އައްޑޫއަށް ގެންދިޔައީ ބާ ދަނގަޑަށް ވެފައި ހުރި ޖަނެރޭޓަރެއް ސްޕްރޭކޮށްގެން! / ތޭރަގްރެފިކްސް
ހަބަރު
އައްޑޫއަށް ގެންދިޔައީ ބާ ދަނގަޑަށް ވެފައި ހުރި ޖަނެރޭޓަރެއް ސްޕްރޭކޮށްގެން!
Mariyam Isaadha
މަރިޔަމް އިސާދާ
28 މާރިޗު 2025
މާލެ ސިޓީ

އައްޑޫއަށް ގެންދިޔައީ ބާ ދަނގަޑަށް ވެފައި ހުރި ޖަނެރޭޓަރެއް ސްޕްރޭކޮށްގެންކަން ހާމަވެއްޖެއެވެ.

އައްޑޫގެ ގުޅިފައިވާ ރަށްތަކަށް ދިމާވެފައިވާ ކަރަންޓު ކެނޑުމުގެ މައްސަލައަށް ހައްލު ރޯދަ މަސް ފެށުމުގެ ކުރިން ގެނެސްދިނުމަކީ ރައީށް ޑރ މުހައްމަދު މުއިއްޒުގެ ސަރުކާރެއް ވައުދެއް ނަމަވެސް ރޯދަ މަސް ނިމެން ދެ ދުވަހަށް ވެފައިވާއިރުވެސް އަދިވެސް އެކަމަށް ހައްލެއް ލިބިފައިނުވެއެވެ.

އެކަމާ ގުޅިގެން ރައްޔިތުން ނުރުހުން ފާޅުކޮށް އީދަށްވެސް އައްޑޫ ދިއްލައިގެން ނުވާނެ ކަމަށް ބުނެ ދަނި ސަރުކާރާ ދެކޮޅަށް އަޑު އުފުލަމުންނެވެ. ރައްޔިތުންގެ ރުޅިގަނޑު ކޮންޓްރޯލުކުރުމަށާ އެކަން އޮއްބާލަން ސަރުކާރުން ވަނީ ދާދި ފަހުން ޖަނަރޭޓަރެއް އައްޑޫއަށް ފޮނުވާފައެވެ.

ސަރުކާރު ޕްރޮމޯޓު ކުރާ އައްޑޫ ސިޓީއަށް ނިސްބަތްވާ މީހުން ދަނީ މިކަމާ ގުޅިގެން ރައީސް ޑރ މުއިއްޒުއާ އަދި ފެނަކައިގެ އެމްޑީއަށް ތައުރީފުކޮށް ސަނާ ކިޔަމުންނެވެ. ނަމަވެސް މި ޖަނަރޭޓަރަކީ ބާ ޖަނަރޭޓަރެއް ކަމާ މިއީ އިންޑިއާގައި އަހަރު ދުވަހު ބޭނުންކުރުމަށްފަހު މެނުފެކްޗަރިން ތާރީޚު ބަދަލު ދަވާދު ބަދަލުކޮށްެގެން ބޮޑު އަގުގައި ގެނެސްފައިވާ ސެކަންޑް ހޭންޑް ޖަނަރޭޓަރެއްކަން ވަނީ ހާމަވެފައެވެ.

އެގޮތުން އެ ޖަނަރޭޓަރުގެ މެނުފެކްޗަރިން ޑޭޓު ނުވަތަ އުފެއްދި ތާރީޚު 2024 ވަނަ އަހަރުގެ ސެޕްޓެމްބަރު މަހުގެ 10 ވަނަ ދުވަހަށް ބަދަލުކޮށްފައިވީ ނަމަވެސް އެ ޖަނަރޭޓަރަކީ 2023 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހު އިންސްޓޯލުކޮށް އިންޑިއާގެ ދިއްލީގައި ބޭނުންކޮށްފައިވާ ޖަނަރޭޓަރުތަކެކެވެ.

7.8 މިލިއަން ރުފިޔާ ޚަރަދު ކުރުމަށް ފަހު ފެނަކައިން މި ޖަނަރޭޓަރު ގަތީ މީގެ ކުރިން ފެނަކައިިން ބްލެކް ލިސްޓުވެސް ކޮށްފައިވާ އިންޑިއާގެ ކުންފުންޏެއް ކަމަށްވާ ޖާމިނަލް ޓެކްނޮލޮޖީއިންނެވެ. އައު ޖަނަރޭޓަރެއް ގަންނާނެ އަގަށް ބާ ޖަނަރޭޓަރެއް ގަނެފައިވާއިރު މި ބްރޭންޑްގެ ސެކަންޑް ހޭންޑް ޖަނަރޭޓަރު 3.5 މިލިއަން ރުފިޔާގެ އަގަކަށް ގަންނަން ލިބެއެވެ.

މީސްމީޑިޔާގައި ދައުރުވަމުން އަންނަ ބައެއް ފޮޓޯތަކުން މިކަން ވަރަށް ސާފުކޮށް ފެންނަން ހުރި ނަމަވެސް ސަރުކާރުން ވެސް އަދި ފެނަކައިން ވެސް މިކަމާ ގުޅިގެން ބަހެއް ބުނެފައިނުވެއެވެ. އަދި މިކަން ދޮގުކޮށްފައިވެސް ނުވެއެވެ.

މި އަހަރު ފެށުނީއްސުރެން އައްޑޫ ސިޓީއަށް ދިމާވެފައިވާ ކަރަންޓުގެ މައްސަލަ ފެނަކައަށް ވަނީ ހައްލުނުކުރެވި ރައްޔިތުންނަށް ގިނަ ގެއްލުންތަކެއް ވެފައެވެ. ފެނަކައިން އެންމެ ފަހުން ބުނީ އެންމެ ފަހުން ފޮނުވި 1.8 ކިލޯވޮޓުގެ ޖަނަރޭޓަރާއެކީ މި މައްސަލައަށް ދާއިމީ ހައްލެއް ލިބިގެން ދާނެ ކަމަށެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved