުން ބަލައި ފާސްކުރިއިރު، އެގެއިން 1.4 މިލިއަން ރުފިޔާ ހޯދި އެވެ.

ބިންވެރިޔާ ސްކީމުން ގޯތި ނުލިބޭ ބަޔަކަށް ގޯތި ދޫކޮށްފައިވާ މައްސަލަތަކާ ގުޅިގެން ފުލުހުން ކުރަމުން އަންނަ ތަހުގީގަށް ކޯޓު އަމުރެއްގެ ދަށުން ފަޒުލްގެ ގެ ބަލައި ފާސްކުރިއިރު، ދަބަހެއްގެ ތެރެއިން ގިނަ އަދަދެއްގެ ފައިސާ ވަނީ ފެނިފަ އެވެ. އެ ދަބަހުގައި 1.4 މިލިއަނެއްހާ ރުފިޔާ ހުއްޓެވެ.

ފުލުހުން މިހާރު ބުނަނީ ފަޒުލްގެ ގެއިން ފެނުނު ފައިސާއާ ގުޅޭ ގޮތުން ބަލަންޖެހޭ ކަންކަން ބެލުމަށް ފަހު، އެ ފައިސާ މިހާރު އަނބުރާ ފަޒުލް އާއި ހަވާލުކޮށްފަވާ ކަމަށެވެ.

ވާނީ ވެސް އެހެންތާ އެވެ.

މި ވެރިކަމުގައި އެޗްޑީސީގެ އެމްޑީއަކަށް މިނިސްޓަރުކަމުގެ ފެންވަރުގައި ފަޒުލް އައްޔަން ކުރެއްވީ ނޮވެމްބަރު 28، 2023 ގަ އެވެ. ފަޒުލް ވަނީ އެމްޑަބްލިއުއެސްސީގެ މެނޭޖިން ޑިރެކްޓަރުކަން ވެސް 2015 ވަނަ އަހަރުން ފެށިގެން ނޮވެމްބަރު، 2018 އާ ހަމައަށް ކުރައްވައިފަ އެވެ. އެޗްޑީސީގެ އެމްޑީގެ މަގާމަށް އައްޔަންކުރުމާ ހަމައަށް އޭނާއަކީ ފެލިދޫ ދާއިރާގެ މެމްބަރެވެ. އަދި އޭރުގެ އިދިކޮޅު ޕާޓީ ޕީޕީއެމްގެ ޕާލަމެންޓްރީ ގުރޫޕްގެ ލީޑަރުކަން ވެސް އެޗްޑީސީގެ އެމްޑީގެ މަގާމަށް އައްޔަން ކުރެއްވުމާ ހިސާބަށް ފުރުއްވި އެވެ. އަދި މިހާރުގެ ރައީސް ޑރ. މުއިއްޒުގެ "އަރިސް" ބޭފުޅެކެވެ. އެހެންވެ ފަޒުލް ރަޝީދަށް ފުލުހުން ކުރާ އެޗްޑީސީގެ ރަސްމީ ލިޔެކިޔުންތަކެއް ނައްތާލިކަމުގެ ތުހުމަތު މިހާރު ވަނީ "އޮބި" ފައެވެ. އޭނާ އެހުރީ މިނިވަން ކަމާއިއެކު ފިނި ކޮޓަރި އެއްގައި އެވެ.

އެހެން މިސާލެވެ.

އިމިގްރޭޝަން ކޮންޓްރޯލަރުގެ މަގާމުން މިފަހުން ކުއްލި ގޮތަކަށް ވަކިކުރި ޝަމްއާން ވަހީދު ދިރިއުޅުއްވާ އެޕާޓަމްންޓް ބަލާފާސްކޮށް، ގިނަ އަދަދެއްގެ ނަގުދު ފައިސާ ފުލުހުން ވަނީ ހިފަހައްޓާފައި އެވެ. މި ފައިސާތަކުގެ އަދަދު ދިވެހި ރުފިޔާއިން ބަލާ ނަމަ، 400،000އަށް ވުރެ ގިނަ އެވެ.

ޝަމްއާން ވަހީދުގެ މައްޗަށް ފުލުހުން ކުރަނީ ބިދޭސީންގެ އަތުން ރިޝްވަތު ނެންގެވިކަމުގެ ތުހުމަތު އެވެ. ފުލުހުން ޝޯޝަލް މީޑިއާގައި ކުރި ޕޯސްޓެއްގައި ބުނީ އިމިގްރޭޝަންގެ އޮފިސަރުންތަކެއް ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުން ދާކަމުގެ މައްސަލައެއް ތަހުގީގު ކުރަމުން އަންނަ ކަމަށެވެ.

ފުލުހުން ބުނީ، އެ ބިދޭސީންތަކުގެ ތެރެއިން 530،000ރ. އާ އެކު ޑިޓެންޝަނަށް ގެންދިޔަ ބިދޭސީއަކު އޭރުގެ އިމިގްރޭޝަން ކޮންޓްރޯލަރު ޝަމްއާންގެ އަމުރަށް އޭގެ އެއް ދުވަސް ފަހުން ދަންވަރުގެ ވަގުތެއްގައި ދޫކޮށްލި ކަމަށެވެ. އަދި ބިދޭސީން އުޅުނުގެ ބަލައި ފާސްކުރި އިމިގްރޭޝަންގެ މުވައްޒަފުން، ޑިޓެއިނުން ދޫކޮށްލި ބިދޭސީމީހާއާ މަގުމަތިން ބައްދަލުކޮށް، އެ ފައިސާ ހިފައިގެން ގޮސް ވަނީ ޝަމްއާން ދިރިއުޅޭ އިމާރާތަށް ކަން ވެސް ތަހުގީގަށް އެނގިފައިވާ ކަމަށް ފުލުހުން ބުންޏެވެ.

ފުލުހުން އިތުރަށް ބުނިގޮތުގައި، ޝަމްއާން ދިރިއުޅޭ ގެ ފާސްކޮށް، "ގިނަ އަދަދެއްގެ ފައިސާ" އާއި އިލެކްޓްރޯނިކް ސާމާނުތަކެއް ފުލުހުންގެ ބެލުމުގެ ދަށަށް ވަނީ ގެނެސްފަ އެވެ. އަދި ކޯޓު އަމުރެއްގެ ދަށުން ތިން މީހަކު ހައްޔަރު ކޮށްފައިވާ ކަމަށް ފުލުހުން ބުންޏެވެ.

ދެން ކުއްލިއަކަށް އަޑު އިވުނީ އިމިގްރޭޝަންގެ ޑިޓެންޝަނަށް ގެންދިޔަ ބިދޭސީއަކު ދޫކޮށްލުމަށް ފަހު، އެ މީހާގެ އަތުން ފައިސާތަކެއް ހޯދި ކަމަށް ތުހުމަތު ކުރާ މައްސަލައިގެ ތަހުގީގަށް ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ހައްޔަރުކުރި ވާހަކަ އެވެ. ރޯދަ މަހުގެ ފަހު ދިހައެއް ގައި ޖަލުގެ ހޫނު ގޮޅި އަށް ގެންދިޔަ ވާހަކަ އެވެ.

މި ދެ ހާދިސާ ނޫނަސް މި ސަރުކާރުގެ ވައްކަމާއި ކޮރަޕްޝަން ހިމެނޭ ގިނަ އަޑުއެހުންތައް އެބަހުއްޓެވެ. މި ފަދަ މައްސަލަތަކުގައި ޝާމިލުވާ މީހުންނަށް އަދަބު ދިނުމާއި ތަހުގީގު ހިންގުމުގައި އޮތް ތަފާތު ކުރުމުގެ ވާހަކަ އަކީ ދައްކާފަ ކޮޅުންލާނެ ވާހަކަތަކެއް ނޫނެވެ. "ދިމްޔާތުގެ ގަނޑުވަރަށް" އަމުރު އަންނަ ގޮތަކަށް މިނިވަން "ބަންދުގައި" އޮތް މުއައްސަސާތަކުން އަމަލުކުރަމުން އެގެންދަނީ ގާނޫނެއް ގަވާއިދެއް ބެލުމެއް ނެތި އެވެ. އިންސާފުގެ ކުރިމަތީ ބޭއިންސާފު ދުވެ ނަގަނީ ފިސާރި މިނިވަންކަމާއި ހިނިތުންވުމާއި އެކު އެވެ. ރޯދަމަހުގެ ފަހުދިހައިގައި ހޭދަކުރަމުން ދާ ދުވަސް ކޮޅަށް ވާތީ ވާހަކަ މަދުކޮށް ލާނަމެވެ.

ނިކަން ދެކިބަލާށެވެ. ވަލީއުލްއަމްރުގެ އަދުލުގެ ދަރުބާރުގައި މިއަދު ކަން ހިގާ ގޮތަކީ "ޝަމްއާން އަތުން 5 ލައްކަ، ފަޒުލްގެ އަތުން 1.4 މިލިއަން ރުފިޔާ ފެނުނަސް ޝަމްއާން ހޫނު ގޮޅި އަށް ލާ ބަންދު ކޮށް ފަޒުލް ފިނި ކޮޓަރީގައި ދާންމަތިކޮޅުގައި ވެޑުނީ އެވެ.

އިބުރަތް ލިބިގަންނާށެވެ. "އުންމަތުގެ އަނިޔާވެރިޔާ" ގެ ގޮތުގައި އިސްލާމީ ތާރީހުގައި ނަންފެވިފައިވާ ހައްޖާޖް ބިން ޔޫސުފްގެ ދަރުބާރުގައި ވެސް އަދުލުއިންސާފުގެ ދާއިރާ އޮތް މިންވަރު މިއަށްވުރެ ފުރިހަމަ އެވެ.

މާތް މަނިކުފާނު އެވެ. ވެރިއެއްގެ ނަން ރީތި ވަނީ "މަޑުމައިތިރިކަމާއެކު" ކުރައްވަމުން ގެންދަވާ ވެރިކަމަކުން ނޫނެވެ. ވެރިއެއްގެ ޖާހު ރައްޔިތުންގެ ހިތްތަކާއި ތާރީހުގެ ފަތްފުށްތަކުގައި މަތިވެރިވެދަނީ ބަހާއި އަމަލުން ދައްކުވައިދޭ އަދުލުވެރިކަމާއި ހެޔޮވެރިކަމުގެ ނަތީޖާއިން ރައްޔިތުންގެ މެދުގައި ގާއިމް ކުރެވޭ ހަމަހަމަކަމާއި އަދުލުގެ ތިލަފަތުން ނެވެ.

އެއީ އިއްޒަތްތެރިންނަށް ދެވޭ އިންސާފުގެ ހިދުމަތާއި އާންމު މީހާއަށް ދެވޭ އިންސާފުގެ ހިދުމަތުގައި ތަފާތުކުރުންތައް ނައްތާލުމުން ނެވެ. ވަށައިގެން ހިނގާ ކަންކަމަށް ބަލާއިރު މި ކަމުގެ އިހުސާސް ރައްޔިތުންނަށް ނުކުރެވޭ ކަމަށް ބުނުމުގެ ޖާގަ އަދިވެސް އެބަ އޮތެވެ.

ކޮމެންޓު
ކޮމެންޓްތައް
Copyright © 2013-2025 Media Ring Pvt Ltd.
All rights reserved